10
Ambleduo Kornelius ey Petrus tegu go
1-2 Nan Italia sik sogo ambleduo plewengkabui Kornelius, yakena Kaysarea so gemang. Nemot-a saula meno, sedue Yahudi kua go, teguop eygo nemot gabe. Nemot go yaptenglam ey Ki Wali Iram nogo suali ey, kangok so gemang tetra. Taut kua go sikabung Yahudi nogo, mata so mo tebok. Nggano, kuno-woyno dewi Ki Wali Iram sono gemang keklak dali.
3 Ku meno so use woy nangglik nogo, Kornelius go yap ba no Kiwali tamot sedi sogo kalik degut go, gemang pu-tenawon, “Kornelius dem! Ki Wali Iram lo mot-dak goso genam weng go.” 4 Kiwali tamot ikum go, suali sogo Kornelius lo gemang pu-biwon, “Aya! Ngge no mot sogo so weng?” Way so Kiwali tamot lo pu go, “Mot go dewi, tasuey semu go naklay suey so Ki Wali Iram lo mo ikum. Mot nogo Nemot go duduing gemang! 5 Nggeasui go, yakena Yope sono tamot-tamot-a mot-dak go se klong! Sedue meno, Simon, Petrus so usi go, wawi go mot mit sono se weng! 6 Nggeasui go, taut bumeno-bumeno menay suk lo sesebut go Simon go yap so nemot gemang. Nemot go yap, beap ketang idi sono gemang!” 7 Tandali Kiwali tamot klong gono, Kornelius go tamot namon, plesedue klaya usi go gemang weng. Se senong: plesedue ngga Ki Wali Iram no takokong dali go. 8 Kiwali tamot go deguo nemot nangglik no pen go, yakena Yope sono mot-dak go gemang nenawon.
9 Nenaton go, ngga utep go yakena Yope no se dedagu. Woy nesip nogo yap blo da no, dewi pu so, Petrus gemang klak-biwon. 10 Dewi so pupu gono Petrus ten gemang tra-bawon. Nemot nogo ten maning susuik. No, dewi ba no kunala Ki Wali Iram sik sogo Petrus no king go, nemu iwot go gemang ikum-biwon: 11 Ut tegek gono, amkasum tebuem no-tebuem no tegan lo dok go, ut blo sik so rli go, e... Petrus go dabui ba no gemang tui. 12 Amkasum ngga ba sogo, menay meno-meno miam ey. Yangga, wi, dasi, lema, uduo, nebo, dedam go, kagot sogo. 13 Ngga ey, ngge kalik pu go gemang tup-nawon, “Petrus! Menay ngge tong go nase dam-nalo!” 14 Nebut ngga tup gono, ngge kalik gemang tenguo-biwon, “Woy Dem! Demutrui no pu go, ngge kudemat! Ngge kagot sogo menay, genam maning kua dedam!” 15 No, tandali Petrus sono nebut ngga lo pu go, “Teguop so Ki Wali Iram lo taling go, mot logo kua tenguo!” 16 Nebut ngga, da nangglik yam so pu gono, menay eygo amkasum tandali ut sono gemang klak.
17 Yam so nega gono, sedi so ikum go seni so Petrus gemang duduing. Maning duduing gono, Kornelius lo mot-dak go sedue nangglik yakena no pluep go, usi-nekunton go, Simon go yap ikum go, seboy so got-netenawon. 18 Ngga ey, gemang usi, “Yap ngge sogo glop Petrus, gemang?” 19 Dewi ba no ikum go kunala so maning Petrus duduing gono, Ki Wali Waglo lo gemang pu, “Tup-a, Simon! Mot ey tegu sogo, sedue nangglik ngga go. 20 Li-silo go, duduing kua goso, nemotnang sono nase keng-nalo! Nemotnang ngga, Genam lo mot-dak goso weng go gemang.”
