4
Petrus, Yohanes ey Yahudi go iram-tegay lo neyboy go
1 Ki Wali yap ba no maning nebut so Petrus ey, Yohanes eygo lo pepen, Yahudi go woy-woy nemotnamon mit no gemang pluep-lak. 2 Seni so, maning Ki Wali yap ba sogo sikabung no Yesus go deguo teguop Petrus, Yohanes eygo lo ngunguok go tang so Ki Wali Iram no taiti so pupuit go trang-trang ey, Ki Wali yap yay so susuing go wengkabui ey, mlak genang tamot namon mit no gemang pluep-nenawon. Ngga ey, sagui kangok so nemotnang lo gemang kong-nenawon. Seni so, Petrus ey Yohanes eygo tandali nguok go: ‘tandali Yesus mo nglong.’ Ngge pepen golo, seni so, nemotnang lo gemang nguok: ‘sikabung naklay tandali mea nglong!’ Tap ngga nogo sedue Saduki lo duing go, ‘ngga wamoymlue. Sikabung kebong go, tandali yakua nglong.’
3 Ku klik go sogo so, mlak go boy ba sono namboy nemotnamon gemang betep-nenawon. 4 No, nemotnamon lo nguok go ngganemot tup go nogo, Yesus no dabui iti go keng-nenawon go miam dega ey, 5 ribu yam so mo tebok.
5 Ngga utep, Yerusalem sogo deguena trangkose, woy-woy naklay, gemang yaluim-nenawon. 6 Nggano, Ki Wali Iram no taiti so pupuit go trang dega, Anas, Kayapas, Yohanes, Aleksander, nggano, taiti so pupuit go yap tenglam naklay gemang pluep dali.
7 Nemotnang, naklay degut gono, Petrus, Yohanes eygo, wawi go gemang degut dali. Ngganemot no, nemotnamon no ngge kalik so trang-trang lo gemang usi-netenawon, “Mot namon go don, nago sik sogo? Nggano, nando go sui no pu go, tasam ngge mo lemoy?” 8 Nemotnang lo usi go tup gono, Ki Wali Waglo lo tram go nogo, ngge kalik Petrus lo gemang pen-anawon, “Ayanang iram-tegay, woy-woy, motnang suey gabe! 9 Inenga tasam suey go imot no mo lemoy. Yangga: sedue yambi, masi ip go. Ngganemot sogo so, nggeasui go genam namon gabe neyboy-ketogoy. 10 Motnang naklay, nggano sedue Israel naklay ey, suey so se senong: Woy Dem Yesus, yakena Nasaret sik sogo ngganemot go don lo, sedue ngge, masi mo ip. Nggano, motnang go nemuku so ip go nemot gabe got-siton. Se senong: Yesus ngganemot, di no motnang lo glung go mo kebong. No, sikebong go sip sik so, Ki Wali Iram go don lo tandali Yesus mo nglong gabe. 11 Wali Sam klaut ba nogo, ngge kalik Nemot sogo mo klik,
‘Yap so kiklik go sedue lo tega go demu,
dawin kangok go, seni eygo so mo lemoy.’ (Mazmur 118:22)
Se senong: Yesus, motnang lo but go, demu ngga kalik, dawin ey, nemu klaya seni so mo lemoy gabe. 12 Seni so, Woy Dem Yesus seguong logo so sikabung mea sesuoy. Kukunan blo nogo sui meno-meno kua iti gabe! No, Yesus go sui seguong-a klaya gabe.”
13 Petrus ey, Yohanes eygo lo, suali kua goso, nebut don ey pen-kletenawon go ikum gono, iram-tegay gemang kukui-nenawon. Seni so, nemotnang mo senong: Petrus ey Yohanes eygo ngge, yakena sedue, kunala kalong ey kua. Nggano, mo senong dali, “Nemotnamon ngge Yesus no kuno-kuno keng go uwet go sedue.” 14 Sedue yambi masi ip go ngga Petrus ey Yohanes eygo mit so ip go genang susuing dali. Ngganemot nogo, nemotnamon nogo nebut way iram-tegay lo pu genang yakua. 15-16 Ngga ey, Petrus, Yohanes ey pu go dia sono namboy gemang pung. Ngganemot no, way-way so iram-tegay lo nebut gemang pu-netenawon, “Sedue namon ngge, sogo kalik ya semu-eyon? Yerusalem sikabung naklay mo senong: tasam ngge, iway nemotnamon lo mo iti. Imot logo, tasam ngge way, yakua kong gabe. 17 Nggeasui go, nemotnamon nogo, nebut-a mea bebat. Nggano, mea pu, ‘Sikabung nogo, Yesus go sui eygo nebut tandali go kua pen! Sikabung temu, sedue yambi tandali pali go, senong genaning.’ ” 18 Ngganemot no, Petrus, Yohanes ey tandali pu go, gemang degut-klenawon. Nemotnamon degut gono, ngge kalik gemang pen-nenawon, “Sikabung nogo Yesus go sui eygo tandali go kua pu. Nggano Yesus sogo tap mot namon lo tandali go kua ngunguok!” 19 No, nebut ngge tup gono, iram-tegay sono ngge kalik Petrus ey Yohanes eygo lo gemang pen-klenawon, “Motnang lo se pen! Nago-a suey: Ki Wali Iram no iwat go-a atnang ya keng? Motnang go kunala-a ya keng?” 20 Nggano, tandali Petrus, Yohanes eygo lo, pu-klenawon go, “Yang, genamnang go, nemu lo ikum go, kama lo mo tup go yakua pepen genang, yakua gabe!”
