6
Tamot no tebok genang sedue-sedue kuoy go
1 Ku ngganemot nogo, dabui iti go Yesus no keng go sikabung mata dega so se lelemoy. Iblani nebut so pepen go sikabung Yahudi so Yunani nebut so pepen go sedue Yahudi lo ngge kalik nebut segut gemang iti-netenawon, “Genamnang go sedue lo itak go nalo-nalo nogo, suey so duoy kua uwasey ne!” Seni so, suey so tasam ngga tamot-tamot lo kua ikum!
2 Nebutsegut ngganemot tup gono, dabui Yesus no iti go sikabung naklay tamot-tamot lo pu go gemang yaluim-nenawon. Nggano, ngge kalik nemotnang lo gemang pen, “Genamnang go ku, duoy uwasey genang so, bebetep go. Ngga suey kua! Ki Wali Iram go tap nguok genang ku, duoy wasey genang so, ya kua itak. 3 Ayanang, mianang! Motnang sik sogo sedue-a 7 yam so, kebali ngga semu genang so se kuoy. Se senong: kuoy genang sogo sedue-sedue ngga go wali, sui eygo suey so se ikum: nemot ngga kunala kalong ey Ki Wali Waglo lo se tram! Kebali ngge nemotnang ngga lo, pluok genang. 4 Dewi pupu ey deguo teguop nguok genang seguong-a atnang lo mea duing.” 5 Kunala ngga tup gono, dabui Yesus no iti go sikabung naklay gemang yang-nenawon. Ngga ey, sedue 7 yam so gemang kuoy-nenawon, yangga: Stepanus, dabui lo Yesus no seni ey keng go Ki Wali Waglo lo naklay tram go, Pilipus, Plokoros, Nikanor, Timon, Parmenas, nggano, Nikolaus yakena Antiokia saula meno sik sogo, no, Yahudi go demu no mlak go. 6 Tamot-tamot no sedue-sedue ngge naklay wawi go gemang taling. Nggano, nemotnang blo nogo ta tui go, dewi ba lo Ki Wali Iram sik sogo taitiklum gemang wadong-nenawon.
7 Yang! Walinebut Ki Wali Iram lo taling go bu kalik gemang dayap-anatun. Sikabung miam dega ey blong duoyap no mo tebok. Ngga ey, taiti so Ki Wali Iram no pupuit go trang, mata so gemang keng-nenawon dali.
Stepanus mlak go but go
8 Se senong: Taitiklum don dega ey andua Stepanus no Ki Wali Iram lo mo iti. Ngga ey, sikabung mata sogo nesip no tasam kangok go nemot lo gemang pluok-tenawon. 9 No, Stepanus-a sedue temu lo gemang waydang. Yahudi go dewi yap meno no nemot go sui: ‘Ta itak go sedue’ no nemotnang gemang pupluep. a Sip-sip ngge sik sogo nemotnang pung go: nan Kirene, kota Aleksandria, nan Kilikia, nan Asia ey way-way so, Stepanus ey nebut gemang tui-nenawon. 10 No, Stepanus go lom sik sogo nebut kalong eygo Ki Wali Waglo lo taling go nogo, way so sedue Yahudi ngganemot lo gluik genang ya kua. 11 Ngganemot sogo so, kekay tap so klay sedue temu no sedue-sedue ngganemot lo semu-nenawon go, nebut iwot genang so, “Atnang lo mo tup: Musa ey, Ki Wali Iram ey Stepanus lo mo wayang.”
12 Esang! sedue Yahudi ey, Yahudi go trang-trang ey, nggano walinebut so nguok go klui-klui eygo, nemotnang go, nebut iwot ngga lo, dabui kalong gemang tong-nesiwon. Ngga ey, nenawon go, Stepanus mlak go, Yahudi go iram-tegay go nebutdegut mit no gemang lek-nesiwon. 13 Nggano pung go, nebut so iwot go klay sedue gemang pu go degut dali. Nggano, wamoymlue so nemotnang lo gemang pen-anawon, “Musa ey, Ki Wali yap eygo nogo nebut piam tong kua tong, sedue ngge lo pu go.” 14 Yang! Stepanus lo pen go, atnang tup go, “Ki Wali Yap kangok go, yakena Nasaret sik sogo sedue Yesus lo togut go, nggano Musa lo iti go demutrui naklay mea itak.”
15 Ngga ey, Stepanus sono, nebut so degut go iram-tegay naklay lo ikum-nenawon go, Stepanus go nebuemnemu, Kiwali tamot kalik blong ey lemoy go, gemang ikum-nenawon.