5
Ki Wali Waglo so Ananias ey Sapira eygo lo mlue go
1 Ku meno no, Ki Wali Iram nogo taiti so, duoy so nan-a, nin ey senun ey gemang nay-klenatun. Nemotnamon go sui: Ananias ey Sapira ey. 2 Duoy ngga nesip so tegek-klenatun go, temu-a itak, temu dali-a Ki Wali Iram nogo taiti so, Yesus go tamot-tamot sono gemang iti. Nemotnamon goso, banom nebut yakot so mo semu-klenatun, “Mo usi go se pen, ngge tabunga gabe iti go weng!” 3 Ngga, ikum gono, Petrus lo gemang pu, “Ananias! Mot go dabui sogo so, Kupiam lo mo damoy. Ki Wali Waglo nogo wamoymlue mot lo gemang semu-togoy! Seni so, nan duoy temu yakot so mot goso, mot lo mo gluik.
4 Se senong: maning duoy so kua nay go nogo nan ngga mot go nan. Nggano, duoy so mo nay go nogo, nan duoy ngga, mot go dali. No duoy temu nagluim genang, dabui ba lo sogo so, mot lo ne duing? Ngga, sikabung no kua mlue, no Ki Wali Waglo no, mot lo mlue go!” 5 Petrus go nebut ngga kalik sogo tup go, nemot ey kekayso pui go Ananias gemang kebong dap-nawon. Tasam ngganemot tup go, sikabung naklay, suali kangok so gemang tra-nenawon. 6 Nggano duo ngguot weng go, amka lo pok go, simu sono Ananias tuet genang sogo so gemang lek go klong. 7 Ngga blo idi lo, woy nangglik yam so suing gono, Petrus mit no senun Sapira bantun go gemang degut dali. Nemot, kenin kebong go, kua senong. 8 Nggano, Petrus lo gemang usi-tenawon, “Ko, genam nogo pen-asilo, ‘Seni so? Mot ey sedue ey golo, nan duoy so nay go duoy ngge naklay tabunga mo iti?’ ” Ngga ey, way so Ananias go senun lo pu go, “Yang, ngga, duoy ngganemot, naklay lo!” 9 Sapira lo pu-natun go tup gono, Petrus gemang pu-nawon, “Sogo so, mot ey sedue ey, nebutpen gono, weng go, Ki Wali Iram go Waglo nogo, mlue-kleto? Ngga kua seni. Ikum-a! Mot go sedue so, tuet go sedue ngge nenayon go, mot mea tuet dali!” 10 Woy ngganemot dali no, Petrus go masi ba no, kekayso pui go, Sapira gemang kebong-natun.
Duo ngguot ngga, degut-lak go, Sapira go temoy ikum go, lek go, nenawon go, kenin mit no gemang tuet dali.
11 Yesus no dabui iti go sikabung ey, sikabung mata sogo ey, tasam ngga ikum gono, suali kangok so gemang tra-nenawon.
Tasam kangok go Yesus go tamot lo semu go.
12 Ku no-ku no, Ki Wali yap kangok go seboy go sui: ‘Salomo’ no, ngengam-yakay ey Yesus no keng go sikabung gemang yaluim-netenawon. Seni so, tasam kangok-kangok go mata dega so tamot-tamot lo gemang semu-netenawon. 13 Se senong: saula Yahudi kua go sik sogo sikabung, nemotnang ey klay gono yaluim genang sogo, suali so. No, Yesus no dabui iti go sikabung ngganemot, ta ey kangok so woy-banu logo gemang kokong. 14 Ngganemot nogo, Woy Dem no dabui iti go sikabung mata so, sedue ey kabung ey, gemang keng-netenawonlak. 15 Seni so, sikabung sadui sogo mata so tap no dali wawi go, sip srek ey go lek dali go, tap no tui-nenawon go, nago no, Petrus koklong go nogo, sedue sadui sogo blo lo nemot go woy lap pung go, sadui suey genang. 16 Seni so, yakena Yerusalem dagu sogo yakena-yakena sik sogo, sadui sogo, nali degut go sikabung mata dega so gemang weng dali. Ngga ey, nemotnang go sadui naklay gemang pali-sing.
