12
Yakobus but go kebong Petrus-a gemang mlak
1 Yakena Antiokia so Paulus, Barnabas ey got-kletenawon gono, blong duoyap temu deguena Herodes lo gemang truik-nawon. 2 Yakobus, Yohanes go ntaton go blindon, Herodes lo pu goso tengang lo gemang tong. 3 Ngga ikum go, Yahudi go iram tegay yakay kangok. Herodes, nemotnang go yakay ikum gono, nemot lo pu goso Petrus gemang mlak dali. Ngga, Walop tepung seguong-a duik go dam genang Paska ku no lemoy go. 4 Herodes lo duing go, “Walop Paska yam gono, sikabung mata sogo nesip sono idekeba iti genang so Petrus wawi go mea pung.” Ngganemot so, boy ba sono Petrus namboy gemang betep. Petrus yay sogo plesedue, yatap da namon-namon yam so mo ketok. Yatap klaya, plesedue namon-namon dali lo yay gemang suing.
5 No, boy ba sono Petrus betep go gono, blong duoyap-a klay gono yaluim go, use-wadikua go dewi-a Ki Wali Iram no dabui lo, gemang pu-netenawon.
Boy ba sik so tandali Petrus wawi go
6 Wadi go Petrus neyboy genang ku blong so se, plesedue namon boy ba so ta tegan Petrus ey dok go nesip lo Petrus gemang srek-nawon. Plesedue temu-a yatap yay so dia no susuing. 7 Seni so! Woy ngganemot nogo Petrus mit no boy ba no, Kiwali tamot klaya, pung so gemang pung. Kekayso boy ba mablong so nemot go blong lo se itak. Petrus Kiwali tamot lo senglok gono gemang buong-nawon. Ngga ey, ngge kalik Petrus sono gemang we-tenawon, “Kedaso mot ip-a!” 8 Ngga ey, Petrus go ta sik sogo lante tegan kaysegong so sok go gemang net. Ngga ey, Kiwali tamot lo pu go, “Masi suk kok go, kuibey keduik-a! Amka kangok go kok go, genam sono mot-a se keng!” 9 Nggano, Kiwali tamot no Petrus keng go dia sono gemang pung. No, Petrus lo duing go, tasam ngge naklay sedi so gabe. Nemot kua senong ngge seni so lelemoy go. 10 Nemotnamon, yatap yay so susuing go plesedue klaya tete itak go, nggano namon tete itak go, ngga ey yataput besi kangok go mit no nemotnamon gemang pung. Yakena tap nogo yataput ngga, nemot tang so gemang tenuing. Nemotnamon pung go tap klaya golo koklong go, Petrus mit sik sogo Kiwali tamot kaysegong gemang nega. 11 Nggano, Petrus gemang senong, “Dianenguon so genam seni so ba!” Nggano, nemot lo pen go, “Ye! Nggeasui Herodes go ta sik sogo Kiwali tamot Woy Dem lo mot-dak go weng golo genam taitak genang. Sikabung Yahudi logo iseng, genam mea kua lek.”
12 Tasam ngga senong gono, Maria debui, Yohanes go unen Maria go yap sono Petrus gemang nawon. Ngga Markus so usi dali go Yohanes sikabung mata so yaluim go ngga so dewi pu-netenawon. 13 Yataput no dia idi sik so Petrus lo tegak-tenawon gono, kebali kabung meno, nemot go sui: Lode debui, yatap tenuing so gemang kuntun. 14 Petrus go nebut tup go yakay-a kangok so gemang tra-natun. No, yap ba no tandali gemang pling-bitun, yataput-a kua tenuing ne. Nggano, ngge kalik sikabung no gemang pen-anatun, “Dia so Petrus ngga go!” 15 Way so sikabung lo waydang go, “Mot puplu to?” No, tandali don ey Lode lo gemang pu-natun, “Petrus seni so ngga go se!” Ngga kalik go Lode pen goso sikabung lo duing go, “Ye! Ngga Petrus go dabuilap gemang!” 16 Ngga ey, yataput no tandali kangok so Petrus tegak-tenawon, yatap nemotnang lo gemang tenuing-nenawon. Petrus ikum go nemotnang ey gemang negap-netenawon. 17 No, ta-a Petrus lo gemang taling-nawon, yakot so ya! Ngga ey, boy ba sik so Woy Wali Iram lo wawi go pung go gemang pen-anawon. Ngga ey, gemang we-awon, “Yakobus ey blong duoyap temu eygo sono tasam ngge naklay se pen klong.” Sip meno no Petrus gemang klong.
18 Wadikua go plesedue saduibong ey gemang pling-nenawon. Ngga ey way-way so kangok so nebut gemang sok-netenawon, “Sogo kalik so Petrus mo kap?” 19 Nggano, Herodes lo gemang pu, “Petrus susuing go sip se uwet!” No, Petrus kua ikum-nesrenawon. Ngga ey, plesedue yay sogo-a neyboy go Herodes lo but go se kebong.
Nan Yudea sik sogo Herodes kap go, nan Samaria yakena Kaysarea nemot go sip dali no gemang suing.
Herodes dega kebong go
20 Ku meno no yakena Tirus ey Sidon ey gono, kangok so deguena Herodes sagui mo kong. Se senong: Yakena Tirus, yakena Sidon nogo ten naklay Herodes go nan Samaria sik so i-iti go. Tandali go ten Herodes lo ya kua iti eygo suali so, Herodes ey tasuey semu genang so tamot-tamot nemotnang lo mot-dak go gemang klong. Kaysarea no pung go, banim no deguena go tegay Blastus dem ey nebut suey so gemang pen. 21 Blastus go nebut Herodes tup gono, ku klaya sikabung nogo nebutpen genang so gemang pu-nenawon. Ku ngganemot no, srem ey deguena Herodes kok go, iramdemu blo no suing gono, nebut so nemotnang no gemang pepen. Yam so nebutpen gono, blo sono nemot go sui-a iway ibe lo gemang iti-netenawon, 22 “Nebutpen ngge suey dato! Sikabung go nebut kua. Ngga ida logo nebut gabe.” 23 Ki Wali Iram so wayang tang so, Kiwali tamot lo but go, saysuk naklay su lo dam go kekayso gemang kebong-dapnawon. Esang!
24 Yagui ngganemot nogo, Ki Walinebut, walitap sikabung mata sogo no naklay mo pen klong. Sikabung miam dega ey dabui iti go gemang keng-lak.
Saula-saula nogo so Barnabas ey Paulus ey Ki Wali Waglo lo mot-dak go
25 Yakena Antiokia sik sogo taiti blong duoyap Yerusalem sogo no suey so Barnabas, Saulus ey mo iti go klong. Ngga ey, Antiokia no tandali nemotnamon, gemang weng. Yohanes Markus ey gemang wawi dali.