10
Yahudi saula sesuoy so Paulus lo suang go
1 Ayanang, mianang, blong duoyap! Yahudi saula sesuoy genang sogo, kangok so genam lo gabe susuang. Ngga nang sogo Ki Wali Iram sono genam lo gabe pupu. 2 Yang! Genam senong go gabe yang: Ki Wali Iram nogo kebali dabui lo nemotnang gemang usey. No, nemotnang lo pupluok go ngga, Ki Wali Iram go duduing ey kua but ne. 3 Sikabung no seni eygo nemudi sogo tap, Ki Wali Iram lo iti go, nemotnang kua senong. No, nemotnang tang so duing go tap-a gemang usey. Piam sik sogo kisebui padak go tap Ki Wali Iram logo-a, nemotnang lo ne itak. 4 Blong Dem Yesus ba no, demutrui go seni naklay mo pung gabe. Ngga tang so, dabui lo Blong Dem no nando keng go, seni eygo nemudi sogo so, nemot Ki Wali Iram lo mea yang. 5 Seni so Musa lo mo klik-ngam, “Demutrui no seni so nando kengduk go tang so, nemot mea wali.” a Ngga pupluok go tang so, seni eygo nemudi sogo so mea ip. 6 Nggano, dabui lo Iram Yesus no tupduk keng go tang so, seni eygo nemudi sogo imot Ki Wali Iram lo gabe iwat. Tap meno-a yakua wet. Ngga senong genang so Musa lo mo klik dali, “Mot tang so dabui ba logo yakua usi, ‘Ut blo nogo nando lo ya klak-biyon?’ ” b Yangga nemot go seni: Iram Yesus nando lo wawi go ya li-kunyon? Ngga kua pu! 7 Ngga no, “Sikebong sip sono go, nando-a ya li?” Nemot go seni: kebong sik sogo Iram Yesus nando lo wawi go ya klak? Ngga kua pu dali! 8 No, ngge kalik Musa lo mo pu gabe:
“Mot dagu so walinebut gabe,
mot go lom ba so, mot go dabui ba so gemang.”
Ngga sik so mea senong: atnang lo penklong go Iram Yesus, dabui lo keng genang, ket so kua, dagu so gabe! 9 Se senong! Nago no, mot go lom lo wa go, “Yesus ngga Woy Dem!” Ngga ey, dabui ba no yang go, “Seni so, kebong go sik sogo tandali Yesus Ki Wali Iram lo mo nglong.” Ngga tang so, wali sono go mot mea sesuoy. 10 Dabui lo yang go tang so, seni sogo nemudi sogo sikabung so, motnang Ki Wali Iram lo mea wawi. Nggano, mot go lom lo wa dali go tang so, motnang mea sesuoy. 11 Kua kay! Duduing ngga, seni so. Wali Sam klaut ba nogo mo klik, “Dabui lo Nemot no keng go sikabung-a seni ey Ki Wali Iram go suongku nogo mea ikum. Ngga wamoy so kua gemang!” c
12 Ngge se senong dali! Sikabung naklay nogo so walinebut ngga klik go. Yang, nggeasui go, tang pleng kua gabe. Sikabung Yahudi ey saula-saula eygo, Woy Dem-a klaya gabe. Nemot sono iway pupu go sikabung naklay nogo-a, tongkuatong go taitiwalipega-a, Woy Dem lo gemang wasey-sing. 13 Wali Sam klaut ba klik go, “Woy Dem sono iway nando lo keklak go, mea sesuoy.” d
14-15 No, gabe usi-situgu:
- maning kua keng go sikabung logo, sogo kalik Woy Dem nogo iway ya pu?
- maning kua tup go sikabung logo, sogo kalik Woy Dem nogo ya keng?
- nebut ngga kua penklong go, sogo kalik Woy Dem sogo deguo ya tup?
- tamot-tamot kua mot-dak go, sogo kalik deguo teguop ya penklong?
Wali Sam klaut ba nogo, ngga nang sogo mo pen gabe, “Deguo teguop so iti go penklong go masisip, teguop dato!” e
16 Esang! Dabui ba nogo deguo teguop ngga, sikabung temu nangglik dato lo mo king. Ngga nang so, nabi Yesaya lo pu-ngam go, “O, Woy Wali Iram! Atnang lo pepen go deguo nogo, nando-a mo keng?” f 17 Deguo ngga tup go tang so, dabui lo sikabung mea keng. Tup go sik so, Iram Yesus go deguo teguop mea mlak. 18 Gabe usi-situgu: deguo ngga sikabung Israel logo kua tup? Genam lo duing go: nemotnang mo tup! Seni so, Wali Sam klaut ba nogo ngge kalik mo klik,
“Kukunan naklay no
nemotnang go deguo mo koklong.
Nan sedingno-sedingno
Nemotnang lo pepen go, mo pung.” (Mazmur 19:5)
19 Gabe usi-situgu: deguo ngga, Israel saula maning kua mlak go, seni so? Se duing! Wali Sam klaut ba no, banim no ngge kalik Musa lo mo pu,
“Ki Wali Iram lo gabe pen:
dabuisadui motnang tra genang so,
blung so kua pu go saula meno-a, Genam lo mea kuoy.
Dabui motnang lek genang so,
saula meno puplu sogo-a, Genam lo mea wawi. (Ulangan 32:21)
20 Seni sogo ngge kalik nabi Yesaya lo mo pen,
“Ki Wali Iram lo gabe pen,
‘Genam so kua uwet go sikabung lo,
Genam mo tegu gabe.
Genam so kua u-usi go sikabung sono,
Genam tang go mo taling gabe.’ ” (Yesaya 65:1)
21 No, Israel saula sogo, Yesaya lo pen go,
“Ki Wali Iram lo gabe pen,
‘Genam go blung wengkabui demu eygo
tupduk kekeng kua go.
Tandali blung ngga wawi genang
kamso Genam lo ta-a gabe sesesra.’ ” g