7
Musa logo demu sik so ta mo plet-lak
1 Dem-debui, blong duoyap. Motnang, demu naklay senong go nogo, genam gabe pepen. Ngga sik so motnang mo senong dali: maning wali go sikabung seguong nogo-a, demu go don gemang. No, mo kebong go sikabung, don ngga lo tandali go yakua dok. 2 Yatrang ngge kalik gabe: kenin maning susuing go nogo, demu ngga go don lo senun klaya goso, kenin ey mo dok gemang. No, kenin kebong go nogo, kabung ngga kenin ey klaya so dok go, demu go don sik sogo mo plet-lak. 3 Esang, kenin maning susuing gono, sedue meno ey uwet go, kabung ngga lo kamea so gemang koklong. No, kenin kebong gono, sedue meno iti go, ngga nemot go ba so. Nemot lo sedue meno iti go, ngga kamea so kua uwet gemang.
4 Dem-debui, blong duoyap, se senong! Ngga kalik dali so motnang, walitap nogo gabe. Seni so, Musa lo nguok go demu nogo, motnang mo ‘kebong’ go kalik. Blong Dem kebong go tang so, demu go don sik sogo mo plet-lak gemang. Yang, sedue klayduo ‘Iram Yesus’ go saysuk ey klaya so motnang mo dok. Nemot kebong go sik so tandali mo nglong. Nemot go tete so motnang mo lemoy. Kebong go sik sogo, Nemot tandali nglong go, Ki Wali Iram nogo, imot go wali ngge, seni ey tagot genang. 5 Se duing! Banim nogo ngga, sikabung go duduing kuklue ey go-a imot gabe pupluok. Kuklue ngga, Musa logo demu taling go tang so imot ba nogo kangok so duduing ngga nang sogo gabe gugluep. Ngga tang sogo so, imot go wali ba sogo, kebong nang sogo ta kebali-a mo pupluok.
6 No, nggeasui go imot, Musa logo demu sono tandali kua dok gabe. Demu ngganemot nogo, imot mo kebong go kalik. Yang, imot so dok go demu ngganemot sik sogo, imot ta mo itak gabe. Imot nggeasui go, banim go kalik, demu no klik go, yakua tupduk keng dali gabe. No, nggeasui go, demening go tap Ki Wali Waglo lo taling go-a gabe ya pupluok.
Demutrui tang so, kuklue gabe senong
7 Nggeasui go sogo kalik, imot logo ya pu? Musa logo demutrui ngga tabat piam go tap? Kua, ngga kalik go yakua pu! Seni so, demutrui ngganemot logo so, kuklue konkebamling sono ngap go genam gabe senong. Yatrang ngge kalik gabe: sogo-sogo dabui ba nogo nagluim go ngga, piam? Genam kua senong. No, demutrui lo pu go tang so, genam gabe senong, “Sikabung meno go tete, kua nagluim!” a 8 Demu lo pu go ‘kudemat’. Ngga tang so, kuklue go tap dabui ba nogo gabe pupung. Yang, demutrui kua go sogo, dabui ide, lekluik eygo yakua tra. Ngga ey piam, kuklue konkebamling go don, kua pung dali.
9 Banim go, genam denok sogo, maning demutrui ey kua goso, genam go duduing tang so gabe uwali. No, demutrui senong gono, dia nogo kuklue gabe pung dali. 10 Ngga tang so genam go wali, mo kebong. Nemot-a, takuduen sik sogo, demutrui ngganemot lo wali iti genang so duing go, no esang, genam nogo idekeba kebong-a gabe tetaling. 11 Genam nogo, demutrui go tap senong golo, piam sogo-a, Kupiam golo gabe tetaling. No ngga waluk go, kebong genang tap gemang.
12 Yang, imot mo senong! Demutrui ngga, Ki Wali Iram sik sogo, nggano, Nemot go demu naklay, Nemot lo pen go ngga: kon kua, nemudi so, naklay suey seni gemang.
13 No, sogo kalik ne ya duing! Naklay suey seni go ngganemot lo, genam blo nogo kebong-a way so ya uweng? Ngga kalik kua. Ngga Kupiam lo semu go. Nemot go don logo so, demutrui suey go blo nogo, genam mo kebong. No, tap ngga seguong logo so, konkebamling go sam-sam dia no mea ikum. Ngga kalik Ki Wali Iram go demutrui suey go logo so, Kupiamgo seni, mea taling.
Way-way so, sikabung ba no sosok go
14 Yang! Imot mo senong: Musa logo demutrui ngga, Ki Wali Waglo go don logo so mea ngap. No, sedue don kua go, genam ngge gabe. Kuklue konkebamling pluok genang sogo, piam go don sono genam gabe mo itak. 15 Yang, genam tang sogo pupluok go ngga, at kua senong. Suey go-a semu genang so at lo duing go, no piam go ngga sono betep genang-a, way so ne pupluok-klong. 16-17 No se senong! Tasam suey go-a pupluok sogo, genam lo duing go, no piam go way so pung go-a, genam logo mea ne semu. Yang, genam tang golo ngga kua sesemu gemang. No, genam ba so gigit go, konkebamling go don lo, genam ta mlak go gemang pupluok. Musa logo demutrui, ngga seni so pen go, suey.
18 Ngga tang so, genam mo senong, “Seni so, saysuk go duduing nogo, waglo suey go kua.” Yang. Nemot-a, duduing suey go semu genang, genam ba sogo, gemang. No, ngganemot pupluok genang sogo, genam go don kua. 19 Suey go genam lo duing go ngga, pluok genang sogo genam logo, yakua. No, genam kua duing go, yakua pluok genang piam go-a way so ne sesemu. 20 Kua duing go tasam piam go ngga-a, genam lo pupluok go, ngga kalik go nemot go seni, “Tasam ngga, genam lo kua pupluok, no, konkebamling go don lo genam mlak go, gemang pupluok.”
21 Ngga sik so genam lo demutrui ngge ikum go: seni so, suey go-a semu so genam lo duing go, no, piam go-a genam ba nogo gabe pupung. 22 Yang, seni so. Ki Wali Iram go demu sono, at go dabui mo iwat gabe. 23 No, naklay pupluok go ba nogo, genam mo senong: seni so, demutrui suey go nogo, genam go kunala lo gabe iyang. No, tap meno piam go ngge-a, genam gabe ikum dali: esang, genam ba sogo tap piam go ngga, Ki Wali Iram lo iti go demu suey go ey, way-way so plesagui-a gabe pupung. Ngga tang sogo so, tap piam go genam ba so gigit go, nemot go don lo genam ta gabe mo mlak.
24-25 Genam go wali, ngge kalik so gabe, “Ki Wali Iram go demu no, genam go senongduduing lo gabe kekeng. No, sikabung waglodon kua goso, demu piam go don lo keduik go tang so, kuklue-a genam gabe sesemu.” Ngga sik so mea senong, “Genam ba sogo, piam dega seni gabe. Genam go saysuk ngge, kebong no uwawi go sik sogo, nando lo genam sesuoy genang sogo ya wawi?”
No, genam lo mea pu, “Ki Wali Iram suey. Taitisuey Ki Wali Iram. Nemot logo tang so, Iram Yesus ba no genam wali genang sogo, mea sesuoy. Taitisuey.”