21 Seboy sono li go, sedue nangglik so Petrus lo gemang pu-tenawon, “Simon Petrus, Genam ngge lo! Genam so uwet-ketogoy? Sogo kalik?” 22 Way so nemotnang lo pu go, “Wengkabui lo mot-dak goso genamnang weng go. Wengkabui go sui Kornelius, Roma go plewengkabui. Nemot, Ki Wali Iram no ta gemang kokong go saula meno duo. Nemudi sogo sedue nemot gemang. Ngga tang so, suey so nemot go sui sikabung Yahudi naklay lo pupu. Nemot sono Kiwali tamot lo mot-dak go, Petrus usi go, mot go yap sono se weng. Ngge ey, Woy Dem sogo deguo Petrus go lom lo pen go, tup genang.” 23 Nebut ngga tup gono, ngga lo srek genang so nemotnang Petrus lo wawi go gemang degut.
Ngga utep go, kerlam so nemotnang ey Petrus gemang klong. Nggano, ngga sogo blong duoyap temu Petrus ey keng go, gemang klong dali. 24 Ngga utep go yakena Kaysarea no pung go, Petrus so Kornelius bung-tenawon. Seni so, yap tenglam, andua naklay deguo wet go, nemot mit no mo yaluim-sing. 25 Yap no Petrus degut sogo no, takong genang so, Kornelius unuik go susubuwit so gemang. 26 No, blo sono ta lo Kornelius mlak go Petrus lo gemang we-tenawon, “Ngga kalik mot kua semu ey! Genam ngge, sedue dali be.” 27 Ngga temu ey, yap ba no degut go, sikabung mata so pluep go gemang ikum-nawon. 28 Ngga ey, ngge kalik nemotnang no Petrus lo gemang pen-tenawon, “Motnang naklay suey so mo senong: Saula meno ey klay go nogo Yahudi sikabung ya kua suing. Ngga sedue Yahudi go demu, klay gono suing genang ngga kudemat. No, ngge kalik genam no Ki Wali Iram lo mo taling: sikabung naklay eygo imot mea tegu. Sikabung meno kon ey, nggano meno-a kon kua go sogo teguopey kua pu! No, imot naklay kerlam seguong. 29 Ngganemot sogo so, inenga go genam mo wawi go weng gabe. Moy sogo nebut genam logo kua pu-srenayu. Nggeasui go genam sono se pen! Sogo-sogo so, genam usi mo weng?”
30 Petrus go nebut tup gono, Kornelius lo gemang pen-anawon, “Ku nangglik nayum gono, woy nangglik use go, dewi so yap ba no genam pupu gono, sedue amka blong eygo genam mit no gemang ip. 31 Ngge kalik, genam so nemot lo gemang pen, ‘Mot go dewi mo tup, nggano mot go tasam suey go, sikabung taut kua gono iti go naklay Ki Wali Iram mo ikum.’ 32 Ngga ey, Nemot lo pu go, ‘Nggeasui go tamot-tamot mot-dak go yakena Yope no se klong! Ngga sogo sedue meno, nemot go sui Simon, Petrus so usi dali go gemang. Simon meno go yap so glop so gemang. Taut meno-meno so menay suk lo sesebut go Simon go yap beap ketang idi so gemang. Ngga sik so Petrus se usi, Kornelius mit sono mot se weng.’ 33 Nebut ngga tup gono, naklay ngga genam lo mo keng go semu. Ngge suey, mot ngge no mo weng. Ki Wali Iram go nemu ku no, ngge sogo atnang naklay mo yaluim-etu gabe. Nggano, Ki Wali Iram lo taling go deguo, atnang nogo mot lo se pen-alo! Genamnang tup sogo!”
Ngga Kornelius lo pen go nebut
Kornelius go yap ba no Petrus lo pen go
34 Ku ngganemot no, ngge kalik Kornelius go yap ba sogo sikabung no, Petrus lo gemang pen-anawon, “Ayanang, mianang! Nggeasui go, seni-seni so genam mo senong gabe! Ki Wali Iram go suongku nogo sikabung naklay mo kerlam. 35 Saula-saula sik sogo, nando tupduk go Ki Wali Iram no kekeng go, Nemot lo iwat go-a pupluok go, kangok so dabuiklum sikabung ngga nogo Ki Wali Iram lo mea duing.
