Pepatuduki nancambelai poncamboko
7:1-16
7
1 Tempo ei-ku madota manconoi pepekutana-mi to nitulisi-mi ri rara nu sura: Nakonoda nabelopa ande baleilo tado mobangkele. 2 Agiana bona nemo mowia nuanu to tado masipato, aginamo baleilo maria dodo bangkele-na pade butudua bangkele maria dodo baleilo-na. 3 Baleilo kana mopaganai kaparalouaa nu bangkele-na, pade bangkele mbii kana mopaganai kaparalouaa nu baleilo-na 4 Bangkele to nobaleilomo tado nakuasa ri woto-na dodo, to nakusa ri woto-na aga baleilo-na. Iwee mbiida baleilo tado nakuasa ri woto-na dodo, to nakuasa ri woto-na aga bangkele-na. 5 To noncambokomo, nemo mombekawaosi. Mamalada mombekawaosi singoni, ande rapasitujui sangkani. Patujuna ee bona maria loga mosambaya. Agiana maopu ee, kana manculiki moncamboko. Ande tado ewa ee, mamala komi ngoni napesori nu Mbagou Seta apaa tado nipakule-mi motahangi dota rara-mi. 6 Yaku nanguli ei tado najadi parenta agiana najadi pepatuduki. 7 Kakono-konona nipobelo-kupa ande sumawee tou maloa ewa yaku. Agiana butu dua tou sore-sore niweikamo pampakule lako ri Allatala, to saduana niwei pampakule ewa ei, to ntanina niwei pampakule ewa etu. 8 Agiana ri tou-tou to tadopa noncamboko pade ri tobalu-tobalu, eimo pepatuduki-ku: Nabeloloupa komi matuwu maloa ewa yaku. 9 Agiana ande tado mamala-ra motahangi rara, agina moncamboko. Sabana nabeloloupa moncamboko bona nemo dota rara ee mampakapumpu-ko.10 Pade ri tou to noncambokomo eimo parenta lako si Pue Yesus, tado lako si yaku: “Bangkele nemo mampogaaka baleilo-na” 11 Agiana ande napogaakamo baleilo-na, tado mamala-ya mobaleilo ntani, agilou namo manculiki-ya ri baleilo-na. Pade baleilo mbii tado mamala mampogaaka bangkele-na.
12 Ri tou ntanina mbii, eimo parenta lako si yaku, tado lako si Pue Yesus: Ande maria baleilo to namparisaya i Kristus pade bangkele-na tou tado namparisaya i Kristus, agiana bangkele ee madota matuwu mosangkani ante ia, tado mamala-ya mampogaaka bangkele ee. 13 Pade ande maria bangkele to namparisaya i Kristus mampobaleilo tou to tado namparisaya i Kristus, agiana baleilo ee madota matuwu mosangkani ante ia, tado mamala-ya mampogaaka baleilo ee. 14 Apaa baleilo to tado neparisaya ee nipakasipatomo majadi todea nu Allatala sabana poncamboko-na ante bagkelena to jadimo todea nu Allatala. Iwee mbii bangkele to tado neparisaya nipakasipatomo majadi todea nu Allatala, sabana poncamboko-na ante baleilo to najadimo todea nu Allatala. Apaa ande tado ewa ee, ana-ana-ra masimbei ewa ana-ana nu tou to tado neparisaya. Bo ee ngana-ngaga ee nireke najadi todea nu Allatala. 15 Agiana ande tou to tado neparisayaa ee madota mogaa, palambaka-yamo mogaa. Ande ewa ee, toneparisaya tadomo nitaka nu ada mponcamboko, apaa dota nu Allatala i komi kana matuwu mosingkabelo. 16 Apaa i komi bangkele to neparisayamo si Pue, beiwamo kamala-mi manguncani mpuu-mpuu bakote i komi tado mamala mampakasalama baleilo-mi? Iwee mbii baleilo to neparisayamo si Pue, beiwamo kamala-mi manguncani mpuu-mpuu bakote i komi tado mamala mampakasalama bangkele-mi?
Matuwu ewa tempona nipokio nu Allatala
7:17-40
17 Butu dua tou kana matuwu ewa tempo nu Allatala nampokio-ya bona meparisaya si-Ya. Eimo atura to nipepatudukii-ku ri butu dua todea nu Allatala. 18 Rapana, ande tempo nu Allatala nampokio komi, nitindimo komi, nemo mi-pesimbukui mogempu pampetonondi petindi ee. Iwee mbii ande tempo nu Allatala nampokio komi, tadopa nitindi komi, nemo mampopetindi komi. 19 Apaa tado naria lotuna mantutu ba tado mantutu ada petindi. To niparalou mpuu-mpuu aga matundu ri parenta nu Allatala. 20 Butu dua tou kana matuwu ewa tempo-na nipokio nu Allatala majadi topeparisaya. 21 Ande tempo-mi nipokio, i komi najadi batua, nemo masusa rara-mi mampekiri nuanu ee. Agiana ande maria loga mi-rata bona mamala mabebasi, pakemo loga ee. 22 Sabana batua to neparisayamo si Pue, nipakabebasi-yamo ni Pue. Pade tou nabebasimo to namparisayamo i Pue, ia-mo batua ni Kristus. 23 Niolimo komi nu Allatala pade nibayari-Na naopu-opu. Ee-mo sabana, nemo mi-wei koro-mi majadi batua nu manusia. 24 Jadi, sarara-sarara, noudamo babeiwa dala ngkatuwu-mi tempo-mi nipokio, ikomi kana matuwu ewa ee dodo moroa ante Allatala.
