I Pue ngkola topetangara
4:1-5
4
1 I kami ei kana mireke batua ni Kristus to niparisaya nu Allatala mampowowole lolita-Na to tadopa nincani nu manusia. 2 Pade to niparalou lako ri batua aga matundu mantutu parenta nu maradika-na. 3 Agiana yaku, tado nipopusi-ku petangara-mi ba petangara nu manusia ntanina nancambelai-ku. Tado mbii madota-ku motangara dodo koro-ku. 4 Nanoto rara-ku, tado naria kasalaa-ku. Agiana nuanu ee tado nopadupa bakote tado naria kasalaa-ku. I Pue dodo damo to mobotusi ba naria kasalaa-ku, ba tado. 5 Ee-mo sabana, nemo metangara komi, apaa tadopa tempona. Popeamo tempo karataa mpanculi ni Pue ri dunia ei ngoni. Ia-mo to kana mopanotosi sumawe nuanu niwunika ri kadediana tempo ei. Ia-mo to kana mampopeumba sumawee nuanu niwunika nu manusia ri rara-na. Ri tempo ee-da pade butu dua tou mantarima peune to masipato lako ri Allatala.Pakaedemo rara-mu
4:6-21
6 Sarara-sarara, sumawee nuanu niuli-ku ee see, nipambela-ku ri koro dodo-ku pade si Apolos, bona mantulungi komi. I kami rodua ei nipajadi-ku jonjo bona nemo meguru komi meliu lako ri nuanu to nitulisi ri rara Buku Nagasa. Patujuna bona nemo maria sadua lako riolo-mi mampakalangko rara-na ante mangune to saduana, pade mangkanene tou ntanina. 7 Yema nanguli neliupa komi lako ri tou ntani? Nuapa to naria si komi, to tado nitarima-mi lako si Pue? Jadi, nuapa pade nalangko rara-mi? Niuli-mi nuanu to naria si komi ee bundu nu popaeloa dodo-mi? 8 Niuli-mi nagana puramo nuanu to naria si komi. Nasugimo komi. Najadi mbagoumo komi. Agiana i kami tado. Nabeloloumo ande mpuu-mpuu najadi mbagoumo komi, bona mamala-ka moparenta moroa-roa ante i komi. 9 Ande pamparata-ku, ikami suro ni Yesus ei, nipajadi nu Allatala tou to netowei mpuu ri dunia ei. Ikami nasimbei ante tou to nikeni rasuku mate ri ngayo nu tou dea pade nikadombosi nu sumawee isi dunia bo malaeka-malaeka ni Pue. 10 Ikami ei nadoyo apaa i kami topantutu i Yesus, ikomi-da to napande sabana i Kristus. Ikami nalente, agiana ikomi naroso. Ikomi niune nu tou-tou, agiana ikami nikanene.
11 Duuna ri tempo ei, ikami nantodosaka oro, beiwuu, tado nowaru belo, ninampa pade tado naria pearia-ka natatapu. 12 Ikami nobago ntomo ante pale dodo-ka. Ande napokaranalaka-ka nu tou, nibalasi-ka ante petiroi, ande raduasi-ka, i kami nancabara dodo. 13 Ande maria tou mangulikaka-ka mada-daa, ka-sonoi ante maulu. I kami nikalio ewa rumpu nu dunia, duuna tempo ei-ka nikalio ewa rumu nu ngila-ngayana.
14 Yaku notulisi sura ei si komi tado bona mampakaeya komi, agiana bona mopatuduki komi ewa ana-ana-ku to nipotowe-ku. 15 Apaa noudamo rinjobunamo guru to mampatuduki komi mantutu i Kristus, tado naria-ra to najadi tuama-mi. Aga yaku to najadi ewa tuama-mi, apaa yaku-da to paramaula ntotona noparata Kareba Belo si komi. 16 Ee-mo sabana, ku perapi mpuu-mpuu si komi bona mantutu jonjo to niwei-kumo si komi. 17 Ee-mo pade nitudu-ku i Timotius malou si komi. Ia to namparisaya i Pue pade nipajadi-ku ewa ana dodo-ku to nipotowe mpuu-ku. Ia mamala raparisaya. Ia damo mampopatora komi beiwa inggu-ku tempo-ku namparisayamo i Kristus ewa to nipatudukika-ku todea nu Allatala riumba-umba ngata ku-kalouii.
18 Agiana basangkia dua tou najadi nalangkomo rara-ra, apaa niuli-ra tadomo tulou-ku mampotomuka komi. 19 Agiana ande napodota ni Pue, tadomo masae-ku tulou si komi. Ri tempo ee damo ngoni pade ku kalio nuapa to mamala napowia nu tou to nalangko rara-ra ee. Kukalio ba mpuu-mpuu nakuasa-rada ba kawule lolita ngkola-rada. 20 Apaa ande to najadi todea nu Allatala-mo, kuasa nu Allatala kana rakalio ri rara ngkatuwu-na, tado kawule ri lolita ngkola-na 21 Jadi pelisimo nuapa to nipobelo-mi? Yaku marata si komi ante pepatuduki nasarepa ba ante pepatuduki naolu bo ante towe rara-kuda?