11
Israel nogo Ki Wali Iram go dabui gemang
1 Suey so Ki Wali Iram no Israel saula kua tupduk keng go sogo, gabe usi-situgu, nemot go blung ngga, Ki Wali Iram lo mo tenguo? Gabe we-situgu: kua! Se duing: genam tang go, sedue Israel. Ablaham go danon, tang Benyamin lo tui go. 2 Banim sik so Nemot nogo so kuoy go blung ngga, Ki wali Iram kua tenguo. Wali Sam klaut no, nabi Elia so klik go motnang mo senong. Yangga: Ki Wali Iram sono Israel saula so, ngge kalik tanat go Elia lo mo usi,
3 “O, Woy Wali Iram!
Mot go nabi-nabi sikabung lo mo tuk-sing.
Mot nogo dewi so pupu go sip mo togut.
Genam-a banom itak go, but-neyon so gabe. Esang.” a
4 No, way so Elia sono Ki Wali Iram lo pu go, “Kua! Genam nogo so itak go sikabung, demat Baal sono unuik go, ta kua kong go temu, 7 ribu dali gemang.” b
5 Nggeasui go, Elia go ku dali kalik gabe. Ki Wali Iram go gualaklum ba no degut genang, Israel sik sogo temu, Nemot lo kuoy go gemang dali. 6 Gualaklum ba no kuoy go ngga, demutrui no tupduk go takebali suey go pluok go tang so, nemotnang kua ip. Se duing: takebali-a pupluok go sik so sikabung ya kuoy go, Ki Wali Iram go taitiklum seni, kua gemang. 7 Ngga kalik go, sogo kalik ne? Se senong! Blung Israel lo u-usey go ngga, seni kua tegu. No, nemotnang sik sogo temu dato-a, Ki Wali Iram tang go lo kuoy go-a demutrui seni mo mlak. Yang, Iram Yesus nemotnang-a mo tegu gabe. Temu-a, Ki Wali Iram no wengkabui demu-a gemang tetaling. 8 Yang! Nemotnang kua tup goso, Wali Sam klaut ba no klik go,
“Ngge-a Ki Wali Iram lo mo pluok:
‘Nemotnang sedi waluk go ba no mo kenuong.
Tandali suey sogo kua duduing.
Ngga ey, nggeasui gono pung go,
nemotnang go nemu logo yakua ikum,
kama logo kua tutup dali.’ ” (Yesaya 29:10)
9-10 Ngge Daut lo pu dali go,
“Nemotnang go walop naklay,
idekeba taling genang, sado so se lemoy.
Pui genang mu so tuet go se gigit.
Yakua ikum genang, nemotnang go nemu ku se klik.
Itak go tuen-tuen so se koklong.” (Mazmur 69:23-24)
11 Tandali gabe usi-situgu: sikabung Israel pui go, mesuop go, kua ip genang so? Ngga kalik kua. No, kuklue ba no sedue Yahudi pui go tang so, way so saula-saula nogo wali susuoy-a se pung. Ngga tang so, sedue Yahudi dabuilek go Ki Wali Iram sono keng genang. Ngga Ki Wali Iram lo duing go.
12 Se duing! Kuklue tang so sikabung Israel-a pui go, way so kukunan blo sogo saula-saula sono, blong teguop-a mo pung. Ngga kalik go: dabui lo sikabung Israel iwat go, tandali Ki Wali Iram no keng go, sogo kalik ya lemoy? Ngge-a mea lemoy: Ki Wali Iram sik sogo blongdon dega-a mea uweng.
Saula-saula sesuoy go
13-14 Ayanang, mianang! Blong duoyap saula-saula sik sogo so gabe pen-asitugu: saula-saula nogo, Iram Yesus go tamot so genam gabe. Kebali ngga yakay ey dabui tategue ey genam gabe penklong. Genam lo duing go: saula-saula dabui lo Ki Wali Iram no keng go ikum go tang so, at go saula Yahudi temu dabuilek go, teguey go, wali sesuoy sogo be! 15 Se senong! Sikabung Israel, ngga sono Ki Wali Iram lo itak go, wayso kukunan ngge-a Nemot ey ngengam go, tandali sikabung Yahudi Ki Wali Iram lo wawi go, sogo kalik ya lemoy? Yang! Kebong go sik so tandali nglong go kalik, nemotnang lo mea tra. 16 Kua kay! Temu dato-a, teguop so Ki Wali Iram no iti go, naklay ngga mo teguop dali gemang. Di kalik, srang-a teguop go*(*‘srang-a teguop go’ babuasi Ablaham, Isak, Yakob, Musa ey nabi-nabi temu so taling go.), di ngga naklay teguop dali go gemang.
17 Yang! Sikabung Israel ngga, disaytun kali kalik temu-a ibot go gemang. Kali ibot go sip ngga dali no, duen ba sik sogo disaytun kali, yangga way so saula meno-a iti go, gemang sebut. Wali teguop nemotnang sik so tra dali genang so, motnang-a ngga temoy sono, tebok go gemang. 18 Ngga tang so, kali-kali gemang go-a, ku sono saula-saula lo kua kenok! No, saula-saula logo se duing: atnang ngge kali seguong. Srang ten-a, kali lo kua i-iti. No, kali-kali nogo ten-a, srang sik so gemang i-iti.
