6
Piam-a kekebong Blong Dem ey imot-a nglong go
1 Se duing! Nemot-a, kuklue piam konkebamling-a sikabung lo pupluok go, Ki Wali Iram logo klum-a katu ey gabe uweng. Ngga kalik go, sogo-a imot logo ya pu? “Ki Wali Iram go klum katu ey uweng genang, kuklue piam konkebamling-a senang so ya pupluok?” 2 Kua, ngga kalik kua! Blong Dem ey klaya so kebong go tang so, kuklue piam konkebamling sik sogo imot ngge mo plet-dak. Gabe usi-situgu, “Nago so mo, kuklue piam konkebamling-a duduen golo imot wali go?” 3 Se duing: dabui lo imot keng go, klaya so Blong Dem ey mo lemoy gabe. Ngga ey, bu degut go ku no, klaya so Blong Dem go kebong ey, imot mo lemoy dali. 4 Bu degut go tang so, Blong Dem ey mu no klaya so imot mo tuet. Ngga ey, Ki Wali Aya go blongdon lo tandali Blong Dem nglong go kalik, wali teguop inim ey imot mea koklong. 5 Yang! Blong Dem ey klaya goso lemoy go kebong go, Nemot nglong go ey kerlam so, imot gabe buong dali. 6 Imot se senong: di sono Blong Dem ey imot go wali buin tegak go, kuklue go don naklay seguoy go, mesuop go se waluk-sing. Walibuin go kebali imot pupluok genaning. Yang! Tandali, piam go koybutasemu so, imot kua gabe. 7 Nando mo kebong go, piam go don sik sogo ta mo plet-dak. Tandali piam go don logo yakua dok.
8 Ngge-a gabe kekeng: Blong Dem ey imot mo kebong go, Blong Dem dali ey imot gabe ya wali. 9 Imot mo senong: kebong go sik so Blong Dem nglong go ngga, tandali go Nemot yakua kebong. Nemot go wali nogo kebong go don mo kua gabe. 10 Kuklue go don pedueng genang so, Blong Dem-a mo kebong. Ngga, senang sogo nang so, kekayso da klaya mo pluok gemang. Nggeasui go Ki Wali Iram nogo so Iram Yesus gabe uwali.
11 Ayanang, mianang! Ngga tang sogo so ngge kalik se duing: kuklue nogo genam go wali mo kebong dali gabe! No, Blong Dem ba no, Ki Wali Iram nogo so ngengam ey wali genang-a genam gabe.
12 Yang! Mot go saysuk ngge, piam go don lo ta kua mlak. Dabui ba nogo piam lo duduen go-a kua tupduk! 13 Tandali piam go don no, motnang go tamasi itak go, taybat pluok genang so kua. No, ngge-a se duing: kebong sik sogo, wali sono mo pung go sedue, genam gabe. Ki Wali Iram lo iwat go seni eygo nemudi sogo-a genam mea pupluok. Nemot nogo so tamasi ngge naklay gabe itak-situgu. 14 Demutrui go don ba so motnang kua susuing. Ngga ey, piam go don lo motnang ta kua mlak. No, Ki Wali Iram go taitiklum ba no mo uwali gabe.
Ki Wali Iram go duduing-a pupluok go
15 Ayanang, mianang! Sogo kalik ya? Musa logo demutrui ba no tandali imot kua wali go, way so Ki Wali Iram go taitiklum ba so got-eton go, kuklue-a ya pluok-eton? Ngga kalik kua!
16 Yatrang ngge-a se duing: nando go saysuk, sedue klaya duo no, koybutasemu so iti go, sedue ngga go duduing seguong-a se pupluok! Ngga kalik dali, kuklue sesemu genang so piam go ta no itak go, mot mea waluk. Ki Wali Iram go duduing-a, tupduk go tang so, mot Ki Wali Iram logo mea yang, “Sedue ngge taitak go gabe.” 17 Yang, Ki Wali Iram no taitisuey gabe pupu! Banim nogo, motnang piam go koybutasemu. No, nggeasui go, motnang nogo walitap seni-a nguok gono, dabui lo gabe tupduk kekeng. 18 Piam go sik sogo taplet-dak go, Ki Wali Iram go koybutasemu so lemoy go, seni eygo tap-a motnang logo gabe pupluok.
19 Ayanang, mianang! Keda so mlak go suey so motnang senong genang, gabe pen-situgu. Banim go, taybat pupluok genang so, piam go ta sono motnang go wali dui ey mo itak. Ngga kalik dali, nggeasui go, motnang go wali dui ey Ki Wali Iram lo iwat go sono se itak! Senang so Ki Wali Iram go tap seni eygo nemudi sogo-a pupluok golo, motnang go wali teguop genang. 20 Kua kay! Piam go koybutasemu so motnang suing go nogo, Ki Wali Iram go duduing seni eygo logo kua dok gemang. 21 No, piam go koybutasemu sogo, sogo-a mo pung? Piam seguong! Ngga nogo, nggeasui go suongsut ey motnang gabe. Kebong sono go-a, motnang piam lo gemang wawi. 22 Nggeasui Ki Wali Iram no keng go tang so, piam go don sik so taitak go, Ki Wali Iram go koybutasemu so motnang mo lemoy. Ngga-a, seni kangok dega: dabui lo Ki Wali Iram lo iwat go-a mot logo gabe pupluok. Yang, motnang nogo kikiwali-a gabe ya pung. 23 Kuklue piam konkebamling pupluok go sik sogo, wali-a mea kebong. No, Ki Wali Iram go taiti-a, kikiwali inim gabe. Ngga, imot go Woy Dem Iram Yesus ba no mo lemoy.