36 Ayanang, mianang! Motnang mo senong dali, deguo teguop Ki Wali Iram logo, sikabung Israel ngengam genang so mo pen weng. Yangga, deguo teguop ngganemot taling genang so Blong Dem Yesus, Ki Wali Iram lo mot-dak go weng. sikabung naklay go Woy Dem, Iram Yesus-a gabe. 37 Ayanang, mianang! Motnang mo senong: banim no Yohanes Busotuigo golo sikabung go piam konkebamling suep genang, bu degut so gemang pu. Ku ngganemot sik so, sogo kalik nan Galilea nogo, nan Yudea no lemoy go motnang mo senong. 38 Yakena Nasaret sik sogo Yesus, Wali Waglo ey Ki Wali Iram lo tui go, Nemot go don lo yam so mo damoy. Ngga ey yakena-yakena naklay no tasam suey-suey go Nemot lo mo taling. Yang! Kupiamgo don lo dok go, Yesus lo mo suey-sing. Seni so, Yesus ey klay goso Ki Wali Iram mo suing. 39 Se senong: nan Israel naklay, yakena Yerusalem no Yesus lo pupluok go, Nemot go tamot-tamot imot mo ikum. No, Yesus, Yahudi go iram-tegay lo di no tegak go, but go mo kebong. 40 No, ku nangglik tete no, Yesus Ki Wali Iram lo mo nglong. Yang! Ki Wali Iram lo pu goso, sikabung nogo Nemot go saysuk mo taling-sing. 41 Sikabung naklay nogo kua, no banim Ki Wali Iram lo kuoy go seguong nogo-a mo taling. Ibe sono se pepen klong, Yesus kebong go mo nglong gabe. Seni so, tandali nglong go nogo, ten-bu klay gono atnang ey mo dam. 42-43 Ngga ey atnang no mot-dak go, Ki Wali Iram sik sogo walitap, sikabung naklay no se pepen klong! Walitap ngganemot, ngge kalik gabe: sikabung neyboy genang Iram so, Yesus Ki Wali Iram lo mo temuit. Sesuoy Iram, Nemot-a gabe! Nemot no dabui iti go kekeng go sikabung go kuklue piam konkebamling Yesus go sui logo so mea suep. Banim no, ngga Wali Sam klaut ba no ibe no nabi-nabi lo mo pen-ngam.”
Ngga Petrus lo pen go nebut!
Sikabung Yahudi seguong nogo so Ki Wali Waglo kua
44 Nebut so maning pepen gono, Ki Wali Iram sik sogo Wali Waglo li go, Petrus go nebut so tutup go sikabung blo no gemang gualing-anatun. 45 Petrus mit no klong go Yahudi saula sik sogo blong duoyap pluep go, Wali Waglo taiti so saula meno sono Ki Wali Iram lo pi go ikum go, saduibong ey gemang pling. Seni so walipega lo nebut iwot go pepen go, Ki Wali Iram go sui iway blo sono gemang iti-nenawon. 46 Ngga ey sikabung ngga, nebut iwot go, nebut meno-meno so pen go, Ki Wali Iram go sui iway ey blo no iti go, nemotnang gemang tup-netenawon. No, nemotnang ikum gono, ngge kalik Petrus lo gemang pen-anawon, 47 “Ikum-a! Atnang ey saula meno mo kerlam, Ki Wali Waglo mo iti gabe. Ngga kalik go, sogo temoy no bu nemotnang degut genang, ne ya tenguo? Ya kua tenguo gabe!” 48 Ngga ey, amble saula ngga naklay, Iram Yesus go sui no, bu degut genang so Petrus lo gemang pu. Tasam ngga naklay lemoy go nogo, Petrus sono Korneliusnang lo gemang usi-nenawon, “Aya! Ku walong dato so ngge no mot se got-lo!”