13
Saula-saula no klong genang so Paulus, Barnabas ey mot-dak go
1 Antiokia sogo blong duoyap go senong eygo sedue-sedue, nggano, klui-klui gemang. Yangga: Barnabas; nan Aprika sik sogo Simeon, Niger so u-usi go; yakena Kirene sik sogo Lukius; Herodes ey kerlam so babu go Manahem; nggano Saulus. 2 Ku meno no, nemotnang naklay tenday genuing suing go, ngga ey Woy Dem go sui iway dewi ba lo gemang keklak. Woy ngganemot no, nemotnang no Ki Wali Waglo lo pu go, “Barnabas ey Saulus eygo-a Genam lo mot-dak go kebali pluok genang so se itak!” 3 Dewi-a tenday genuing susuing go, yam sogo no, Barnabas, Saulus eygo blo no ta tui-nenawon go, Ki Wali Iram go waglodon wadong go mot-dak go nemotnamon gemang klong. Ngga ey, Barnabas ey Saulus ey suey so gemang itak-nenawon.
Nan Siplus sono Barnabas ey Saulus ey klong go
4 Ki Wali Waglo lo Barnabas ey Saulus ey mot-dak go koklong go, yakena Seleukia, beap ketang no gabe pung. Ngga sik so, bayi no klak go, nan Siplus sono gemang klong. 5 Nan Siplus no li go yakena Salamis no gemang klong. Ngga no Ki Wali Iram go deguo teguop, sedue Yahudi go dewi yap ba no, gemang nguok-klesiton.
Se senong: nemotnamon no tebok genang, andua meno Yohanes Markus gemang wawi-klenawon.
6 Yakena Salamis nogo deguo teguop pen gono, koklong go nan Siplus seding no gemang pung. Ngga sogo yakena Papos sogo sedue Yahudi meno gemang, yangga, Baryesus blue lo pedot go. Nemot tang so duing go, “Nabi kangok go, genam gabe.” Nemot-a, ngga kalik kua! 7 Nan Siplus sogo gubernul, Sergius Paulus. Gubernul ey Baryesus ta gemang keduik. Sergius Paulus kunala kalong eygo sedue. Ki Wali Iram logo deguo teguop tup genang kangok so Sergius Paulus gemang duduing. Ngga nang so, Barnabas ey Saulus ey nemot lo usi go gemang weng. 8 Se senong: Yunani nebut sogo Baryesus ngga, Elimas. Elimas go seni: ‘Blue lo pedot go.’ Sergius Paulus, Woy Dem Yesus no kua keng genang so, Saulus ey Barnabas eygo lo ngunguok go deguo teguop Elimas lo sak ne kokok. 9 Saulus, Yunani nebut so usi go, Paulus. No, Paulus Ki Wali Waglo lo damoy go nogo, blue eygo sedue sono nemu-a bung-tenawon. 10 Ngga ey, Paulus lo suong no pu go, “Lema go danon mot ngge! Mot go dabui ba tasam piam golo mo damoy, wamoymlue-a pupluok go. Esang! Seni eygo tap plesi mot lo gabe pluok-togoy. Woy Dem logo nemudi sogo tap nogo, sak mot lo pupuem go, se itak! 11 Ikum-a! Nggeasui, mot nogo idekeba Ki Wali Iram lo gabe iti. Nemupung goso mot mea lemoy! Ku walong so neblong mot logo yakua ikum.” Woy ngganemot dali no Elimas nemu se kli. Ngga ey, takasa so sedue meno lo tap taling genang so gemang wet-tenawon. 12 Tasam ngga gubernul ikum go, dabui iti go gemang keng-nawon. Woy Dem nogo suali ey kangok so gubernul gemang keng-tenawon.
Nan Siplus sik sogo Pisidia no klong go
13 Nan Siplus go yakena Papos itak-nenawon go, bayi no blengot go, yakena Perga nan Pampilia sono gemang klong. Nggano pung gono, nemotnamon Yohanes Markus lo ngga no itak go, yakena Yerusalem sono tandali nemot-a gemang klong. Paulus ey Barnabas eygo no tandali keng go koklong genang, nemot moyso.
