9
Iwot-dak go Yesus seguong-a Saulus keng go
1-2 Seni so, ku ngganemot nogo, Saulus go dabui ba nogo, nebo nok li go kalik sip nogo kua suing. Woy Dem no keng go sikabung naklay, tang ey buin genang so, naklay mo iwat. Nggano, sam iti so, Yahudi go taitisopupuit go trang dega no gemang-nawon. Sam ngganemot ey, yakena Damsik nan Siria sogo Yahudi go dewi yap naklay go woy-woy no, klong genang so. Ngga tang so, yakena Damsik sogo, Yesus logo tap inim no keng go sikabung Yahudi, Saulus lo mlak go, kekayso don ey Yerusalem sono wawi go klong-lak genang.
3 Damsik sono beton go, yakena no Saulus se dedagu, kekayso ut ba sik sogo neblong lo ngap-kuntun go, Saulus ey mablong so gemang itak. 4 Nggano, nan blo no pui-siwon go, nebut gemang tup-biwon, “Saulus! Saulus! Sogo-sogo so, ple ey suon ey Genam truik-togoy?” 5 Way so Saulus lo pu go, “O, Woy Dem! Mot nando?” Nggano, ut sik so, pu go, “Genam ngge Yesus! Mot lo, ple ey suon ey, tutruik go ngganemot gabe! 6 Nggeasui go ip-nalo go, yakena sono mot se degut! Ngga sogo no, mot lo pluok genang nebut mea pen.”
7 Se senong: Saulus ey koklong go sedue, saduibong ey gemang pling. Yang! Nemot-a nebut ngga tup-nenawon go, no, seni kua ikum-nesrenawon. 8 Ngganemot no, Saulus ip go, nemot-a kamso nemu pli-nawon go, sogo-sogo kua ikum. Ngga ey, ta lo nemot eygo sedue lo, Saulus mlak go, yakena Damsik sono gemang degut. 9 Ku nangglik yam so, nemu kua pli, ten kua dam bu kua drop goso got-nawon go.
10 Yakena Damsik sogo, sedue meno gemang. Nemot go sui: Ananias, Yesus no dabui lo keng dali go. Sedi ba no Ananias sono Woy Dem lo nebut gemang usi-nawon, “Ananias!” Nggano, Ananias lo wa go, “Woy Dem! Genam ngge go, nebut pen-a! Genam gabe tutup!” 11 Ngga ey, Woy Dem lo pu go, “Ananias! Nggeasui ip go tap meno, ‘Nemudi sogo tap’ sono se klong! Yudas go yap ngga so gemang. Yap ngganemot no, se usi nalo, yakena Tarsus sik sogo sedue, Saulus so be wet-tugu. Nggeasui go, dewi so Saulus gemang pu-tenawon. 12 Yang! Ngge kalik dewi ba no Saulus lo mo ikum: sedue klaya nemot go sui, Ananias, nemot mit no mo weng. Saulus blo no tatui gono, nemu tandali pli genang.”
13 Woy Dem logo nebut tup gono, Ananias lo tenguo go, “Woy Dem! Saulus nogo nebut mata so sikabung go lom sik sogo genam mo tup. Seni so, yakena Yerusalem sogo Yesus no keng go sikabung nogo, tasam piam go mata so nemot lo mo pluok-nayom. 14 Nggano, Yahudi go, taitisopupuit go trang dega sik so, sam iti go, ngge sono nemot mo uweng. Sam ngganemot ba no klik go: ‘Yesus go sui no keng go sikabung, Saulus lo se mlak.’ Ngganemot suali eygo se!”
15 No, ngge kalik Ananias sono Woy Dem lo gemang we-nawon, “Mot klong-a! Genam go kebali pupluok genang so, sedue ngga, Genam lo kuoy go! Yang! Saula-saula, kukunan sogo woy-woy, sikabung Israel naklay sono go, Genam go sui-a nemot lo mea pen-asitogon. 16 Nggano, Genam go sui lek genang idekeba, nemot nogo Genam tang so mea nguok.”
