Jeko riolo todea nu Allatala
5:1-13
5
1 Nironge-ku riolo-mi naria topogou sala. Naria sadua tou nobualosi ante bangkele nu tuama-na. Tou to tado nanguncani Allatala mpuu-mo mbii tado nadota nowia gou ewa ee. 2 Noudamo iwee, nalangko oa-dapa rara-mi. Kakono-konona kana matudumbukuda rara-mi, pade mampopangani tou to nogou sala ee lako riolo-mi. 3 Noudamo nakawao-ku lako si komi, pekiri-ku namporoasi oa komi. Jadi nibotusi-kumo bakote tou to nowia inggu nadaa ewa ee kana rasuku. 4 Tempo-mi nosintobu, pekiri-ku naria namporoasi komi, jadi ri rara kuasa nu Pue-ta i Yesus, 5 ikomi kana mambei tou ee ri rara kuasa nu Mbagou Seta. Powia ewa ee bona woto-na rasuku duuna mamate, agiana inosa-na rapakasalama tempo ni Pue marata mpanculi. 6 Tado masipato komi malangko rara. Apa tado nincani-mimo porapaika ei: “Ragi sodi ngkola, mamala mampopempene sumawee gando nu roti” 7 Jadi, tadiakamo ulu ragi nasae ee, bona i komi majadi gando nu roti to nabou, narawa lako ri ragi nu jeko to nasae, pade nincani-kuda bakote i komi ewa ee amida. Sabana posusa Paskah-ta nasadiamo, apaa i Kristus to najadi bimba Paskah-ta ee nipatesimo bona majadi tinuwu-ta. 8 Ee-mo sabana, kameitamo mowia susa bete Paskah-ta ante roti to tado nampake ragi, roti to najadi pampopatora kagasa pade sumawee nuanu to nampakawoe rara nu Allatala. I kita kana meuntumo mowia inggu nadaa pade matuwu ante inggu nabelo bo nanoa. 9 Ri rara nu sura-ku lombona, niulikaka-kumo komi bona nemo mowega ante tou to nogou sala. 10 To najadi patuju-ku ei, tado nantudu komi bona nemo mampowega sumawee to nogou sala, ba to nadoko, ba topebagiu, ba to nenomba ri karampua ba tou to mpuu-mpuu tado nanguncani Allatala. Apaa ande mi kawaosi-ra, kakono-konona ikomi kana mangkosu lako ri dunia ei. 11 Agiana to najadi patuju-ku bona nemo mipowega tou to nangaku namparisaya i Pue agiana tou ee nogou sala, ba nadoko, ba nenomba ri karampua, ba nampomadaa tou ntani, ba nalangu, ba topangio. Nemo mpuu mi poroasi tou ewa ee mangkondi. 12 Apaa tado bago-ku mantangara tou to tado namparisaya i Pue. Agiana ande todea nu Allatala, ikomi dodo-da to kana mantangara-ra. 13 Tou to tado namparisaya i Pue, kana natangara nu Allatala. Ri rara Buku Nagasa nitulisi: “Wuramo tou to nowia nuanu to nadaa lako riolo-mi.”