19 Way so saula-saula sik sogo blong duoyap lo mea pu, “Yang! Kali ngga ibot go, ngga temoy sono genam sebut genang.” 20 Gabe pen-asitugu: ngga seni so lo. No, Iram Yesus no kua keng go tang so, ibot go nemotnang gemang tega. No, motnang-a keng golo, gualaklum ba no mo wawi gabe. Blo sono dabui-a motnang lo kua iti. Ki Wali Iram nogo-a suali ey se! 21 Ngge-a suey so se duing: sikabung Yahudi kali seni-a ibot go, mot logo kua duing: genam Ki Wali Iram logo yakua ibot wa! No, mot ibot go mea betep dali. 22 Ngga sik so ngge-a se senong: Ki Wali Iram ngga suey dato! Don dega eygo Nemot-a gabe. Kuklue so pupluok go sikabung nogo, don-a Nemot lo mea taling. Yang, motnang nogo, Nemot go klum katu ey. Mot-a tupduk keng so se wali Kua go, motnang ibot go mea tega dali.
23 Yang! Tandali nuik temoy no sikabung Yahudi sebut genang, Ki Wali Iram don dega ey. Nago no, tupduk kua keng go sik so dabui lo iwot go, tandali nemotnang Ki Wali Iram lo mea wawi. 24 Se duing: sikabung Yahudi tang go-a, disaytun seni kali gemang. Ngga ey, kekayso tandali go nuik temoy sono, nemotnang Ki Wali Iram lo iti go mea sebut. Motnang-a, saula meno sik sogo blong duoyap ngge, duen sik sogo disaytun kali gabe. Disaytun seni nuik temoy no motnang mo sebut. No, sebut go ngga diding ba lo gemang.
Ki Wali Iram go gualaklum ba no Israel gabe
25 Ayanang, mianang, blong duoyap! Mot tang so duing go-a, keda so kua keng! Se senong: Ki Wali Iram go duduing kok go gigit go, maning gemang. Duduing ngga, motnang senong genang, gabe taling-situgu: blung Israel sik sogo temu, wengkabui demu ey, tupduk kua keng. Ngga kalik suing go, e... saula-saula sik sogo, Ki Wali Iram lo sesuoy genang yam so mea nemot. 26-27 Ku ngganemot no, sikabung Israel naklay mea sesuoy. Yang, Wali Sam klaut no ngge mo klik gabe.
“Ki Wali Iram lo pen go,
‘Tegadi ngge-a nemotnang ey,
Genam lo mo dok gabe:
Israel go idekeba tebuo genang ku no,
meduim Sion sik so Sesuoy Iram mea weng.
Ngga ey, Yakop go mlenawalasrang lo pluok go taybat
Sesuoy Iram lo mea suep.’ ” (Yesaya 59:20, Yeremia 31:33-34)
28 Motnang saula-saula walitap pung genang so, Ki Wali Iram go koy saula so, Israel tang-a gabe lemoy. No, ngge se senong: babuasinang, Ablaham, Isak nggano Yakop, Ki Wali Iram lo mo kuoy go tang so Israel saula nogo Ki Wali Iram go klum tongkuatong. 29 Yang! Nando sono Ki Wali Iram go taitiklum taling go, tandali mea kua lek. Nemot lo pu go, yakua keneng.
30 Yang! Banim go saula-saula sik sogo sikabung, Ki Wali Iram nogo tupduk so kua keng. No, sikabung Yahudi kua keng go nogo, gualaklum ba no saula-saula-a Ki Wali Iram lo mo wawi gabe. 31 Sikabung Israel ngga kalik dali: Ki Wali Iram nogo kua kengduk gemang. No, klum katu ey motnang sono iti go nogo, gualaklum ba no nemotnang Ki Wali Iram lo mea wawi dali. 32 Yang! Seni so, sikabung naklay, kuklue go don sono, Ki Wali Iram lo mo itak. No, gualaklum ba no sikabung naklay Nemot lo mea wawi.
Ki Wali Iram no iway se iti
33 Yang!
Ki Wali Iram go senongblong duduing,
kangok dega, gluk genang yakua.
Nemot go kisebui taling genang,
nando logo so ya ikum go mlak?
Nemot lo pupluok go atuia,
nando logo so ya ikum go senong?
Ngge kalik Wali Sam klaut lo usi go ey se duing,
34-35 “Ki Wali Iram go kunala, nando-a mo senong?
Nemot nogo, nebut mang, nando logo-a ya king?
Way eygo Woy Wali Iram nogo,
nando logo-a ya waydang?” (Yesaya 55:8, Yesaya 40:13)
36 Ngge-a se duing:
- naklay ngge Ki Wali Iram sik sogo;
- naklay ngge Ki Wali Iram logo so;
- naklay ngge Ki Wali Iram nogo seguong.
Senang so Ki Wali Iram go sui iway-a se keklak! Seni.