14 Yakena Perga sik sogo, yakena Antiokia nan Pisidia no Paulus ey Barnabas ey, gemang klong. Ki Wali Iram go ku Sabat nogo, sedue Yahudi go dewi yap ba no nemotnamon degut gono, ngga sogo sedue temu ey gemang suing-lak. 15 Musa logo demutrui ey nabi-nabi lo klik go ikum go pen gono, nemotnamon no ngge kalik dewi yap ngga go woy-woy lo gemang usi, “Aya! Motnamon go nebut teguop, sikabung ngge nogo pen sogo, ba pen-a!” 16 Nggano, Paulus ip go ta lo taling gono, ngge kalik gemang pen-anawon, “Ayanang, mianang! Ki Walitap no keng go sikabung Yahudi, Ki Wali Iram no keng go sikabung temu ey, suey gabe. Motnang se tup! 17 Nan Mesir sogo no, blung Israel imot go babuasi Ki Wali Iram lo yay mo got-nangam. Ngga tang so, miam dega ey mo kenangum. Ngga ey, nan ngga sik sogo Nemot go don dega lo wawi go mo pung. 18 Se senong: yagui 40 yam so kaseglokpay lo nemotnang wet go. Tasam piam go Ki Wali Iram sono nemotnang lo mo semu-nenangam. Ngga, Ki Wali Iram mo senong. No, banom go nemotnang Ki Wali Iram lo kua itak. 19 Tap koklong go, nan Kanaan no pung gono, ngga sogo saula tang 7 yam sogo naklay mo tuk-sing. Nan Kanaan babuasi sono Ki Wali Iram lo mo itak. 20 Yagui 450 yam so nemotnang suing gono, trang-trang-a babuasi wawi genang so Ki Wali Iram lo gemang temuit-sing, e... nabi Samuel lo wawi go ku no gemang pung. 21 Nabi Samuel lo wawi go i-go se, iram so Ki Wali Iram sono babuasinang lo gemang usi. Ngga ey Kis go danon, deguena Saul-a iram gemang temuit. Saul tang Benyamin sik so pung go. Iram so got-nawon go, yagui 40 yam so. 22 Ki Wali Iram no suey so iram Saul kua tupduk keng go tang so, tenguo go way so Daut-a iram so Ki Wali Iram lo gemang temuit. Daut sogo ngge kalik Ki Wali Iram lo mo pu, ‘Isay go danon Daut-a, At lo mo ikum. Genam go dabui nogo ey but go! At lo iwat go naklay-a Daut logo mea pupluok.’
Ngge, Daut so Ki Wali Iram lo pen go. 23 Se senong: Daut go mlena walasrang sik so, tegadi so Ki Wali Iram lo dok go Sesuoy Iram mo temuit gabe. Yangga, Yesus! 24 Yesus, pupung gono, sikabung Israel no Yohanes Busotuigo golo don ey mo pen-ngam, ‘Wali inim-a motnang ta se wawi. Tasam piam go itak go bu se degut!’ 25 Yohanes go kebali yam sogo no, sikabung no ngge kalik gemang pen-nawon, ‘Motnang lo bubung go, tegadi so Ki Wali Iram lo dok go Iram, motnang lo duduing go, genam ngge kua. Sesuoy Iram ngga mesip so gabe uweng. Se duing: Genam ngge tamot seguay go! Nemot go taut at lo yakua tuing.’ Ngga, Yohanes lo pen go.
26 Ayanang, mianang! Babuasi Ablaham go danonnang. Nggano Ki Wali Iram no suali ey ta kokong go, ngge motnang se senong! Imot naklay nogo sikabung sesuoy genang deguo teguop, Ki Wali Iram lo mo itak gabe. 27 Sikabung Yerusalem sogo, nggano nemotnang go iram-tegay, nemot-a Yesus ikum go, Nemot go seni kua mlak-nesrenayom! Nemotnang lo duing go, ‘Tegadi so Ki Wali Iram lo dok go Sesuoy Iram ngga, Yesus kua wa.’ No, ku Sabat nogo, nabi-nabi lo klik go nebut ikum go pen go tup go, nemot go seni, nemotnang kua senong. Way so Yesus but go kebong genang idekeba-a nemotnang lo mo taling. Esang! Ngga kalik semu golo, nabi-nabi lo senong-nengam go nebut, nemotnang tang so mo lemoy gabe. Kua kay: Nabi-nabi lo klik go, Yesus idekeba mea lek! Tasam ngga-a sikabung Yerusalem lo mo pluok gabe. 28 Nemot-a Yesus go piam kua ikum go, Roma go gubernul Pilatus mit no nemotnang klong go, gemang pu, ‘Yesus but go se kebong!’ 29 Se duing: Yesus sogo, Wali Sam klaut ba no klik go naklay, yam so nemotnang lo mo pluok. Ngganemot no, Yesus di blo sik so iti go, mu no gemang tuet. 30 No, kebong go sip sik so, tandali Yesus Ki Wali Iram lo mo nglong. 31 Ngga ey, ku nago yam so, Nemot no keng go sikabung no Yesus go saysuk gemang taling. Ngga, nan Galilea sik so yakena Yerusalem sono, Yesus ey koklong go sikabung ngganemot. Nggeasui go way so ngge-a sikabung Yahudi no gabe yang, ‘Seni so, tegadi so Ki Wali Iram lo dok go Iram, Yesus gabe.’ 32-33 Nggeasui go, Ki Wali Iram sik sogo deguo teguop motnang nogo genam namon lo mo pepen gabe. Yang! Babuasi no tegadi so Ki Wali Iram lo dok-ngam go ngga, nggeasui go tang no, mo lemoy. Kebong go sip sik sogo, Yesus tandali mo nglong. Sam Masmur namon ba no ngge kalik go mo klik gabe,
‘Genam go Duo Mot gabe!
