8
Yesus so dabui iti goso Saulus lo truik go
1-3 Ngga ey, Ki Wali Iram no suey so dabui lo keng golo, Stepanus temoy iti go, dabuiklum sogo so u kangok kluo go. Nggano, simu no gemang tui-nenawon.
Ku ngganemot sik so yakena Yerusalem sogo blong duoyap don ey gemang truik-netenawon. Ngga ey, nan Yudea sono, nan Samaria sono, banom-banom so gemang suep-lak. No, tamot 12 Yesus lo kuoy go-a, yakena Yerusalem ba so got-netenawon.
Yang! Demu lo Stepanus sruom go, Saulus ikum go gemang yang-anawon dali, “Ngga seni eygo tasam gabe.” Ngga sik sogo, tang ey buin sogo, yapno-yapno Yesus no dabui lo keng go sikabung naklay Saulus lo gemang wet-tenawon. Mlak-sing go, boy ba sono gemang tega-nenawon.
Nan Samaria no Ki Wali Iram logo deguo teguop degut go
4 Nggesono-nggasono Yesus no dabui lo keng go sikabung kuek golo, Yesus logo deguo teguop gemang pen klong. 5 Yesus no dabui lo keng go dem meno go sui: Pilipus. Yakena meno Nan Samaria sogo no gemang degut dali. Ngga sogo sikabung no gemang pen-nawon, “Tegadi so Ki Wali Iram lo dok go Iram, Yesus seni so gabe!” 6 Ngga ey tasam kangok go Pilipus lo gemang semu-nawon dali. Tasam-tasam ikum gono, Pilipus lo pen go deguo nogo suali ey sikabung lo gemang tup-nenawon. 7 Yang! Ngge kalik go tasam mo lemoy: naliwabu piam go sikabung ba sik so yat go kluim don dega ey mo pluep go kuek-lak. Nggano sedue yambi, tamasi leng go naklay seni so mo pali. Ngga naklay Pilipus lo tetaling go. 8 Ngga lemoy go tang so, yakay kangok so gemang tra-nenawom.
9 Se senong: yakena ngga sogo sedue meno go sui: Simon gemang. Ngga nogo tasam mata so blue don lo Simon mo taling-nayom. Ngga ikum go gono, ta wasrang ey Samaria sikabung lo mo glok-nenayom. Nemot lo tra go, “Sedue naklay go dega, genam ngge gabe!” 10 Yakena sikabung, ngguot-kaguit, sedueseni-kabungnalo naklay suali ey Simon ikum go. Nemotnang lo duing go, “Seni so lo! Simon ba sogo Ki Wali Iram go don lo gemang pupluok.” 11 Ku walong dega so blue don logo tasam, nemot lo mo taling. Suali eygo tang so, nemot go sui-a blo sono kangok so pu go, nemot no gemang kekeng.
12 No, Pilipus pung go, Woy Wali Iram tamlak go blongdon duduing, Yesus go sui no pen go gemang tup-nenawon. Ngga ey, dabui iti go mo keng-lak go sikabung-a, Yesus go blung so lemoy so Plipus lo bu gemang degut-tenawon. Yangga, sedue ey kabung ey naklay!
13 Deguo ngga tup gono, Simon dabui lo keng go bu gemang degut-nawon dali. Ngga ey, nago-nago sono Pilipus koklong go, nemot ey keng go gemang uwet. Seni so: tasam ngga dega Pilipus lo tetaling go, don kangok!
14 Ku meno no, Yerusalem sogo tamot gemang tup dali, “Yesus go deguo teguop tupduk go, Samaria sikabung mata so gemang kekeng.” Ngga sogo so, Petrus ey Yohanes ey tamot-tamot lo mot-dak go, Samaria sono gabe kenawon. 15 Yakena Samaria no Petrus ey Yohanes ey pung go, dewi ngge kalik gemang wadong-kenawon, “O, Woy Wali Iram! Ki Wali Waglo sikabung ngge blo sono go se li dali!” 16 Se senong: Woy Dem Yesus go sui ba no bu degut go, no nemotnang nogo Ki Wali Waglo maning kua li. 17 Dewi ngga yam so pu go, Yesus no keng go sikabung Samaria blo no Petrus ey Yohanes eygo lo ta tutui go, nemotnang Wali Waglo lo gemang tram dali.
18-19 Sikabung blo no tatui go Wali Waglo lo nemotnang ey tram go ikum go, ta wasrang ey Simon lo gemang glok-nawon! Ngga ey, Yohanes, Petrus eygo sono klong go, nemotnamon go ta sono duoy gemang leguit. Ngga ey, ngge kalik gemang we-nawon, “Sikabung blo no ta tui go, motnang logo kalik Wali Waglo lo nemotnang tram dali genang. Don ngga kalik go-a at sono se iti-klesando! Motnamon go duoy be!” 20 Nggano, Simon sono ngge kalik Petrus lo gemang bebat-nawon, “Mot lo duing go, duoy logo Ki Wali Iram sik sogo taitiklum ya iti? Puplu go kalik duoy ey sogo so leguit-santo? Duoy ngganemot ey mot mea pegop! 21 Simon! Nemudi so Ki Wali Iram nogo mot maning kua keng. Mot ey klay golo kebali ngge yakua pluok! 22 Waluk genang kunala ngga nase itak! Ngga ey, dabui ba no kunala piam go duing go ngga, Ki Wali Iram sono wa go na suep! 23 Yang! Genam ikum go: piam golo mot go dabui mo tram, mot Kupiamgo tegan lo mo dok.” 24 Ngga tup gono, ngge kalik Petrus ey Yohanes ey go sono Simon lo gemang usi, “Ye! Idekeba ngga genam no lemoy genaning. Genam dewi ey pu-a, sang!”