17 Ngga ey, yap ngganemot sono Ananias gemang nawon. Degut-nawon go, Saulus blo no nemot go tatui go, ngge kalik gemang pen, “Saulus dem! Damsik sono kuntogoy gono, Woy Dem Yesus mot lo mo ikum. Nemot lo mot-dak goso, mot mit no genam gabe weng. Tandali mot go nemu pli go Ki Wali Waglo lo tram dali genang so.”
18 Se ikum: Kay seguong tandali Saulus go nemu gemang pli-nawon. Ngganemot no, Saulus ip go, bu gemang degut-nawon dali. 19a Bu degut gono, ten dam-nawon go, saysuk don tandali gemang kok.
Yakena Damsik no Yesus go deguo Saulus lo nguok go
Tamot 9:19b-25
19b Ku nago yam sikabung yakena Damsik sogo Yesus no dabui lo keng go ey Saulus got-nawon. 20 Nisonoso Yahudi go dewi yap ba sono degut klong go Saulus lo gemang pen-siton, “Ki Wali Danon, Yesus gabe!” 21 Saulus iway tup go, ngga sogo sikabung lo pu go, “Ye! Banim go Yerusalem nogo Yesus no keng go sikabung, sedue nggenemot lo mo truik. Ngge sono weng go ngganemot sogo so gemang! Yesus no keng go sikabung ngge sogo mlak go, Yahudi go taitisopupuit go trang dega yakena Yerusalem sogo no dok go mea klong!” Seni so, sikabung ngga, suey so maning kua senong. Nemotnang lo duing go, Saulus logo, seni so ngunguok-ton? Wamoy so?
22 Ku ngganemot nogo, Saulus lo nguok go nebut, don kangok dega so gemang lemoy. Nemot lo suey so mo taling, tegadi so Ki Wali Iram lo dok go Iram, Yesus gabe. Ngga tang so, yakena Damsik sogo sikabung Yahudi, Saulus lo pen go nebut no gemang negap-sing. 23 Ku maning kua walong gono, Saulus but sogo nebut, sedue Yahudi lo gemang degut-nenawon. 24 No, Saulus mo tup. Ku ngganemot sik so, ku klik-ku blong Damsik go yatap kangok go sedue Yahudi lo yay gemang suing, Saulus but genang so. 25 No, wadi nesip, tegue kangok go ba no Saulus go andua-andua lo king go, tegan lo keduik go, tema idi no gemang rling. Nggano, yakena Damsik sik sogo Saulus gemang pung go kap-nawon.
Yerusalem so Saulus got-nawon go
26 Yakena Damsik sik sogo, kota Yerusalem no Yesus no keng go sedue ey klay gono suing so, Saulus gemang klong. No, nemot pung go nogo, Yesus no keng go sedue, Saulus nogo suali kangok so gemang tra-nenawon. Nemotnang lo duing go, Saulus ngge, wamoy so gabe, Yesus nogo dabui lo nemot kua keng.
27 No, ngga sogo Yesus no keng go sedue meno gemang. Nemot go sui: Barnabas. Saulus Barnabas lo wawi go, ngga ey Yesus go tamot 12 yam sogo mit no gemang klong. Nggano, Woy Dem Saulus ey Damsik tap no tegu go, gemang pen. Ngge mo pen dali: Saulus suali kua tra goso, Yesus go sui kota Damsik nogo nisonoso klong go mo pen-sing. Ngga naklay nemotnang no Barnabas lo gemang pen dali.
28 Nebut ngga yam so tup gono, tamot 12 yam sogo nesip ba sono wawi go Saulus gemang degut. Nggano, Saulus nemotnang ey Yerusalem nogo, Yesus go sui suali kua tra goso, gemang pen-nenawon dali.
29 Ku meno no yakena Yerusalem ba sogo sikabung Yahudi, Yunani saula sik sogo gemang dali. Yunani nebut seguong so nemotnang lo gabe pepen. Yunani nebut ey Saulus mo kekangok dali. Ngganemot sogo so, way-way so nemotnang ey nebut gemang tui-netenawon. No, Saulus go kunala nogo nemotnang dabuiikle goso, Saulus but sogo nebut gemang degut. 30 Atuia ngga tup gono Yesus no keng go sedue meno lo, Saulus wawi go yakena Kaysarea, beap ketang sogo no, gemang klong. Ngga sik so nemot go yakena Tarsus no nemotnang lo Saulus pu go gemang klong.