Nggeasui go sik so, mot go Aya, Genam gabe.’ ( Mazmur 2:7)
34-36 Kebong go sip sik sogo, Yesus tandali Ki Wali Iram lo nglong go, Wali Sam klaut ba no ngge kalik mo klik-nengam,
‘Ki Wali Iram!
Mot lo kuoy go deguena kebong go sip ba nogo ya kua pegop!’ (Yesaya 55:3)
Ki Wali Iram lo kuoy go deguena ngga Daut kua. No, Yesus so pu go. Seni so, Wali Sam klaut ba no Yesus sogo ngge kalik so mo klik dali,
‘Daut nogo taiti, tegadi so Ki Wali Iram lo dok-ngam go,
nggeasui go Mot no seni so gabe mo taling.’ (Mazmur 16:10)
Se senong: Daut wali genang ku, Ki Wali Iram go kebali yam so semu go, nemot mo kebong. Ngga ey, babuasinang mit no simu no nemot mo tui. Esang! Nemot go saysuk naklay pegop genang so mo itak. No, Yesus-a ngga kalik kua! 37 Kebong go sip sik sogo tandali Ki Wali Iram lo mo nglong.”
38-39 “Ayanang, mianang! Kua kay: deguo ngge-a atnamon lo gabe pepen: Yesus no dabui iti go keng go tang so, motnang go piam konkebamling Nemot logo so mea suep! Musa logo demutrui no taling genang idekeba, imot logo yakua lek. 40-41 Kunala temoy no motnang se! Yesus kua tenguo! Mo tenguo go, motnang nogo nabi-nabi lo pen go nebutmang ngge kalik mea lemoy,
‘Seni so,
motnang wali go ku nogo tasam kangok go gabe sesemu.
Motnang nogo tasam ngga pen go, yakua keng.
Motnang! Ki Wali Iram wayang go sikabung!
Saduibong ey motnang mea pling.
Motnang naklay mea nega.’ ” (Habakuk 1:5)
42 Yahudi go dewi yap ba sik so Paulus ey Barnabas ey pung gono, sikabung lo gemang usi-nenawon, “Ku Sabat santugun go nogo, ngge no nebut ngganemot tandali motnamon lo ya pen-kelo?” 43 Paulus ey Barnabas ey koklong go, sedue Yahudi ey Ki Wali Iram no suali tetra go sikabung temu gemang keng-nenawon. Ngga ey, nemotnang no nebutmang Paulus ey Barnabas eygo lo gemang pen, “Ki Wali Iram go taitiklum nogo-a waysagi ey motnang lo se mlak.”
44 Ngga utep go Sabat ku nogo, Woy Dem nogo deguo teguop tup so, yakena sik sogo sikabung mata so gemang weng-lak. 45 Ngga ikum-nenawon go, nele-nele so sedue Yahudi gemang pluok-nenawon. Ngga ey, kangok so Paulus ey Barnabas eygo lo nguok go nebut gemang wayang. 46 Way so nemudi so Paulus ey Barnabas eygo lo ngge gemang pen-klenawon, “Banim motnang sikabung Yahudi no, Ki Wali Iram sik sogo deguo teguop mea pen klong. No esang! Deguo ngga motnang lo gabe teteguo. Ngga ey wali inim iti genang, motnang lo duing go, nueya. Ngganemot sogo so, nggeasui go motnang itak go, saula-saula no atnamon lo gabe pepen! 47 Se senong: ngge kalik atnang no Woy Dem lo mot-dak go,
‘Saula-saula sogo neblong ngap genang so,
motnang-a Genam lo mo temuit.
Ngga ey, kukunan sikabung nan seding no seding no mea sesuoy.’ ”
48 Nebut ngga tup go, saula-saula sik sogo sikabung yakay gemang tra-nenawon. Woy Dem go deguo iway blo sono nemotnang lo gemang iti. Nggano Ki Wali Iram lo kuoy go sikabung, Yesus no dabui iti go gemang keng-lak. 49 Nan naklay nogo, Woy Dem go deguo teguop, bu kalik gemang dayap.
50 No, Antiokia sogo trang-trang go senunnang temu, Ki Wali Iram sono ta gemang kokong dali. Paulus ey Barnabas ey yat genang sogo, kabung-kabung ngga no woy-woy Yahudi lo nebut gemang semu-nenawon. Yakena go iram-tegay ey ta gemang keduik-nenawon dali. Nemotnang pluep go Paulus ey Barnabas ey yat go nan ngga sik so gemang pu go klong. 51 Nan ngganemot sik sogo Paulus ey Barnabas ey yat gono, sikabung ngga senong genang so, masi sung-a tegue go gemang itak-klenawon. Demutrui nogo ngge, kunala temoy no se. Ki Wali Iram go deguo motnang lo tenguo go. Ngga sik sogo, yakena meno, Ikonium sono gemang klong.
52 No, yakena Antiokia no itak go blong duoyap Ki Wali Waglo lo mo damoy, dabui ba nenem yakay dega ey.