Pombebili
3:1-9
3
1 Sarara-sarara, tado mamala-ku mololita si komi nasimbei ewa mampololitaka tou to nantarimamo Inosa Gasa. Yaku kawule mamala mololita si komi ewa mampololitaka tou to natuwu nantutu dota nu dunia, to tadopa natoualu peparisaya-na si Kristus. 2 Impia komi kawule niweikaka-ku kondia nu analei, tado kondia nu tou natoualu, apaa tadopa nipakule-mi nangkondi kondia nakoo. Agiana ngkapuri ei mbiipa, tadopa nipakule oa-mi nangkondi kondia nakoo, 3 apaa i komi natuwu nantutu inggu nu dunia ei-dapa. I komi nombesingki bo nombepobali. Inggu ewa ee nampopakalio bakote i komi nantutu dota rara dodo-mi nasimbei ante tou to tadopa nanguncani Allatala. 4 Sadua nanguli: “Yaku topantutu i Paulus”, pade sadua mbii nanguli: “Yaku topantutu i Apolos.” Nuanu ee nampopakalio bakote i komi natuwu nasimbei ewa tou to tadopa nanguncani Allatala. 5 Yema i Apolos, pade yema mbii i Paulus? Ikami ei kawule batua nu Allatala to nangkenimo komi bona meparisaya si Kristus. Ikami kawule nampowia bago to niwei ni Pue si kami. 6 Yaku nantuda, i Apolos nodundesi tinuda ee, agiana Allatala-da to nampakatuwu tinuda ee. 7 Jadi, topotuda bo topodundesi tado gaga niparalou, agiana to niparalou mpuu aga Allatala, apaa Ia-da to nopatuwu tinuda ee. 8 Topotuda bo topodundesi nasimbei, isira simbu-simbu mantarima tombo mantutu kantomo nu bago to niwei nu Allatala si sira. 9 Ikami noroa sampobagoa, nampobagoka Allatala, pade ikomimo bonde nu Allatala.Ikomi mbiimo sou nu Allatala.
Parawatu pade sou
3:10-23
10 Lako ri towe rara nu Allatala, yaku nipajadi-Na basi bona mowia parawatu nu sou, pade tou ntani mopatinda sou ri wumbu nu parawatu ee. Butu tou kana mampeirara mpuu-mpuu beiwa-ya mopatinda sou ri wumbu nu parawatu ee. 11 Apaa Allatala dodomo to nopajadi i Yesus Kristus najadi parawatu nu sou ee, tado naria parawatu ntanina. 12 Naria tou nopatinda sou ri wumbu nu parawatu ee nampake bulawa, naria nampake salaka, naria to nampake watu to nasuli olina, naria mbii to nampake kou, kawoko nabangi ba dami nu pae. 13 Bundu ngkabago nu butu dua tou kana manoto rakalio ngoni ri eo ngkarata mpanculi ni Yesus Kristus. Sabana eo ee kana marata ante apu mosuwe pobagoa nu butu dua tou. Apu ee mopadupa kabelo mpobago nu butu dua. 14 Ande sou nipatinda ri wumbu nu parawatu etu tado mapumpu rasuwe nu apu, to nopatinda sou ee kana mantarima tombo-na. 15 Agiana ande mapumpu, topotinda sou ee kana marugi. Noudamo iwee ia kana rapakasalama, agiana ia ewa tou to nangani lako ri rara apu ranca nu sou-na napumpu. 16 Kakono-konona, ikomi kana manguncani bakote i komimo sou nu Allatala, pade Inosa Gasa-Na natida riolo-mi. 17 Ande maria tou mampakagero sou nu Allatala, ia kana nasuku mate nu Allatala, apaa sou nu Allatala nagasa. I komimo sou nu Allatala ee.
18 Nemo maria saduaa to mampabagiu koro dodo-na. Ande maria riolo-mi to nampekiri bakote ia napande ri pangkalioaa nu manusia, agina ya-mo majadi madoyo ri pangkalio nu manusia, bona mpuu-mpuu majadi mapande-ya ri pangkalio nu Allatala. 19 Apaa to nireke napande ri pangkalioaa nu manusia, nireke nadoyo ri pangkalioaa nu Allatala. Ri rara Buku Nagasa naria nitulisi: “Allatala nampanawu tou-tou napande ante kapandea dodo-ra” 20 Naria mbii nitulisi ewa ei: “I Pue nanguncani bakote pekiri-pekiri nu tou-tou napande ee tado naria gunana” 21 Ee-mo sabana, nemo maria namo saduaa tou mampomole koro-na najadi topantutu nu tosaduana, apaa ngila ngayana niweikakamo komi majadi bagia-mi: 22 I Paulus, i Apolos, i Petrus, dunia ei, katuwua bo kamatea, tempo ei, ba ri eo ngkapurina ngoni, sumaweena ee najadi bagia-mimo. 23 I komi najadi bagia ni Kristus, pade i Kristus najadi bagia nu Allatala.