25 Nancambelai torandaa, tado naria parenta lako si Pue nancambelai-ra. Agiana ku-ulikaka komi pamparata dodo-ku. Apaa nipopakaliomo ni Pue towe rara-Na to nabete mpuu ee si yaku, jadi nipekiri-ku pedederi ei mamala raparisaya. 26 Jadi pamparata-ku iwei: Nantora ngila ngaya peduasi to nirasai tempo ei, nabelopa ande i komi matuwu ewa katuwu-mi ngkapuri ei dodo. 27 Ande rapana nobangkelemo komi, nemo mi-onco dala bona mampogaaka bangkele-mi. Ande tadopa nobangkele komi, wetumo mobangkele komi. 28 Agiana ande nibotusi-mimo bakote moncambokomo komi, tado mi-pojeko ee. Iwee mbiida ande sadua torandaa mobaleilo, tado na-pojeko ee. Agiana mi-tora, butu dua to noncamboko kana mamparasai ngila ngaya nu kasusaa. Jadi nuanu nipodota-ku bona ikomi tado mamparasai kasusaa ee. 29 Patuju-ku ewa ei sarara-sarara: Ikita toneparisaya kana mantora bakote tadomo masae tempo-ta. Jadi mopamula lako ri eo ei, tou to nobangkele kana matuwu ewa tou to tado nobangkele, 30 tou to nokeo kana matuwu ewa tou tado naria susa rara-na, tou to nangoli banuapa-pa, kana matuwu ewa tou to tado naria nangoli banuapa-pa. Pade ande i komi nadonu, katuwumo ewa tou to tado nadonu. 31 Pade tou to samata nampekiri katuwu-ra ri dunia ei, kana matuwu ewa tou to tado namposesewa gagu-gagu ee. Apaa tadomo masae dunia to nikalio-ta tempo ei, kana malipo. 32 Nuanu nipodota-ku bona mabebasi komi lako ri kasusaa. Tou to tado nobangkele mopasaongu pekiri-na mampobagoka i Pue, apaa ia madota mampakawoe rara ni Pue. 33 Agiana tou nobangkelemo mampekiri nuanu ri dunia ei, apaa ia madota mampakasana bangkele-na, 34 nangkajadika pekiri-na norandua. Bangkele to tadomo nobaleilo pade torandaa-torandaa kana mopasaongu pekiri-ra mampobagokan i Pue, apaa isira madota mambei woto bo inosa-ra si Pue. Agiana bangkele to nobaleilomo, nampekiri nuanu ri dunia ei, apaa ia madota mampakasana rara nu baleilo-na.
35 Sumaweena ei niuli-ku bona majadi kabeloa-mi, tado bona mantagi komi mowia banuapa-pa. Nuanu nipodota-ku bona i komi mowia nuanu nakono bo masipato, bona mamala komi mampalayani i Pue ante kabelo-belona. 36 Ande sadua baleilo nampekiri bakote ia tado nowia nuanu nasipato ri simpokono-na, pade tado mamala-ya motahangi dota rara-na, agilounamo moncamboko-ra ande nipekiri-na bakote ewa ee-mo nuanu to masipato na-powia. Tado rapojeko ee. 37 Agiana ande sadua baleilo nobotusimo ri rara-na bakote tado-mo na-pobangkele simpokono-na, pade nuanu ee najadi dota dodo-na bo mpuu-mpuu mamala-yada motahangi dota rara-na, nabeloluopa ande tado na-pobangkele simpokono-na ee. 38 Jadi, to nampobangkele simpokono-na nowia nuanu to nabelo, pade to tado nampobangkele simpokono-na nowia nuanu neliupa kabelona. 39 Bangkele to nobaleilomo tado mamala moncamboko ante tou ntani sinungka nu baleilo-na matuwudapa. Ande mamatemo baleilo-na, bangkele ee mamala mobaleiloki ante to nipokono nu rara-na, asala baleilo ee to neparisaya si Pue Yesus. 40 Agiana ande pamparata-ku, masana loupa katuwu-na ande tadomo mobaleiloki-ya. Agiana nipekiri-ku bakote lolita to niuliku ee lako ri Inosa Gasa nu Allatala.