31 Ku ngganemot nogo, Yesus no keng go sikabung, nan Yudea sogo, nan Galilea sogo, nan Samaria sogo, nemotnang ngengam yakay ey gabe susuing! Sip-sip ngga naklay nogo blong duoyap seni ey gemang tagot. Se senong: Yesus no dabui lo keng go sikabung, Woy Dem nogo suali ey gemang uwali. Yesus no keng go sikabung Ki Wali Waglo go don lo gemang tetebok dali.
Nan Samaria no yakena Lida ey Yope eygo Petrus susuing go
32 Yakena-yakena no deguo teguop Petrus lo pepen klong go, yakena Lida sogo Yesus no dabui iti go blong duoyap gemang tegu dali. 33 Ngga sogo sedue meno ey gemang tegu-nawon. Nemot go sui: Eneas. Yagui 8 yam so ku seguong lo, Eneas yambi so sesrek go. 34 Nggano, Eneas no ngge kalik Petrus lo gemang pu-nawon, “Eneas! Iram Yesus lo mot go masi mo suey! Ip go mot go sip srek se rlok!” Kekayso Eneas gemang ip-nawon. 35 Yakena Lida sikabung, nggano Saron pay sogo sikabung naklay, tasam ngganemot ikum go, Woy Dem no dabui iti go gemang keng-nenawon.
36 Nggano, nan ngga sogo yakena meno go sui: Yope. Yope sogo kabung meno go sui: Tabita. Tabita Yunani nebut sogo Dorkas. Yesus no keng go kabung dali. Tasuey mata so sikabung no Dorkas lo mo taling. Nggano, sikabung taut kua go nogo, nemot lo mo tebok dali. 37 Ku ngganemot no, sadui kangok so tra golo Dorkas gemang ip-natun. Nemot go temoy, bu yam so lu gono, blo da sogo degu no gemang wawi-netenawon. 38 Se senong: yakena Yope, yakena Lida dagu so. Yakena Yope sogo blong duoyap mo tup, “Yakena Lida so Petrus gemang!” Ngga ey, Petrus pu go weng genang, namon duo-a mot-dak go gemang kenawon. 39 Deguo ngganemot tup gono, kekayso ip go Petrus gemang keng-nawon. Yakena Yope sogo yap ngganemot no pung go, blo da sogo degu no, wawi go gemang klak-biwon. Se ikum: ngga sogo, kabung nalo mata so gemang. Petrus mit no nemotnang pluep gono, u ba lo Tabita, maning uwali gono sebut go amka ey uyagui gemang kluo-netenawon. 40 Kabung-kabung ngganemot pu go dia sono gemang pluep-lak. Masi unuik go dewi Petrus lo gemang klak-nawon. Dewi yam so pu gono, Tabita go temoy sono dabui iwot go, ngge kalik gemang usi-nawon, “Tabita, ip-a!” Nggano, Tabita nemu pli go, Petrus no gemang yalap-natun. Ngga ey, ip go, nemot go sipsrek blo no gemang suing.
41 Nggano, Tabita go ta no Petrus lo mlak gono, wisi so gemang ip-natun. Ngga ey, Yesus no keng go sikabung temu ey, kabung nalo-nalo ey go usi go gemang degut-nenawon. Se ikum: nemotnang go suongku no Tabita mo wali go gemang ip! 42 Tasam ngga nogo nebut, yakena Yope naklay tup-nenawon go, sikabung mata so, Yesus no dabui iti go gemang keng. 43 Se senong: yakena Yope sogo, sedue meno go yap ba so gemang got-nawon. Sedue ngga go sui: Simon. Simon go kebali: menosam-menosam sogo taut menay suk lo pupluok go. Ku nangglik ey, Simon go yap ba so Petrus gemang got-nawon. Menay suk lo mo semu: ngga Simon nemot go kebali.