11
Yerusalem sogo blong duoyap no Wali Waglo li go pen go
1 Yakena Kaysarea sogo saula meno blo no Ki Wali Waglo li go, Ngga ey, nan Yudea sogo tamot-tamot, blong duoyap temu gemang tup. 2 Yakena Yerusalem no tandali Petrus pung gono, ngge kalik nemotnang lo gemang pen-nenawon, 3 “Kay! Saula meno Musa logo demutrui no kua keng go ey klay gono mot mo suing. Nggano, klay gono nemotnang ey ten mo dam. Ngga, kudumat, piam kangok go. Sogo kalik so ya?” 4 Ngga tup go nogo, yakena Kaysarea no lemoy go, walong bata so Petrus lo gemang pen-anawon, 5 “Ku yakena Yope so dewi so pupu gono, ngge kalik genam gabe ikum, ‘Ut ba sik so, amkasum ba no, tegan lo tebuem no-tebuem no dok go, genam mit sono leguit go gemang li. 6 Ngga ey, ngge-a amkasum ngga ba no genam lo gemang ikum: menay bumeno-bumeno miam dega ey. Lema, wi, dasi, nebo, dedam go, kagot sogo naklay. 7 Nggano, ngge kalik go nebut genam lo gemang tup, ‘Petrus, mot ip-a! Menay ngge iti go tong gono, se dam!’ 8 Way so genam lo tenguo go, ‘Kua, Woy Dem! Ngga kudemat! Demutrui no pu go, menay ngge kagot sogo, maning genam kua dedam.’
9 Ngga ey, blo sik so tandali genam no pu go, ‘Teguop so Ki Wali Iram lo mo taling go, mot logo kua tenguo!’ 10 Da nangglik yam so nebut ngga pu gono, amkasum menay eygo naklay tandali ut blo sono gemang klak.
11 Woy ngganemot nogo, sedue nangglik yakena Kaysarea sik sogo, genam susuing go yap no wawi so gemang pung. 12 Ki Wali Waglo lo pu go, ‘Saula meno nogo suali kua goso, yakena Kaysarea no nemotnang nangglik ey mot se klong.’ Ngganemot nogo, yakena Kaysarea no andua taidisoklaya yam sogo ey, genam klong go, sedue ngganemot go yap ba no gemang degut. 13 Nggano pung gono, atnang no nemot lo pen go, nemot go yap ba no Kiwali tamot pung go mo ikum. Nemot lo pu go, ‘Tamot mot-dak go, yakena Yope no se klong! Ngga sogo sedue meno gemang, nemot go sui: Simon. Petrus so usi dali go. Nemot pu go se weng! 14 Se senong: mot ey yap tenglam eygo, Simon Petrus lo pen go deguo lo mea sesuoy.’
15 Korneliusnang no, maning walinebut so genam lo pepen, kekayso nemotnang blo no Ki Wali Waglo-a gemang gualing. Banim no imot blo no li go kalik dali. 16 Ku ngganemot no, Woy Dem lo pu-yom go ngge, tandali genam lo mo duing, ‘Bu seguong logo-a sikabung Yohanes gabe tutui. No, motnang nogo, Ki Wali Waglo lo tui go mea tram-kelo.’ 17 Se duing! Woy Dem Yesus no dabui iti go keng go ku nogo, saula meno sik sogo sikabung no, imot no iti go kalik, Wali Waglo Ki Wali Iram lo mo iti. Ngga seni ey lemoy go, genam ngge nando? Ki Wali Iram genam lo ya tenguo? Esang! Ngga kalik go ya kua.”
18 Nan Yahudi sogo blong duoyap Petrus lo pen go nebut tup gono, tandali dabui kua tra. Ki Wali Iram nogo takong-a nemotnang naklay klak go, gemang pu-nenawon, “Saula meno teguey go, wali inim wawi genang sogo Ki Wali Iram lo mo wawi dali gabe.”