21 Petrus ey Yohanes eygo no, idekeba iti genang sogo tap iram-tegay logo kua ikum-nesrenawon. Ngganemot sogo so, tamot namon ngganemot no, nebut-a bebat-nenawon gono, pu go gemang klong. Yang! Sedue yambi masi ip go tang so, Ki Wali Iram go blong, sikabung mata sogo lo blo no i-iti go, iram-tegay mo senong dali. 22 Seni so, sedue yambi, masi ip go ngga yagui 40 yam no mo pung. Ngganemot sogo so sikabung yakay kangok so mo tra.
Yesus no dabui iti go sikabung don wadong-nenawon go
23 Petrus, Yohanes ey, boy ba sik sogo itak gono, Yesus no dabui iti go andua temu mit sono, gemang kenawon. Nggano pung go, taiti so pupuit go trang-trang lo pu go nebut gemang pen-klenawon.
24-26 Nebut ngganemot tup gono, Ki Wali Iram no dabui klaya iti go, ngge kalik Yesus no keng go andua-andua lo dewi gemang pu-nenawon, “Woy Wali Iram! Seni so, ut, nan, beap, nemot go seni naklay mot lo mo semu-ngam. Mot sik sogo, Wali Waglo go don logo tang so, genamnang go babuasi Daut, Mot go tamot suey go lo, ngge kalik so mo pen-angam,
‘Sogo kalik go tang so, saula-saula logo,
Ki Wali Iram nogo, dabuipiam tetra?
Sogo temoy no, kukunan sikabung,
atuia kua seni go semu-neton?
Kukunan blo sogo, deguena-deguena,
plepung genang sogo so, mo tetaut.
Nggano, deguena-deguena klaya goso mo lemoy,
Ki Wali Iram ey, Nemot lo dok go Iram eygo nogo
sagui gabe kong-netenawon.’ a
27-28 O, Wali Aya! Nebut ngganemot, nggeasui go gabe mo lemoy! Nggeasui go, kota Yerusalem sogo deguena Herodes, gubernul Pontius Pilatus, amble saula ey, Yahudi go saula eygo naklay klaya gono mo tegu. Mot lo temuit go teguop go tamot Yesus go tap puem genang sogo, nebut nemotnang mo degut. Yang! Mot go don lo pu go lemoy genang so, nemotnang lo gabe pupluok. 29 No, Woy Wali Iram ikum-a! Genamnang no, plesagui kangok so nemotnang lo kokong go. Nggeasui Mot se tebok! Mot go deguo teguop tamot-tamot logo don ey, penklong genang. 30 Nggeasui go, Mot go don se taling, Mot nogo teguop sogo tamot, Yesus gabe. Yesus go sui ba no, tasam-tasam kangok go, sedue sadui sogo, tandali pepali go, lemoy genang.”
31 Nemotnang dewi yam so pu gono, sip ngganemot nogo kuysu gemang lemoy. Ngga ey, nemotnang naklay go, dabui ba no Ki Wali Waglo lo gemang tram. Ku ngganemot sik so iti go, suali kua tra goso, Ki Wali Iram sik sogo deguo teguop nemotnang lo gemang pepen klong.
Yesus no dabui iti go sikabung klay gono susuing go
32 Yesus no keng go sikabung go, kunala, dabui naklay, klaya seguong gemang iti-nenawon. Seni so, sogo-sogo klaya duo logo gemang go, ngga, andua-andua naklay eygo nang gemang.
33 Ku ngganemot nogo, Yesus kebong go sik so nglong go nogo nebut, don ey Yesus lo kuoy go tamot-tamot lo gemang nguok-netenawon. Nemotnang naklay blo so Ki Wali Iram sik sogo taitiklum gemang gigit. 34-35 Blong duoyap ba sogo taut kua go, ten kua go klaya duo yakua. Nando go yap, nan, nggano taut mata so mo, meno duoy so nay gono, duoy ngganemot nemotnang lo iti go, e... Ki Wali Iram nogo taiti nang so tamot-tamot go masi ba no, gemang tutui. Nggano blong duoyap ba sogo taut kua go sikabung no duoy ngganemot gemang wasey-sing.
36-37 Sedue meno, nemot go sui Yusup, tang Lewi sik sogo. Nan tebot, Siplus no tui go. Nemot go nan duoy so iti gono, duoy ngganemot Yesus go tamot-tamot go masi ba no, Ki Wali Iram nogo, taiti so, gemang tui. Seni so, Yesus lo kuoy go tamot lo Yusup go sui Barnabas so gemang temuit. Sui ngganemot go seni: ngengam-yakay-a tetaling go sedue. Seni: nemot logo sedue meno nogo yakay mea semu.