9
Yahudi saula Ki Wali Iram go senang blung
1 Se senong! Klaya so Iram Yesus ey lemoy go tang so, seni sogo-a genam lo gabe pepen. Ngga no, Ki Wali Waglo lo taling go, dabui iku lo yang go-a, gabe pen-asitugu: wamoy sogo-a kua mlue gabe! 2-3 Se tup! Genam sikabung Yahudi ey tang klaya. Nemotnang genam go tangsru gemang. No, nemotnang Iram Yesus no kua keng go tang so, dabui u ey, dabui iseng kangok so gabe tetra. Ngganemot sogo so, genam go dewi ngge kalik mang ne pupu, “Aya, sang! Genam-a tenguo go, Iram Yesus eygo tegan tong go, Yahudi saula sesuoy go-a, suey!” 4 Sikabung Israel sogo, ngge-a genam mo senong: Blung Israel, Ki Wali Iram lo wawi go, Nemot go duoyap so nemotnang mo temuit. Yang! Banim nogo Ki Wali Iram go blongdon nemotnang nogo so mo wasey. Ngge kalik:
- tegadi-tegadi dok go; a
- Musa no iti go demutrui;
- Ki Wali yap ba no ngengam kebali;
- Wali Sam klaut ba sogo Sesuoy Iram sogo nebut.
Blongdon ngga naklay sikabung Yahudi nogo Ki Wali Iram lo mo iti.
5 Yang, sikabung Israel sogo, ngge-a genam mo senong: babuasi Ablaham, Isak nggano Yakop ba sik so pung go, nemotnang gemang. Ngga ey, sikabung Yahudi ba logo so, tegadi so dok go Sesuoy Iram mo pung gabe. Ngga naklay senong go tang so, genam lo gabe pupu,
“Yang, Woy Wali Iram blo dega so got-aton.
Nemot go sui-a blo sono, senang so se i-iti! Seni.”
Ki Wali Iram lo duing go-a mea lemoy
6 Nemot-a, Ki Wali Iram lo kuoy go blung Israel lo, tegadi so dok go Sesuoy Iram Yesus tenguo go, tegadi ngga Ki Wali Iram logo kua tong. No, se duing: sikabung Israel naklay, Ki Wali Iram go blung so kua. 7 Se duing: babu Ablaham lo tui go duo naklay, tegadi so Ki Wali Iram lo dok go duoyap kua. b Yang! Ablaham sono ngge kalik Ki Wali Iram lo mo pu, “Isak lo tui go duo seguong-a, mot go duoyap sogo mea pu.” 8 Ngga, nemot go seni: Ablaham tang go kin, Ki Wali Iram go duo sogo kua kuoy. No, tegadi so Ki Wali Iram lo dok go tui go duo-a, nemot go duo so mea pu. 9 Seni so! Ablaham lo tui genang duo sogo, ngge kalik go tegadi-a Ki Wali Iram lo mo dok-nangam, “Mot mit no tandali Genam pung gono go, sedue denok-a Sara lo mo tui gemang.” c
10 Ngga blo idi lo, Ablaham go danon Isak no lemoy go se duing dali: nglangin klaya go sik so, mia Rebeka go nu no, sedue denok namon mo iti. 11-12 Yang, duo namon ngga maning kua tui gono, maning sueygo-piamgo kunala kua senong gono, klaya duo-a, Ki Wali Iram lo mo kuoy. Seni so, Rebeka nogo Ki Wali Iram lo mo pen,
“Sat duo nogo kebali-a trang lo mea pupluok.” (Kejadian 25:23)
Tegadi ngga dok go, sedue go takebali sik so kua, no, Ki Wali Iram go duduing no usi go tang so, mo kuoy. 13 Ngge kalik Wali Sam klaut ba no mo klik,
“Yakop nogo-a Genam klum ey, no Esau nogo kua.” (Maleakhi 1:2-3)
14 Nggeasui go imot logo sogo kalik ya pu? “Ngga, nemudi so Ki Wali Iram lo kua kuoy?” Kua. Ki Wali Iram ngga, nemudi sogo nuik. 15 Yang, Musa no, Ki Wali Iram lo pu go,
“Genam ngge Ki Wali Kumam.
Nando no, Genam go gualaklum taling go,
nemot nogo-a Genam mea tetaling.
Nggano, nando-a Genam lo klum so duing go,
nemot-a Genam logo mea klum.” (Keluaran 33:19)
16 Ngga sik so gabe senong: Ki Wali Iram go gualaklum logo so pu go, sikabung go takebali logo yakua. 17 Se duing dali: Wali Sam klaut ba nogo Pirawon so mo pen, “Mot iram sogo, Genam lo mo taling go suing. Duduing ngge-a lemoy genang: Mot no Genam go blongdon taling golo, kukunan blo logo Genam go sui dayap genang!” d 18 Yang! Klaya duo no klum-a, meno duo-a wengkabui demu ey taling go, Ki Wali Iram tang so iwat go-a mea lemoy.
