Sura ni Paulus paramulana nipakatuka todea nu Allata ri
Korintus
Petabe
1:1-3
1
1 Sura ei lako si yaku i Paulus, to niongko nu Allatala najadi suro ni Yesus Kristus, pade lako si Sostenes sarara-ta saongu kaparisayaa, 2 nipakatuka todea nu Allatala ri ngata Korintus, to nipokiomo nu Allatala najadi todea-Na to nipatani, apaa nosaongu raramo ante i Yesus Kristus. I komi nipokio najadi todea nu Allatala noroa-roa ante tou lako ri sumawee dunia to nenomba si Yesus Kristus, to najadi Pue-ra pade Pue-ta. 3 Towe rara pade kasanaa lako ri Allatala, Tuama-ta, pade lako si Pue Yesus Kristus mamporoasi komi.Posukuru
1:4-9
4 Yaku mosukuru oa si Allatala sabana kabelo nu rara-Na si komi to nosaongu rara ante i Yesus Kristus. 5 Katuwu-mi nipakasugi-Na ri rara nu ngila ngayana apaa i komi nosaongu raramo ante i Yesus Kristus. Niweika-Namo komi kapandea nololita bo ngila ngaya nu panguncani nabelo. 6 Nuanu ee nopanotosi bakote kareba nancambelai i Kristus nolari mpuumo ri rara-mi, 7 nangkajadika komi tado nakakuranga sangayaa mpuumo pampakule to niwei nu Inosa Gasa, bula-mi nampopea i Yesus Kristus marata pade mampopakalio koro-Na ri sumawee tou. 8 I Yesus Kristus dodo mbii kana mampakaroso oa komi duuna ri eo kaopuana, bona ri tempo-Na marata mpanculi, tado mapusa-komi ra rata. 9 Allatala mamala oa raparisaya, Ia-mo Allatala to nampokio komi bona mosaongu rara ante Ana-Na, i Yesus Kristus, Pue-ta.
Posimpogara riolo todea nu Allatala
1:10-17
10 Sarara-sarara, ante kuasa to niwei nu Pue-ta i Yesus Kristus, ku perapi bona i komi masintuwu, nemo maria posimpogara riolo-mi. I komi kana mosaongu rara bo mosaongu pekiri. 11 Apaa naria tou lako ri sou ni Kloe nanguli si yaku bakote naria posisala riolo-mi. 12 Patuju nu lolita-ku ei bakote naria to riolo-mi nanguli: “Yaku to pantutu i Paulus” Naria mbii tou ntanina nanguli: “Yaku to pantutu i Apolos.” Tou ntani mbiina nanguli: “Yaku to pantutu i Petrus,” pade tou ntani mbiina nanguli: “Yaku to pantutu i Kristus.” 13 I Kristus tado mamala matebagi-bagi. I Paulus tado namate ri kou salib nantolosi jeko-mi. I komi mbii tado nibaptis bona majadi topantutu ni Paulus. 14 Etumo yaku nosukuru tado namo saduaa lako riolo-mi to nibaptis-ku, aga i Krispus pade i Gayus ngkola-da to nibaptis-ku. 15 Nemo maria ba sadua mpuumo to manguli bakote yaku nobaptis-ya bona majadi topantutu-ku. 16 Pade ri Stefanus sancou yaku mbiida nobaptis-ra. Agiana ntanina lako ee, noto rara-ku, tadomo naria tou ntani nibaptis-ku. 17 I Kristus nantudu-ku majadi suro-Na tado bona mobaptis tou, agiana bona mampopowole Kareba Belo. Nuanu ee nipowia-ku tado ante kapandea nololita nantutu pekiri nu manusia, apaa tado madota-ku kuasa kamate ni Kristus ri kou salib ee majadi tado maria bunduna.
Kapandea nu Allatala pade kapandea nu manusia
18 Tou-tou to kana maropu nanguli bakote kareba nancambelai kamate ni Kristus ri kou salib nuanu nadoyo. Agiana i kita to nipakasasalama nu Allatala, nanguncani bakote lako ri kamate ni Kristus ee-mo, Allatala nampopakalio bakote Ia mpuu-mpuu nakuasa. 19 Apaa ri rara Buku Nagasa nitulisi:
“Yaku kana mampalawa liwo nu tou-tou to nabija
pade mampakalipo liwo nu tou napande.”
20 Jadi, nuapamo lotuna tou napande? Nuapamo lotuna topande ri Buku Taurat? Nuapamo lotuna to napande nololita ri dunia ei? Nipopakaliomo nu Allatala bakote sumawee kapandea nu manusia ee tado naria lotuna. 21 Apaa noudamo beiwa kapandea nu manusia, tado mamala-ya manguncani Allatala lako ri kapandea dodo-na. Agiana apaa Allatala nabija, nangkajadika-Ya nadota mampakasalama tou-tou to namparisaya-Ya, ri rara nu kareba to nipopowole-ka nuanu niuli nu dunia aga lolita to tado naria bunduna. 22 Apaa tou-tou to Yahudi nerapi kadupana, pade tou-tou tado to Yahudi nangonco kapandea ante pekiri dodo-ra. 23 Agiana ikami nampopowole kareba nancambelai i Kristus to nisalibkanmo. Kareba ee newali kareba nampoposesaa to Yahudi. Pade tou tado to Yahudi nanguli kareba ee newali kadoyoaa. 24 Agiana i Kristusmo kuasa pade pande nu Allatala ri sumawee tou to nipokiomo nu Allatala, to Yahudi pade tado to Yahudi. 25 Apaa pepatuduki nu Allatala to niuli doyo ee neliupa kabijana lako ri kapandea nu manusia. Pade inggu-inggu nu Allatala to niuli nalente neliupa karosona lako ri karosoa nu manusia. 26 Ande petora sarara-sarara, beiwa tari-mi tempo nu Allatala nampokio komi! Saodi ngkola lako ri olomi to nabija ri pangkalioaa nu manusia. Tado nadea lako ri olomi niuli tou bete ba tou nasugi. 27 Agiana nitungkeida nu Allatala nampelisi tou-tou to nantutu pekiri nu manusia niuli nadoyo bona mampakaeya tou-tou to nabija. Pade Allatala mbii nampelisi tou-tou to nantutu pekiri nu manusia niuli nalente ri dunia ei bona mampakaeya tou-tou to nakuasa. 28 Allatala nampelisi to niuli tado nasipato, nikanene, tado niparalou nu dunia ei, bona Allatala mampopogampotaa to niuli nu dunia ei nasipato pade ni paralou. 29 Allatala nowia ee bona tado maria tou mampomole korona ri ngayo nu Allatala. 30 Allatala dodomo nampoposangkani komi ante i Kristus Yesus. I Kristusmo newali ulu nu kapandea-ta lako si Allatala. Pade i Kristusmo nowia-ta nakono ri ngayo nu Allatala, pade Ia mbiimo to nopajadi-ta todea-Na to nipatani pade nampakabebasi-ta lako ri jeko. 31 Etumo, ewa to nitulisi ri rara nu Buku Nagasa: “Bayema-yema mpuumo to mampomole, pomolemo nuapa to nipowiamo ni Pue.”