Kaparalouaa pade nuanu to napowia nu suro
9:1-27
9
1 Kakono-konona tado naria tou nampobatua-ku. Yaku ei suro ni Pue Yesus. Yaku nangkaliomo Pue-ta i Yesus. I komi dodo ei-mo bundu nu bago ni Pue to nipowia-ku. 2 Noudamo tou ntani tado nampangaku bakote yaku ei suro ni Pue Yesus, agiana niparisaya-ku i komi nampangaku bakote yaku ei suro ni Pue Yesus. Apaa katuwumi-mi to nosaongu rara ante i Pue Yesus nopadupa bakote yaku ei suro. 3 Ande maria tou to mampomasala-ku, eimo sono to kana ku'uli.4 Ikami to najadi suro ni Pue Yesus masipato mangkondi bo manginu apaa nobago-kamo 5 I kami mbii masipato mangkeni bangkele-ka mamporoasi-ka ri polumakoa-ka, ewa to nipowia nu suro-suro ntanina, bo sarara-sarara ni Pue Yesus pade i Petrus. 6 Ba nisarumaka-mi kawule yaku bo i Barnabas ngkola to kana mopaelo ante pale dodo-ka? 7 Tado naria surodado notomboi dodo koro-na tempo mpoiwali. Tou to notuda anggur ri bonde-na kana mangkondi wua nu anggur ee. Iwee mbiida topoewu bimba kana manginu susu nu bimba to niewu-na ee. 8 Nuanu niuli-ku ee tado kawule nantutu pekiri nu manusia, agiana nuanu ee mbii nitulisi ri parenta Taurat to nitulisi ni Musa. 9 Ri rara parenta Taurat ee nitulisi ewa ei: “Nemo mowunta ngudu nu japi ranca nu japi ee mancege gando. Palambakamo japi ee mangkondi lako.” Ri rara nu parenta ee, japi to niparalou nu Allatala? 10 Natantumo i kita-da to najadi patuju nu Allatala ri rara nu parenta ee. Parenta ee nirapaika katuwu-ta manusia. Topopajeko bo topancege kana mobago ante mancuramaka kana mantarima saganta bundu nu pobagoa-na.
11 I kami nosawumo lolita nu Allatala si komi. Jadi, tado masipato-ka mancarumaka komi mambeika-ka kaparalouaa ngkatuwu-ka eo-eona? 12 Ande tou ntani mamala mancarumaka banuapa-pa lako si komi, peliu-liunapa i kami.
Agiana tado namo sangkania-ka nerapi petulungi si komi. I kami aga nantodosaka dodo ngila ngaya nu kasusaa bona tado mampopeumba nuanu to mampalawa pampopowole Kareba Belo nancambelai i Kristus to niparata-ka. 13 Nincani-mida bakote tou to nobago ri rara nu Sou nu Allatala namparata pangkondi-ra lako ri Sou nu Allatala. Pade tou to nantulungi todea nangkeni penomba-ra ri sou penombaa kana mamparata saganta lako ri nuanu to nipopenomba ee. 14 Iwee mbiida, i Pue nampakatatapumo bakote tou to nobago nampopowole Kareba Belo kana mantarima kaparalouaa ngkatuwu-na lako ri bago-ra ee.
15 Agiana tado namo sangayaa kaparalouaa-kaparalouaa to kana ka-tarima ee niperapi-ka. Yaku notulisi sura ei tado bona sumawee nuanu ee raweikaka-ku. Agina ku-mo mamate aga nemo mowia ewa ee. Kadonua-ku tado mamala napakaronto nu bayema-yema mpuumo. 16 Apaa ande yaku mampopowole Kareba Belo, tado masipato-ku mampakalangko rara-ku, sabana yaku nitudu nu Allatala mampopowole Kareba Belo ee. Kana maweso mpuu-ku ande tado ku-popowole Kareba Belo ee. 17 Ande rapana dota dodo-ku nowia bago ee, masipato-ku mantarima tombo. Agiana tado dota dodo-ku nampopowole Kareba Belo ee. Ku-podota ba tado ku-podota, kana ku-popowole Kareba Belo ee apaa ee-mo bago to niparisayaka-ku nu Allatala. 18 Jadi, nuapa to kana majadi tombo-ku? Ei-mo tombo-ku: Yaku namala nampopowole Kareba Belo ante tado nitomboi nu ba yema-yema mpuumo. Apaa, tado naria-ku nerapi tombo nu pobago-ku nampopowole Kareba Belo ee.
19 Yaku tado nipobatua nu bayema-yema. Noudamo ewa ee, yaku nopajadi koro-ku nipobatua nu sumawee tou, bona madea tou ku-keni meparisaya si Yesus. 20 Tempo-ku noroa ante to Yahudi, yaku noinggu ewa to Yahudi, bona mamala-ku mangkeni-ra meparisaya si Yesus. Ande tempo-ku moroa ante tou to nantutu Parenta Taurat, yaku mbii ewa tonantutu Parenta Taurat noudamo tadomo nikuasai-ku nu Parenta Taurat. Patuju-ku nowia ee bona mamala-ra ku-keni meparisaya si Yesus. 21 Ande tempo-ku moroa ante to tado nantutu Parenta Taurat, yaku noinguu ewa tou to tado nantutu Parenta Taurat. Patuju-ku nowia ewa ee bona mamala-ra ku-keni meparisaya si Yesus. Agiana nemo rauli bakote yaku tado nantutu parenta nu Allatala, apaa yaku ei mpuu-mpuu nantutu parenta ni Kristus. 22 Iweetu mbii ande tempo-ku moroa ante tou to tadopa naroso kaparisayaa-na, yaku noinggu ewa tou to tadopa naroso kaparisayaa-na bona mamala-ku mampakaroso kaparisayaa-ra si Yesus. Jadi, yaku nopajadi koro-ku ewa inggu nu sumawee tou bona mamala-ra ku-keni meparisaya si Yesus. 23 Sumaweena ee nipowia-ku bona basangkia dua tou mamala mamparisaya Kareba Belo pade bona yaku mbii mamparata kabeloa lako ri Kareba Belo ee.
24 Nincani-mimo bakote ri rara nu posilumba, sumawee toposilumba kana mokumbeno, agiana kawule sadua ngkola topedagi pade mantarima tombo. Jadi, pesimbukuimo ante rara mpuu-mpuu mokumbeno bona mamparata tombo komi. 25 Butu dua tou to mantutu posilumba kana motahangi dota rara-na lako ri ngila ngayana. Ia nowia ewa ee bona mamparata tombo to mamala marusa. Agiana i kita ei motahangi dota rara-ta lako ri ngila ngayana bona mamparata tombo to tado mamala marusa duuna masae-sae. 26 Ee-mo sabana tado nokumbeno ntabubua-ku. Ewa tonombejaguru, tado nejaguru natabubua-ku. 27 Agiana yaku nopaguru dodo koro-ku, nampetumbu motahangi rara-ku bona tado mantutu dota rara-ku to nadaa, apaa tado madota-ku majadi ngoni bakote maopu-kupa mampopowole Kareba Belo ri tou ntani, yaku dodo tado ratarima.