Ki Wali Iram go duduing ey kisebui ey
19 Ki Wali Iram tang so ngga kalik taling go, way so motnang lo mea usi-kesando, “Dabui demu eygo so ngga kalik taling go, sogo tang so piam eygo sikabung so, imot Ki Wali Iram lo ya pu? Ngga Ki Wali Iram go duduing tang golo mo lemoy go.” 20 Way so, gabe usi-situgu, ‘Motnang nando? Ki Wali Iram motnang logo ya bebat?’ Kua kay: sikabung seguong-a, motnang ngge gabe. Keda so way Ki Wali Iram sono go, mot logo kua tenguo. Yatrang ngge ey se senong: nemot so sesemu go sono, nebut way saulakabui logo yakua pu, “Sogo so ngge kalik genam klik-togoy?” e 21 No, saulakabui-a, nemot so sesemu go duduing no klik go gemang. Yang, nan muong klaya go sik sogo, nemot so sesemu go duduing no, saula namon eygo mea semu dali. Meno-a teguop so semu go, meno-a tebadali piam-piam so semu go mea tui. 22 Yatrang ngga sik so, ngge se mlak: koy ey don ey Ki Wali Iram lo taling go, Nemot motnang logo yakua bebat! Ngga taling genang, Nemot go don gemang! No, se senong: piam so taling go, waluk genang sikabung sogo, ku walong so mo gling-sangam! 23 Nggano, Nemot go blongdon kangok go taling genang, Nemot lo klum go sikabung-a, blong ba so klay gono susuing genang, Nemot lo mea wawi. Banim sik so, ngga naklay Ki Wali Iram lo mo duing. Nemot Ki Wali Kumam. 24 Uduo-nebo ngga imot gabe! Yangga, atnang Yahudi saula seguong sik sogo-a kua, no, saula-saula sik sogo mo usi dali gabe. 25 Yang, Wali Sam klaut ba no, Ki Wali Iram go nabi Hosea lo mo klik-ngam,
“Saula meno, Genam go blung so kua pu go-a,
At go blung so mea usi.
Genam lo kua klum go saula-a,
dabuidalip so, Genam lo mea pu.” (Hosea 2:22)
26 Nggano, sip meno no pu go,
“Motnang Genam go blung kua.
No, Ki Wali Mani Iram go duoyap so motnang mea pu.” (Hosea 1:10)
27 Don ey Israel saula sogo, nabi Yesaya lo mo pen,
“Seni so, blung Israel miam dega ey
beap kaseglok kalik, no temu dato-a mea sesuoy.” (Yesaya 10:22-23)
28 Se senong! Kukunan blo sono go, Ki Wali Iram lo pu go ngga, keda so nemudi so mea lemoy. 29 Kisebui sogo, ngge kalik go nabi Yesaya lo mo pu dali,
“Imot sinok nogo, Woy Wali Iram lo kua klum go,
sikabung sesuoy go, tandali go yakua ikum.
yakena Sodom ey Gomora eygo kalik,
imot ngge naklay mo lemoy gabe.” (Yesaya 1:9)
Israel saula-a pui go saula temu-a sesuoy go
30 Ngge naklay senong go sik so, sogo kalik ya duing? Yangge: nemot-a, tandali Ki Wali Iram ey ngengam genang, saula-saula don kua go, dabui lo keng go tang so, seni eygo nemudi sogo so Ki Wali Iram lo gabe yang. 31 Yang! Demutrui no kengduk golo seni eygo so yang genang-a, sikabung Israel lo mo usey. No, nemot go seni kua lelemoy ne sang. 32 Sogo temoy no, seni nemotnang nogo kua lelemoy? Esang! Nemotnang lo duing go: atnang lo pupluok go tang so, mea sesuoy! No, seni eygo so yang genang tap, Ki Wali Iram lo taling go, dabui lo nemotnang-a kua keng ne.
Se senong: di sono Sesuoy Iram glung go, kebong go, tandali nglong go tap, nemotnang nogo demu netuik so mo lemoy. Yang! Demu netuik ngga no masi kling go, nemotnang ey mo pui-lak. 33 Demu ngganemot sogo Wali Sam klaut ba no, Sesuoy Iram go tap dabui lo keng go tang nogo-a, ngge kalik gabe klik,
“Se ikum! Sion, ngga Israel no
demu klaya Genam lo mo tui gabe;
nemot temoy no sedue go masi mea kikling;
Yangga, demu kangok go klaya,
ngga tang so sedue mea kenuong;
No, dabui lo Sesuoy Iram no keng go sikabung-a, tap kua nega.
Nemot lo duing go, mea lemoy.” (Yesaya 28:16)