25 Ibe sono Woy Dem Yesus sogo deguo Petrus ey Yohanes eygo lo pen go, nan Samaria nogo Woy Dem go deguo teguop yam so nguok-klenawon gono, Yerusalem sono tandali gemang kenawon. Nan Samaria sogo yakena temu, tap lo deguo teguop gemang pen-klesiton.
Nan Etiopia go woy dega ey Pilipus tegu go
26 Ku meno no, ngge kalik Pilipus no Kiwali tamot lo gemang pu, “Nan Samaria sik sogo, sada idi sono nggeasui mot se klong! Yangga, nan Gasa Yerusalem tap sono. Ngga yakena-yakena kua go tap.”
27 Ngga ey dali taut go, Pilipus ip go, tap ngganemot sono gemang klong. Sip ngganemot no, tap so nan Etiopia sik sogo ambleduo dega ey gemang ikum-nawon. Yakena Yerusalem sogo Ki Wali yap no, Ki Wali Iram no takokong so weng go, tandali koklong go. Se senong: nan Etiopia sogo iram ngga, kabung. Nemot go sui: Kandake debui. Yerusalem no koklong go woy ngga, Kandake debui go taut yay sogo. 28 Yerusalem sik sogo, kuda lo lelek go dikebleng ba no gemang suing. Wali Sam klaut, nabi Yesaya lo klik goso sedue ngga gemang ikum klong.
29 Ngganemot no Pilipus sono Wali Waglo lo gemang pu, “Klong-a! Kuda lo lelek go dikebleng dagu sono!” 30 Ngga ey, keda so nemot mit no Pilipus gemang tebok go, Wali Sam klaut ba no nabi Yesaya lo klik go pen-akunton go gemang tup. Ngga tup gono, Pilipus lo gemang usi, “Aya, sam ngga go seni mot mo senong?” 31 Nggano, ambleduo lo pu go, “Sedue meno lo kua pen go, sogo kalik so seni genam ya senong?” Ngganemot no, Nemot ey klay gono suing genang so, Pilipus usi go, sipsuing blo sono gemang klak.
32-33 Ambleduo lo ikum-kunton go nebut kluim ngge kalik:
“Menay tong genang kalik, Nemot mo wawi go klong.
Ngga ey, nebut Nemot lo kua tuot.
Sedue go ta no iti go dit ndok a sogo domba nok kalik.
No, Nemot go sui sikabung lo yam so mo wayang.
Nebut suey go sedue klaya nang go logo Nemot nogo kua pen.
Nando lo, Nemot go tang nogo nebut, ya pen?
kukunan blo sik sogo Nemot go nebuem nebit mo iti.” (Yesaya 53:7-8)
34 Yesaya lo klik go nebut ngga yam so ikum go pen gono, ngge kalik Pilipus no ambleduo lo gemang usi, “Nggeasui go, genam sono se pen-sando, ‘Nando so nabi ngganemot lo nebut ngge mo pen-ngam? Nemot tang goso pen? Sedue meno sogo nebut? Maning kua senong go se!’ ” 35 Ngga ey, Yesaya lo klik go nebut sik so tong go, Yesus sogo deguo teguop, Etiopia sik sogo ambleduo no, Pilipus lo gemang pen-siwon. 36 Nemotnamon koklong go bu eygo sip no gemang pung-klenawon. Nggano, ambleduo lo pu go, “Ikum-a, bu ngga go! Ngge suey, Yesus go sui no genam bu ya tui?” [ 37 Nggano, Pilipus lo pu go, “Yesus no dabui iti go seni so kekeng go, bu se degut!” Way so, ambleduo lo pu go, “Genam Yesus mo senong, nemot Ki Wali Danon!”] 38 Ngga ey, nemot go tamot sono ambleduo lo pu go, kuda namboy suing. Bu ba sono Pilipus, ambleduo ey gemang li-klenawon. Bu ba no li go, ambleduo ngga bu ba sono Pilipus lo kenok go bu gemang tui-nawon. 39 Bu ba sik sogo nemotnamon klak go, Pilipus sip ngga sik sogo Ki Wali Waglo lo gemang wawi. Etiopia sik sogo ambleduo, Pilipus kua ikum-srenawon, Pilipus kekayso mo nega. No, nemot go nan no yakay ey ambleduo ngganemot gemang klong.
40 Yakena Asdot so Pilipus sikabung gemang ikum-nenawon. Yakena Asdot ngga, Gasa nogo tap dagu so. Yakena ngga sik sogo, dun idi sono Pilipus koklong go, yakena Kaysarea nan Samaria sogo no gemang pung. Koklong go, sikabung naklay nogo deguo teguop gemang pepen.
Pilipus nogo nebut ngge no yam.