Nangonco kanoaa ri tou-tou to tado neparisaya
6:1-11
6
1 Nuapa pade naria riolo-mi to nabia nampangaduka sarara-na saongu kaparisayaa ri topotangara to tado namparisaya i Yesus. Nuapa pade tado nibua-mi kara-kara-mi bona ratangara nu todea nu Allatala? 2 Tado nincani-mi bakote todea nu Allatala kana motangara dunia ei? Jadi, ande i komi to kana motangara dunia ei, natantumo kana mi-pakule mbii mantangara kara-kara kodi. 3 Tado nincani-mi bakote i kita mbii kana mantangara malaeka-malaeka? Kana tapakule mbii mantangara kara-kara ri rara nu katuwua-ta eo-eona. 4 Jadi, ande maria kara-kara ewa ee meumba, nuapa pade rabua ri topotangara to tado masipato mantangara todea nu Allatala? 5 Nepakaeya mpuu! Tado gagamo naria kambana sadua mpuumo riolo-mi to nabija bona mampakule mobotusi kara-kara nu sarara-na saongu kaparasiyaa? 6 Ba ande maria riolo-mi to mombepobungkaka, masipatoda komi merapi ri tou to tado neparisaya si Kristus motangara kara-kara-mi? 7 Naria saodi ngkoladapa pombebili riolo-midapa, najadi kadagia-mimo ee. Agilounamo komi rapoewee-wee ba rapakarugi. 8 Agiana i komi dodo mbii nampoewee-wee sarara-sarara-mi saongu kaparisayaa pade nampakarugi-ra. 9 Tado nincani-mi bakote tou to tado nantutu dota nu Allatala tado mamala majadi todea nu Allatala?Nemo matebagiu komi. Tou-tou nogou sala, tou to nenomba ri karampua, to nobualo, baleilo to nombepogou simbu baleilo, 10 tou to nangio, to nadoko, to nalangu, tou to nopanawu tou ntani, pade tou to nangago nuanu nu tou ntani sumawee-ra ee tado mamala majadi todea nu Allatala. 11 Basangkia dua komi impia noinggu ewa ee. Agiana ngkapuri ei nipakarawamo komi lako ri jeko. Ikomi nipajadi todea to nipatanika Allatala pade nipakakono nu Allatala ri rara sanga ni Pue Yesus Kristus pade ri rara nu Inosa Gasa nu Allatala-ta.
Pedederi bona nemo mogou sala
12 Naria to nanguli bakote sumawee tou mamala mowia ngila ngayana. Agiana ande pamparata-ku, tado sumawee nuanu to nipowia-ta ee noguna. Jadi noudamo mamala-ku mowia ngila ngayana, agiana tado madota-ku mampalambaka koro-ku nakuasai nu banuapa-pa mpuumo. 13 Naria mbii to nanguli bakote kondia rakeisini ri tei, pade tei nipasadia bona rapokeisini kondia. Agiana nuanu rongaya ee kana napakaropu nu Allatala. Woto nu manusia tado mamala rapake bona mogou sala, agiana kawule rapake mampowia dota ni Pue. I Pue kana mopasisi woto ee. 14 Allatala nopatuwu mpanculimo i Pue Yesus lako ri kamatea, Allatala mbii kana mopatuwu mpanculi-ta ante kuasa-Na. 15 Tado nincani-mi bakote woto-mi bagia lako ri woto ni Kristus? Kana ku-ala sabagia woto ni Kristus pade mowia gou sala? Kakono-konona tado mamala! 16 Ba tadopa nincani-mi bakote tou to nampogou bangkele to tado naowo, najadi nosaongu woto ante bangkele ee? Apaa ri rara Buku Nagasa nitulisi: “Isira rodua ee kana majadi saongu woto” 17 Agiana tou to nambei woto-na si Pue, tou ee najadi nosaongu rara ante i Pue. 18 Ee-mo sabana, tado mpuu mamala komi mogou sala. Sumawee jeko ntanina to nipowia nu manusia, najadi ri sawaliku nu woto-na. Agiana tou to nogou sala, nampakajeko koro dodo-na. 19 Toramo bakote woto-mi ee pearia nu Inosa Gasa nu Allatal, to natida ri rara-mi. Allatala dodomo to nambei Inosa Gasa ee si komi. Woto-mi etu tado ikomi dodo tumpuna, agiana Allatala-da tumpuna. 20 Niolimo komi nu Allatala pade naopu puramo nibayari-Na oli-mi. Ee-mo sabana pakemo woto-mi bona mampemabose Allatala.