5
Tandali Ki Wali Iram ey imot ngengam go
1 Yang! Nggeasui go, Ki Wali Iram go suongku no, dabui lo keng go tang so, seni eygo nemudi sogo so, imot mo wawi gabe. Woy Dem Iram Yesus lo Ki Wali Iram ey ngengam golo imot gabe uwali. 2 Dabui lo Yesus no keng gono wali inim yataput imot nogo mo tenuing. Ki Wali Iram go taitiklum ba so imot gabe. Taitiklum ngga, imot wali suing genang kutrui. Ngga ey, Ki Wali Iram go blong ba so suing genang duduing-a, imot logo mea bubung. Ngga naklay senong go, yakay ey mea pu, “Nenem yakay Ki Wali Iram sik sogo, imot ey gabe.”
3-4 Nggeasui go wali iseng eygo, nenem yakay ngga mea gigit dali. Yang:
- iseng tetra go sik so don mea kok;
- don kok go sik so, wegeng eygo mea ip;
- wegeng ey ip go sik sogo, duduing don eygo mea bubung. 5 Duduing ey senang so bubung go, imot dabui yakua lek. Seni so, imot go dabui ba nogo, imot no iti go Ki Wali Waglo logo so, Ki Wali Iram go gualaklum mo tram gabe.
6 Gualaklum ngga, ngge kalik gabe tram: don malo go ku no Blong Dem tang go-a imot nogo so mo kebong. Yang! Imot Ki Wali Iram nogo kua iwat go sikabung nogo so. 7 Ki Wali Iram go gualaklum katu ey, sikabung lo klum go ey kua kerlam. Se duing: seni eygo, nemudi sogo sikabung nogo, sedue meno tebadali go yakua kebong. Andua suey go nogo so kebong genang, klay-klay mea ip go wa dali. 8 No, Ki Wali Iram lo duing go, sikabung logo ey kua kerlam. Taybat-a imot maning sesemu gono, Blong Dem-a imot nogo so mo kebong. Yang! Ki Wali Iram go gualaklum katu ey imot no mo taling.
9 Nggeasui go, Blong Dem go kin pi go logo so, piam konkebamling suep go, seni eygo so pu go, imot ta gabe itak. Seni so, Ki Wali Iram go kisebui sik sogo, imot Blong Dem lo mea sesuoy. 10 Se duing! Imot maning Ki Wali Iram go koy saula sogo no, Danon-a kebong golo, Ki Wali Iram ey ngengam go, waliblong ey Danon nglong go logo so, imot naklay seni gabe ya sesuoy.
11 Ngga ey nggeasui go, yakay ey Ki Wali Iram no tasuey kangok so gabe iti-eton. Woy Dem Yesus logo tang so, Ki Wali Iram ey tandali ta keduik go, wali mo ngengam gabe.
Adam ey mo kebong Blong Dem ey gabe wali
12 Se duing! Kukunan nogo kuklue, sedue klaya logo so mo degut. Ngga tang so, kebong mo pung. Ngga ey, sikabung naklay kuklue piam konkebamling-a pupluok go, kebong dayap golo gabe kenok-sing.
13 Se senong! Kukunan blo nogo, maning Musa logo demutrui kua iti gono, kuklue piam konkebamling-a, banim gabe pung. No, kuklue ngga neyboy genang, yakua! Kuklue bat kebuo genang demutrui maning kua iti go nogo. 14 No, blong dem Adam got-akam go sik so, e… Musa got-angam go nogo, sikabung naklay kuklue-a gemang pupluok. Nemot-a nemotnang go kuklue, blong dem Adam lo pluok go kuklue dega kalik kua. No, yam so nemotnang kebong lo mo mlak dali, sang.
Ngge se senong! Blong dem Adam go wali lo, Blong Dem Yesus sono taling go gemang. 15 No, taitiklum Ki Wali Iram lo taling go-a, naklay katu dega ey, blong dem Adam lo pluok go kuklue ey kua kerlam. Klayduo go kuklue logo tang so, sikabung naklay mo kebong. No, sikabung naklay nogo taitiklum seni dega eygo, Blong Dem Yesus klayaduo dali logo so, Ki Wali Iram gabe iti.
16 Yang! Ki Wali Iram lo taitiklum iti go seni, naklay katu dega ey, blong dem Adam go kuklue go ey kua kerlam gabe. Se duing! Adam lo kuklue goso mo pu, “Mot mo piam, kisebui mea iti.” No, Blong Dem Yesus lo taitiklum-a taling go sik so, Ki Wali Iram lo gabe pu, “Kisebui yakua iti, idekeba mo pat-dak go sikabung motnang gabe.” Ngga, Ki Wali Iram go taitiklum katu eygo dega kekayso taling golo mo lemoy.
17 Se duing! Banim go kukunan blo naklay kebong go don dayap golo ta mo mlak. Ngga, sedue klaya blong dem Adam, piam ba no pui go tang so. No, Ki Wali Iram go klum katu eygo lo sikabung taplet-dak go, ngge se senong, “Sedue Klayaduo, Blong Dem Yesus logo tang so, kikiwali ba nogo, wengkabui sogo imot lo ta mea mlak dali.”
18-19 Ayanang, mianang! Tandali i go sogo pen go:
- Sedue klaya go kuklue logo tang so, kukunan naklay no kisebui mo iti.
- Sedue klayduo lo seni eygo pluok go tang so, Ki Wali Iram dabui iwat go, gabe pu, “Sikabung naklay, konkebamling sik sogo, ta mo plet-dak gabe! Wali inim iti genang so gabe sesuoy.”
- Sedue klayduo blong dem Adam kua kengduk go tang so sikabung naklay kuklue ey goso, mo lemoy.
- Sedue klayduo dali, Ki Wali Iram go duduing no Yesus keng golo, sikabung Ki Wali Iram go suongku no, seni eygo, nemudi sogo mea lemoy.
20 Ku meno no, wali demutrui Ki Wali Iram lo mo iti. Dia sono konkebamling-a ngap go, kuklue-a miam pupluok go, way so klum-a katu ey Ki Wali Iram lo gabe uweng.
21 Kuklue lo mlak go tang so, kebong-a mo pung gemang. No, seni eygo, nemudi sogo tap pung go tang so, kikiwali-a iti genang, taitiklum katu ey golo gabe ya mlak. Yang! Imot go Woy Dem, Iram Yesus ba no ngga naklay mo iti gabe.