Nancambelai penomba ri karampua
8
1 Kapolana ku panotosika komi nancambelai kondia to nipopenomba ri karampua. Nakono amida to niuli nu tou: “Sumawee-ta napande pura.” Agiana kapandea ewa ee nampakalangko rara nu tou. Aginamo ikita mepotowe, apaa pepotowe ee nampakaroso rara nu tou. 2 Ande maria tou nanguli bakote nadeamo nuanu nincani-na, kakono-konona tadopa nincani mpuu-na nuanu to masipato na-ncani. 3 Agiana tou to mpuu-mpuu nampotowe Allatala, ia nincanika nu Allatala.4 Jadi nancambelai mangkondi kondia to nipopenomba ri karampua, nincani-ta bakote: “Tado naria karampua ri dunia ei to mpuu-mpuu natuwu. Pade nincani mbii-ta bakote Allatala sadua ngkola, tado naria ntanina.” 5 Nadea amida to nikasangai allatala pade pue to naria ri langi bo ri dunia, 6 agiana si kita to neparisaya, kawule sadua ngkolada Allatala. Ia-mo Tuama-ta to nopajadi ngila ngayana, pade katuwu-ta kawule ta-wei si-Ya. Pade kawule sadua ngkola mbi Pue, Ia-mo i Yesus Kristus, to nipopale nu Allatala nopajadi ngila ngayana. Ia-mo to nambei-ta katuwua. 7 Noudamo ewa ee, tado sumawee tou nanguncani nuanu ee. Basangkia dua to impia nenomba ri karampua, duuna ngkapuri ei ande rakondi-ra kondia penombaa ee, nirasai-ra bakote i sira nangkondi kondia to mpuu-mpuu nipopenombamo ri karampua. Jadi, ande rakondi-ra kondia ee, nirasai-ra bakote i sira nasala, apaa tadopa naroso peparisaya-ra. 8 Kondia tado mampowia posingkabelo-ta ante Allatala mantambei mabelo. Ande ta-kondi kondia ee, tado naria bunduna si kita. Bo ande tado ta-kondi, tado mbii marugi-ta. 9 Agiana pakabelo mpuu bona nemo ngoni sarara-mi saongu kaparisayaa to tadopa naroso kaparisayaa-ra, manawu ri rara nu jeko sabana kabebasi-mi mangkondi banuapa-pa. 10 Patuju-ku ewa ei: Rapana i komi, to narosomo kaparisayaa-mi, moncunda mangkondi ri sou penombaa ri karampua, pade nakalio nu tou to tadopa naroso kaparisayaa-na. Natantumo tou ee mbii kana mabia mangkondi kondia to nipopenomba ri karampua ee. 11 Kaopuana, kapandea-mi ee nampakapusa sarara-mi saongu kaparisayaa to tadopa naroso kaparisayaa-na. Bo ee nitolosi-yamo mbii ni Kristus. 12 Pade ande i komi mowia kasalaa ewa ee ri sarara-mi saongu kaparisayaa pade nampakalente kaparisayaa-na to tadopa naroso ee, batuana i komi nowia jeko ri pangkalioaa ni Kristus. 13 Ee-mo sabana, ande kondia to nikondi-ku mampowia sarara-ku manawu ri rara nu jeko, tadomo ku kondi oa kondia ee bona nemo mopanawu sarara-ku.