Yesus go tamot 12 yam sogo Yahudi go iram-tegay lo mlak go
17-18 Sikabung sadui pali go ikum gono, Yesus go tamot-tamot no sedue Yahudi go woy-trang dabuipiam, gemang tra-nenawon. Woy-trang ngga, partay Saduki sik sogo sedue. Ngga ey tamot-tamot mlak go, boy ba no gemang tega.
19-20 Se ikum: wadi go, ku klik gono, Kiwali tamot klaya duo weng go, boy yatap tenuing go, tamot-tamot dia no wawi go, gemang pluep-lak. Ngga ey, Kiwali tamot lo gemang pu-nawon, “Ki Wali yap kangok go ba no motnang klong go, wali inim iti genang sogo nebut, sikabung no se pen-kenalo!” 21 Kiwali tamot lo pen go nebut tup gono, wadikua seni go Ki Wali yap ba no nemotnang gemang degut-lak. Ngga ey sikabung no wali demening go iti genang sogo tap, gemang nguok-netenawon.
Sikabung so maning nemotnang lo ngunguok go, sedue Saduki, sedue Israel go iram-tegay, pu-sing go, nebutdegut genang so gemang yaluim-anatun. Nggano, sedue temu mot go, boy ba sik sogo Yesus go tamot-tamot wawi so gemang nenawon. 22 No, boy ba no nemotnang pung go, degut go, Yesus go tamot-tamot kua ikum-nesrenawon. Tandali iram-tegay mit no nemotnang gemang weng. 23 Tegu gono, nemotnang lo gemang pen, “Genamnang klong go, boy ba no pung go, boy yatap dawin ey mo kadun, nggano boy yay sogo sedue, nemotnang go sip so gemang ip go susuing. No, yatap genamnang lo tenuing go nogo, boy ba sogo Yesus go tamot-tamot kua ikum-srenatu!”
24-25 Nebut ngganemot tup gono, Ki Wali Yap kangok go yay sogo wengkabui, nggano taiti so pupuit go trang-trang dega kekayso sadui bong ey pling-nenawon. Ngga ey, kunala-a, gemang duing-netenawon, “Ye, Yesus go tamot-tamot nemot, sogo kalik so mo lemoy?” Nebut ngganemot so nemotnang lo sosok gono, sedue meno weng go gemang pen-anawon, “Tup-a! Inenga motnang lo mlak go, boy ba no betep go sedue-sedue ngganemot, nggeasui go Ki Wali yap ba so, sikabung so gemang nguok-netebawon!”
26 Ngga tup go nogo, tamot-tamot ngganemot suot-suot so wawi genang sogo, Ki Wali yap go yay so susuing go wengkabui ey nemot go plesedue ey gemang klong. Seni so, sikabung mata sogo lo demu lo sruom eygo, suali sogo so. 27 Nggano, Yahudi go iram-tegay go demu no, nemotnang lo neyboy genang sogo so tamot-tamot ngganemot gemang wawi go degut. 28 Iram-tegay nesip no pung gono, tamot-tamot no taiti so pupuit go trang dega lo pu go, “Don ey motnang no atnang lo mo pu, Yesus go sui nogo tandali go motnang kua ngunguok ey ya! No, nggeasui go Yerusalem seding no-seding no, mot go tap ngge mo pepen klong. Ngga ey, motnang lo mo pen, ‘Sedue Yesus ngganemot go kin genamnang blo no ne guglung!’ ”
29 Nebut ngganemot tup gono, way so Petrus ey, tamot temu eygo lo pu go, “Ki Wali Iram nogo-a se keng! Sikabung nogo mea kua keng gabe! 30 Seni so, di no motnang lo tegak go Yesus, kebong sip sik so tandali babuasi go Ki Wali Iram lo mo nglong. 31 Yesus, Sesuoy Iram so, Ki Wali Iram lo mo temuit. Nggano tasemla idi no, Iram demu blo sono Nemot mo iti. Yang! Tang Israel nogo Ki Wali Iram no teguey genang tap, Nemot lo mea kebuo. Ngga ey, Israel go tap piam go itak go, nemotnang lo semu go piam konkebamling suep genang. 32 Ayanang! Ngga seni so lemoy go, atnang gabe yang! Nggano ngga, Ki Wali Iram no tupduk go sikabung no iti go Wali Waglo lo, gabe yang dali.”
