8
Ki Wali Waglo lo pupluok go wali
1 Yang. Nggeasui go, klaya goso Iram Yesus ey nando lemoy go nogo, kisebui mo kua. 2 Se senong! Iram Yesus ey klaya go logo so, tap ngge mea lemoy: Ki Wali Waglo lo taling go don lo, imot nogo wali inim-a mo iti. Ngga ey, piam ey kebong eygo don sik sogo, imot mo plet-dak.
3 Nemot-a demutrui no keng so duduing go, imot waglo don kua go sikabung, tap ngga logo yakua klong. No, Ki Wali Iram tang so tap inim-a mo kebuo. Yangga: piam go don tang sogo so, kukunan blo sono Danon tang go-a mot-dak go mo weng. Waglo piam lo waluk go sikabung ey kerlam goso Nemot mo lemoy. Sikabung go wali ba nogo piam go don pedueng genang, Blong Dem blo sono kisebui, Ki Wali Iram lo mo taling gabe. 4 Ngga tang so, demutrui seni eygo, imot logo mea pupluok. Se duing: nggeasui go, Ki Wali Waglo go don logo-a, imot go wali mo mlak gabe. Waglo waluk go sikabung sogo, imot mo kua.
5 Se senong! Sikabung, waglo waluk golo tetaling go, saysuk lo duduing go-a senang so gemang duduen. Ki Wali Waglo lo tamlak go-a, Wali Waglo tang golo duduing go-a mea duduen. 6 Yam so sikabung go kunalatasam lo tram go wali, kebong-a mea pung. No, Ki Wali Waglo go duduing nogo tang so, ngengam sogo mea uwali.
7 Yang! Sikabung go duduing lo tram go ngga, Ki Wali Iram nogo koysaula gemang. Ki Walidemu nogo nemot kua kekeng. Seni so, Ki Walidemu no kengduk genang, nemot go don kua. 8 Sikabung go duduing no uwali go, Ki Wali Iram yakay genang-a kua pupluok.
9 Ayanang, mianang, blong duoyap! Sikabung go duduing tang golo, motnang kua uwali gabe. Motnang go dabui ba nogo Ki Wali Waglo lo tamlak go, Wali Waglo lo duduen go tang so, motnang gemang uwali. Se duing! Nando ba sogo Iram Yesus go Waglo kua gigit go, Iram Yesus go tete sogo nemot ngga kua gemang. 10 Nemot-a, kuklue tang so mot go saysuk kebong genang, Iram Yesus lo tamlak go tang so, tandali motnang Ki Wali Waglo lo gabe wali. Seni eygo nemudi sogo so, mot Ki Wali Iram lo yang go nogo. 11 Se duing: kebong go sik so, Blong Dem Wali Waglo lo tandali mo nglong. Motnang go ba nogo Iram Yesus so nglong go Wali Waglo gabe gigit. Ngga ey, gabe senong: Ki Wali Waglo go don logo so genam go wali waluk go ngge, inim-a tandali mea wali.
Imot go wali Ki Wali Waglo lo rlek go
12 Ayanang, mianang, blong duoyap! Tandali imot sikabung go duduing logo kua rlek. 13 Sikabung tang go waglo, duduing tasam lo rlek go, motnang go wali mea kebong. No, piam so duduen go-a, Wali Waglo go don lo kekebong go tang so, wali inim-a motnang mea pupung.
14 Se senong: nando go wali, Ki Wali Waglo lo uwawi go, nemotnang ngga Ki Wali Iram go duoyap gemang. 15 Motnang ba nogo Ki Wali Waglo iti go, ngga koybutasemu kalik suali ba lo suing genang so kua! No, Ki Wali Waglo motnang no iti go ngga lo, Nemot go duoyap so motnang mo lemoy. Don ngga logo so, Ki Wali Iram sogo “Aya sop” so mea usi. 16 Ki Wali Waglo ey imot go waglo eygo lo, kerlam so mea yang, “Genam ngge, Ki Wali Iram go duo gabe.”
17 Imot Ki Wali Iram go duoyap so yang go tang so, tegadi so dali-dali dok-sing go, Ki Wali Iram lo mea wasey. Seni so, ngga imot go tete sogo! Ngga iti genang, imot don ey! Iram Yesus nogo so ta-sing go ey, kerlam so tegadi ngganemot imot mea iti. Ngga ey mea duing: nggeasui go Blong Dem ey iseng kerlam go lek go, yansi go blong ba nogo Iram Yesus ey imot mea wawi.
Senang wali blong
18 Dem debui, blong duoyap! Genam dabui lo mo iwat: yansi go, imot no blongdon teguop-a Ki Wali Iram lo mea taling. Kangok so at lo duing go: nggeasui imot lo tra-eton go iseng ngge, seguay dato; blong ngga ey kua kerlam. 19 Se senong! Ki Wali Kumam go takebali naklay, ut-nan, wi-dasi, kim-daguit lo kangok so gabe segi-neton: kaning so blong ba no, Ki Wali Iram go duoyap ya pung? Atnang degut dali sogo be! 20 Esang, kukunan ngge, waluk genang so gabe mo itak. Ngga, nemot go duduing tang so kua, ngga kalik Ki Wali Iram lo mo pu go itak. No, blong ba no degut genang duduing ngga sogo, don ey kukunan lo gabe bubung. a 21 Yang! Asay kekenip go ngge sik sogo, ku meno no wali ngge mea plet-dak dali. Ngga ey, Blong duoyap nogo taitak go ey blong teguop ey kerlam so kukunan nogo Ki Wali Iram lo mea itak.