Antiokia sikabung Yesus sono dabui iti go keng go
19-20 Se senong: Stepanus but go kebong go ku sik so Yerusalem sogo blong duoyap no idekeba mo taling. Ngga tang so, nggesono-nggasono, banom-banom so nemotnang mo suep-lak. Temu nan Penisia no, temu nantebot Siplus no, temu nan Siria go yakena Antiokia no, kuek go mo pluep-anatun. Nan Antiokia no pung golo, sikabung tang Yahudi seguong no Yesus go walitap gemang nguok-nenawon. No, suali so kuek go blong duoyap temu gemang dali. Nemot-a sikabung Yahudi dali, nemot go tang nan meno sik so pung go. Nan-nan ngga: Siplus nggano Kirene. Yerusalem sik so kuek go Yunani nebut seguong so gemang pepen. Yakena Antiokia no pung gono, saula meno dali no Yunani nebut so, Woy Dem Yesus go deguo teguop, gemang nguok-netenawon dali. 21 Se senong: wali kebali nemotnang lo pupluok gono suey so Woy Dem lo gemang tetebok. Ngganemot no, saula meno sik sogo sikabung mata so, Woy Dem no dabui iti go gemang keng-nenawon.
22 Tasam ngga tup go, suey so senong genang so, yakena Antiokia no Barnabas dem-a Yerusalem sogo blong duoyap lo mot-dak go, gemang klong. 23 Yakena Antiokia no Barnabas pung gono, ngge kalik gemang ikum-nawon: saula Yahudi kua go sikabung no taitiklum, Ki Wali Iram lo mo taling. Ngga senong go, yakay kangok so Barnabas gemang tra. Yang! Nemotnang no, nebut don ey Barnabas lo pen-nawon, Woy Dem no tupduk go, suey so nemotnang se keng. 24 Barnabas ngge, sedue suey dato go seni. Woy Dem no dabui naklay iti go gemang kekeng. Ki Wali Waglo lo mo tram.
Se senong: yakena Antiokia sogo sikabung mata sogo no walitap taling go, Woy Dem Yesus no dabui iti go gemang keng.
25 Yakena Antiokia sik sogo, dun idi sogo yakena meno dali so gemang, nemot go sui: Tarsus. Saulus go tang, yakena Tarsus sik sogo. Ngganemot no, Antiokia sik so Saulus wet so Tarsus no, Barnabas gemang klong. 26 Yakena Tarsus no pung gono, Saulus ey tegu-klenawon go, Saulus wawi go, yakena Antiokia no Barnabas ey gemang kenawon. Antiokia no pung gono, yagui klaya yam no, blong duoyap ey klay gono gemang iyaluim. Seni so, sikabung mata sogo no, suey so Ki Wali Iram go tap gemang nguok-kletenawon.
Se senong: yakena Antiokia no, keduong sogo, blong duoyap Iram Yesus go blung sogo gemang pu.
27 Ku ngganemot nogo Yerusalem sik sogo Ki Wali Iram lo taling go senong eygo sedue-sedue, Antiokia sogo blong duoyap mit no gemang weng. 28 Nemotnang sik sogo klaya duo gemang. Nemot go sui, Agabus. Nemot, Ki Wali Waglo lo taling go, ngge kalik, gemang pen-awon, “Ku santugun go, kukunan sikabung naklay ten kua go ku mea pung-ayun!” Yang, Agabus lo pen go nebut ngga, seni so mo lemoy. Se senong: nan Roma go Kaysar Klaudius, wengkabui kangok golo tamlak gono, ngga gemang lemoy. 29 No, ku ngganemot maning kua lemoy gono, Antiokia sik sogo blong duoyap, nebut gemang degut. Ngga ey ngge kalik mo pu, “Nemot go gemang go sik so, duoy yaluim go, blong duoyap nan Yudea sogo no, suey so tebok genang, idok go se klong!” 30 Duoy ngge naklay yaluim gono, Barnabas ey Saulus eygo-a nemotnang lo mot-dak go, yakena Yerusalem sogo blong duoyap go woy-woy no, taiti ngga idok go gemang klong.