Nebut mang senongkalong eygo sedue lo pen go
33 Petrus go nebut tup gono, dabuipiam kangok so iram-tegay tra go, tamot-tamot but so gemang pen-nenawon. 34 Nggano, iram-tegay nesip sik sogo tang Parisi sik sogo sedue meno, gemang ip-nawon. Nemot go sui: Gamaliel. Musa logo demu so ngunguok go klui nemot gemang. Nemot sogo, suali ey tang Yahudi naklay lo gemang tetra. Nemot lo pu goso, tamot-tamot dia sono namboy pluep-lak go wawi go gemang klong. 35 Ngge kalik so nemot lo gemang pen-anawon, “Ayanang, sedue-sedue ngganemot pu go dia sono namboy pluep-lak! Motnang, suey so se tup! Sedue-sedue ngge nogo, sogo-sogo, keda so kua semu. Kunala temoy no se! 36 Banim go tasam ngge kalik go naklay gabe mo lemoy dali. Ku ngganemot nogo sedue meno nemot go sui: Tuedas. Nemot lo duing go nemot sui eygo deguena. Yang! Sikabung 400 yam so nemot no mo keng. No, nemot but go kebong gono, nemot no keng go sikabung, banom-banom mo suep-lak. Ngga sik sogo, nemot nogo nebut tandali go, kua pepen gabe. 37 Nggano, Kaysar lo pu go sui klik genang ku nogo, nan Galilea sik sogo sedue meno gemang pung dali. Nemot go sui: Yudas. Nemot lo nguok go nebut nogo, sikabung mata so mo keng-nenayom. No, seni so, nemot but go kebong go, nggano, nemot no keng go sikabung yat gono, banom-banom so mo suep-lak dali. 38 Ngganemot sogo so, nggeasui go, genam lo gabe pepen: sedue-sedue ngge, ta itak go se klong-lak, sogo-sogo kua semu! Seni so nemotnang lo nguok go tap ngge, sedue logo tap, tap ngganemot tang so mea nega! 39 No, nemotnang lo nguok go tap ngga Ki Wali Iram sik sogo, nemotnang ya kua waydang. Kunala temoy no se! Ki Wali Iram no plesagui ne sesemu go kalik gemang!”
Gamaliel go nebut atuia tup gono, nemot no iram-tegay gemang keng-nenawon. 40 Nggano, nemotnang lo usi go tamot-tamot gemang degut-lak. Tamot-tamot degut gono, demun suey-nenawon go, gemang pu-netenawon, “Tandali go Yesus go sui kua ngunguok!” Nggano nemotnang lo pu goso, tamot-tamot itak go, gemang klong.
41 Seni so, iram-tegay nebutdegut sip ngganemot sik so pung go, suongsut tamot-tamot lo kua tra. No, Yesus go sui nang sogo idekeba iti go tang so, yakay ey nemotnang lo gemang klong.
42 Ku no-ku no Ki Wali yap kangok go ba no, nggano, sikabung go yap-yap nogo, deguo teguop nemotnang lo gemang ngunguok. Ngge kalik, “Seni so, tegadi so Ki Wali Iram lo dok go Iram, Yesus gabe.”