22 Esang! Ngge-a imot mo senong: iseng kangok go kukunan ngge lo maning gabe tetra. Kabung duo tui sogo lo, uwaklo go kalik.
Gigling ey don ey se bubung
23 Iseng ngga, kukunan seguong-a kua tetra. No, imot tang go dabui ba lo gabe segi-eton dali. Imot go dabui ba nogo, baynang kalik, Ki Wali Waglo-a mo king gabe. Ngga suey! No, Ki Wali Iram go duoyap blong ba lo taling genang-a, ngga ey saysuk buin genang ngge, Ki Wali Iram lo iwot genang-a, gabe bung-eton. 24 Yang, Iram Yesus sogo-a don ey bung-eton goso, imot mo sesuoy gabe. No, nggeasui go Iram Yesus go blongdon mo ikum go, teguopey kua bubung. 25 No, maning kua ikum go duduingbubung-a, gigling ey don ey imot lo se bubung!
26 Yang, imot don kua go sikabung nogo, Ki Wali Waglo lo gemang ya tebok. Seni so, sogo kalik go dewi-a ya pu go, imot kua senong. No, imot sogo dewi, lom logo kua pepen go nebut so, Ki Wali Waglo tang golo gabe sesegi. 27 Yang! Ki Wali Waglo lo duduing go-a, Ki Wali Iram mo mlak. Sikabung go dabui ba, Nemot mo senong. Blung nogo so uwadong go, Ki Wali Iram go duduing nogo, Wali Waglo lo gabe pepen.
Ki Wali Iram go gualaklum ba no imot gabe wali
28 Ngge imot mo senong: Ki Wali Iram go duduing no imot mo kuoy. Ngga ey, Ki Wali Iram no klum eygo sikabung, naklay-naklay ba no teguop so iwot-dak genang-a, Nemot lo gabe pupluok. 29 Ngga mlak genang, tap ngge se ikum: walu dega sik so, Nemot go blung so lemoy genang sikabung, Ki Wali Iram tang so mo senong. Ngga ey, Ki Wali Iram lo mo pu, “Satyap so pu genang blong duoyap mata sogo-a Genam lo mo kuoy. Keduong duo so Iram Yesus-a kerlam so nemotnang se lemoy!” 30 Ngge kalik mo lemoy gabe:
- Nandonang mo duing go, Ki Wali Iram lo mo kuoy.
- Nandonang mo kuoy go, Ki Wali Iram lo mo pu gemang.
- Nandonang mo pu go, kuklue pat-dak go, Ki Wali Iram logo mo yang.
- Nandonang-a mo yang go, Ki Wali Iram ey blongdon ba so gabe.
Iram Yesus logo so Ki Wali Iram lo klum go
31 Naklay ngga senong go, sogo kalik ya pen? Imot no Ki Wali Iram lo tebok go, nando logo so imot nogo pleway ya but? 32 Yang! Danon tang go wali nogo Nemot logo kua duing. No, imot naklay sesuoy genang so, Danon-a mo itak gabe. Taiti meno-meno naklay imot nogo mea iti dali.
33 Yang! Imot Ki Wali Iram lo mo kuoy. Se pen: nando logo so imot nogo ta ya nat? Kua kay: imot sogo Ki Wali Iram tang golo yang go, ‘Kuklue mo pat-dak!’ 34 Imot sogo kisebui, nando lo ya pu? Ngga yakua lemoy! Se duing: Blong Dem Yesus-a, imot go kuklue suep genang so gabe mo kebong. Yang, tandali mo nglong go, Ki Wali Iram ey blongdon ba so, Nemot go tasemlea idi no gabe susuing. Imot sogo nebut tapla way Iram Yesus lo mea pu. 35 Iram Yesus lo klum go sik sogo, sogo lo imot ya tong?
- Ide logo, koy wongdiding logo-a ya?
- Iseng kalong logo, kluong ku logo-a ya?
- Taut kua go logo-a ya?
- Waluk go ba no saysuk pui go logo-a ya?
- Kebong logo-a ya?
Kua. Iram Yesus lo klum go, naklay-naklay logo yakua tong-sing! 36 Yang! Wali Sam klaut ba nogo ngge kalik mo klik gabe,
“Kuno-woyno, Mot tang sogo so,
kebong genang kalik, imot gabe uwali.
Menay, tong genang kalik, imot gabe wawiklong.” (Mazmur 44:23)
37 Ngga seni so mo klik. No, ngge se duing dali: ngga naklay ba nogo, imot so klum go Iram Yesus, logo-a, don ey gabe susuing. 38-39 Yang, genam lo kekeng go: kukunan blo nogo, imot Ki Wali Iram lo klum go sik sogo yakua tong. Yangga: kebong-wali, donblong, kuasep naklay, nggeasui lelemoy go ngge, ku santugun go nogo naklay, ut blo logo naklay, nan ba logo naklay, sogo-sogo naklay logo, imot Ki Wali Iram lo klum go sik sogo, yakua tong-lak gabe. Imot go Woy Dem Iram Yesus ba no, klum ngga mo taling gemang!