12
Ki Wali Iram nogo so uwali go
1 Yang! Seni so, imot nogo Ki Wali Iram go gualaklum gabe tetaling. Ngganemot sogo so, dabui lo gabe pu-situgu, “Nemot go kebali pupluok genang so, Nemot go ta ba sono, yakay ey motnang go saysuk-a se itak! Ngga ey, taiti teguop goso, Nemot go dabui nogo ey iwat genang, wali ngge mea lemoy. Ngga ey, Ki Wali Iram no seni eygo-a, motnang ta gabe kokong.” 2 Kukunan go duduing pluok genang-a, motnang kua keng. No, inim so iwot go, suey so mot go walitap lemoy genang-a, dabuiduduing ey se! Ngga ey, motnang nogo Ki Wali Iram go duduing mlak genang-a se! Yangga: suey go-a, dabui no but go-a, teguop go-a.
3 Se senong: taitiklum Ki Wali Iram lo iti go tang so, Iram Yesus go tamot sogo genam gabe. Ngga tang so, nebutmang gabe king-situgu: blo dega sono mot go dabui-a kua iti! No, motnang go wali kunala kalong ey yay suing genang-a, se usey! Ngge kalik se duing: dabui lo keng gono, wali ba nogo taitiwalipega, mottang-mottang nogo so Ki Wali Iram lo wasey go-a, se i-ikum. 4 Yang! Imot go saysuk ngge, tamasi mata so gabe. No, nemotgo-nemotgo kebali ey gemang. 5 Nemot-a, imot blong duoyap miam dega eygo, saysuk-a, Iram Yesus temoy nogo so, klaya gabe. Ngga ey, klay-klay, way-way so tamasi gabe kluing-sing.
6-8 Kebali pupluok genang walipega, banom-banom gabe. Taitiklum tang so, imot go taitiwalipega Ki Wali Iram lo wasey go gabe.
Mot nogo so iti go taitiwalipega se senong:
- Ki Wali Iram logo senong ey pepen genang,
dabui iti go keng golo se penklong.
- Sikabung meno tebok genang, dabui lo sikabung temu se tebok.
- Sikabung temu nguok genang, seni-seni so se nguok.
- Sikabung meno don kok, dabui lo sikabung meno don se kok!
- Sikabung meno ey wasey genang, nemudi so se pluok!
- Sikabung tap taling genang, don ey dabui lo wengkabui so se suing.
- Sikabung guala-a taling genang, yakay ey se taling.
Sikabung meno nogo klum
9 Yang! Klum-a nemudi so se tetaling! Piam go-a ngga sono se yat. Suey go-a waysagi ey se mlak. 10 Way-way klum ey, anduasiyap so dabui lo motnang se suing! Banim temu, andua no ta kong genang-a, se usey! 11 Woy Dem go kebali, se pupluok! Ki Wali Waglo go don lo dabui yakay ey se, yakay ngga kua kenip! 12 Duduingbubung go tang so yakay ey se. Ide ey tra go gigling ey motnang logo se! Senang so dewi-a se keklak. 13 Blong duoyap temu nogo, sogo-sogo se tetebok. Glop pung go, yap ba nogo dabui lo se wawi go degut. 14 Motnang so truik go plesi nogo, Ki Wali Iram go sui nogo suey-a se wadong. Nebut piam go-a kua pu. 15 Yakay eygo, yakay-a se pla dali. Genuing so suing go eygo, genuing-a se keng dali! 16 Ngengam ey klay gono se susuing! Blo sono dabui-a kua iti, no kunala temoy no, ku sono se suing. Naklay senong go kalik kua taling, sikabung meno go kunala ey se mlak!
17 Taybat-a mot no sikabung lo semu go, way taybat dali lo kua taling! No, sikabung naklay no suey go-a se usey. 18 Mot don eygo, sikabung temu ey ngengam genang-a, don ey motnang se u-usey!
19-20 Ayanang, mianang! Mot tang so taybat way taling genang, kua duing! No, itak go idekeba way, Ki Wali Iram lo na taling. Yang, Wali Sam klaut ba nogo gabe mo klik,
“Ki Wali Iram lo pu go,
‘Idekeba way taling genang,
Genam logo so mea!’ a
No,
‘Nago no plesi ten tra go, ten-a nase iti;
bunuo sogo, bu-a nase gluik go iti.
Ngga kalik semu go tang so,
nemot suongsut mea tra.’ ” b
21 Piam golo mot go wali-a don kua goso lemoy genaning. No, piam don kua genang-a, suey golo don ey se suing!