2
1 Sarara-sarara, tempo-ku narata si komi noparata liwo nu Allatala to tadopa nincani nu dunia, tado nipololitaka-ku komi ante kapandea lako ri dunia ei ba ante lolita-lolita namomi. 2 Apaa nibotusi-kumo bakote sinungka-ku mamporoasi komi, yaku kawule mampololita mancambelai i Yesus Kristus bo mancambelai kamate-Na ri kou salib. 3 Tempo-ku natida namporoa komi, koro-ku nalente pade naeka mpuu, nangkajadika koro-ku nokasiridi. 4 Kareba to niparata-ku si komi tado niuli-ku ante lolita namomi nantutu kapandea nu manusia, agiana ante kuasa to niwei nu Inosa Gasa to naponu ante kuasa ee. 5 Yaku nowia ewa ee, bona kaparisayaa-mi si Kristus tado mantutu kapandea nu manusia, agiana mantutu kuasa nu Allatala.Kapandea to nakono
2:6-16
6 Noudamo ewa ee, riolo nu tou-tou to narosomo kaparisayaa-na, yaku nampololitaka-ra nancambelai kapandea. Agiana kapandea ee tado lako ri dunia ei, ba lako ri to nakuasa tempo ei, to kakuasaa-na kana mamala malipo. 7 Kapandea to niuli-ku, eemo kapandea lako ri Allatala. Kapandea ee tado nincani nu manusia ri dunia ei. Agiana sintou tadopa nipajadi dunia ei, noliwo amimo Allatala mampopanguncanika kapandea-Na ee bona i kita mamparasai pampemabose-Ya. 8 Tado naria namo saduaa to nakuasa ngkapuri ei nanguncani kapandea ee. Apaa ande nincani-ramo, tantu tado rasalibkan-ra i Pue-ta to nipemabose ee. 9 Agiana ewa to nitulisi ri Buku Nagasa:
“Nuanu to tado naria nikalio ba nironge nu manusia, ba neumba ri pekiri nu manusia, sumaweena ee nipasadiakamo nu Allatala ri tou-tou to nampotowe-Ya.”
10 Agiana nipanotosimo nu Allatala kapandea ee si kita ri rara nu inosa-Na. Apaa Inosa ee nanguncani pura ngila ngayana, duuna ri liwo nu Allatala to nipontoliro ee. 11 To nanguncani pekiri nu tou aga tou dodo ee. Iwee mbii ante Allatala. To nanguncani pekiri nu Allatala aga Inosa Gasa dodo. 12 Tado kapandea lako ri dunia ei nitarima-ta, agiana Inosa Gasa to nitarima-ta bona tancani bakote sumawee nuanu niwei nu Allatala si kita lako ri kabelo nu rara-Na. 13 Eemo sabana, ande i kami mopanotosi sumawee nuanu nancambelai Allatala ri tou-tou to nantarimamo Inosa Gasa, tado niuli-ka nantutu kapandea nu manusia, agiana nantutu pepatuduki Inosa Gasa. 14 Tou to tado nantarima Inosa Gasa, tado mamala mantarima nuanu lako ri Inosa Gasa, apaa nipekiri na sumawee nuanu ee tado naria lotuna. Tou ee tado nanguncani, apaa nuanu ee mamala rancani kawule ante penini nu Inosa Gasa ngkola. 15 Tou to nantarima Inosa Gasa, mamala manguncani ngila ngayana, agiana tado naria tou ntani to mamala manguncani isi nu pekiri-na 16 Ri rara Buku Nagasa nitulisi: “Yema to nanguncani pekiri ni Pue? Pade yema mamala mopatuduki-Ya?”
Agiana i kita to neparisaya, pekiri-ta nasimbei ante pekiri ni Kristus.