Tou to tado naroso pade tou to naroso
(15:1-13)
15
1 I kita to narosomo peparisaya-ta kana mancabara ri tou to tado naroso peparisaya-na. Nemo kawule mampekiri kasanaa nu koro dodo-ta. 2 Ikita masipato mowia belo ri singkapada manusia-ta pade mampakasana rara-na, bona mampakaroso peparisaya-na. 3 Apaa i Kristus tado nampekiri kasanaa nu koro dodo-Na. Ri rara Buku Nagasa nitulisi ewa ei: “Sumawee pekanene to nangkanene-Ko, nipambela si yaku-mo.”a 4 Sumawee nuanu nitulisi ri rara Buku Nagasa ee bona mopatuduki-ta. Apaa pepatuduki to nitarima-ta lako ri Buku Nagasa ee nowia-ta mancabara pade maroso bona mamala-ta mancarumaka Allatala. 5 Nisarumaka-ku Allatala, to nambei karosoa nu rara pade to nampakawoe rara nu manusia, mantulungi komi bona matuwu mosaongu rara, mantutu dota ni Kristus Yesus, 6 mangkajadika ante mosaongu rara bo mosaongu wotu komi mangune Allatala, Tuama nu Pue-ta, i Yesus Kristus.7 Eemo sabana ikomi kana mombetarima ante donu rara, nasimbei ewa i Kristus mbii nantarima komi bona mangune Allatala. 8 Toramo, i Kristus nantulungimo to Yahudi bona mampopakalio bakote Allatala nancabara nampeponui potipa-potipa-Na ri totua-ta. 9 I Yesus mbii nowia ngata-ngata ntanina nangune Allatala sabana kabelo nu rara-Na si sira. Ri rara Buku Nagasa nitulisi ewaa ei:
“Eemo sabana yaku kana mangune-Ko riolo nu ngata-ngata,
yaku kana mododia mangune sanga-Mu.”
10 Naria mbii nitulisi ewa ei:
“Kadonumo komi ngata-ngata ntani, moroa ante todea to nipelisi-Na.”
11 Pade ei mbii:
“Unemo i Pue, sumawee ngata-ngata,
pade sumawee tou kana mangune-Ya.”
12 Pade ewa ei mbii to niuli ni Yesaya:
“Lako ri muli ni Isaib kana meonga sadua
to kana moparenta ngata-ngata;
Ia-mo sarumakaa nu ngata-ngata ee.”
13 Nisarumakaku Allatalamo to majadi sarumakaa-mi. Ia kana mampeponui komi ante ngila ngaya nu kadonua bo kasanaa sabana peparisaya-mi, bona ante kuasa nu Inosa Gasa nu Allatala mantambei oa pancarumaka-mi ri Allatala.
I Paulus nopanotosi patuju nu tulisiana
(15:14-21)
14 Sarara-sarara-ku! Niparisaya-ku bakote nadea mpuu nuanu nabelo si komi. Ikomi mbii nanguncani ngila ngaya-na pade mamala mombepatuduki. 15 Agiana nancambelai nuanu to nipakatatapu, ku-popatora mpuu-mpuu komi ri rara sura ei, apaa Allatala-da to nambei-ku bago ee. 16 Nipajadi-Na ku-mo batua ni Kristus Yesus bona ratudu ri ngata-ngata nu tou to tado to Yahudi. Pade yaku najadi tobalia, to nampopowole Kareba Belo lako ri Allatala, bona tou to tado to Yahudi majadi penomba to mampakadonu rara nu Allatala, to nipagasa nu Inosa Gasa nu Allatala. 17 Jadi, apaa nosaongu rara-kumo ante i Kristus Yesus, mamala-kumo madonu sabana yaku nampobagoka Allatala. 18 Yaku nabia nampololita aga nancambelai nuanu to nipowia-ku ante kuasa ni Kristus to nampowia tou to tado to Yahudi najadi natundu ri Allatala. Yaku nowia ewa ee ante nuanu to niuli-ku bo to nipowia-ku, 19 to niporoa nu kadupa-kadupa bo pampetonondi to neliu mpuu. Sumaweena ee nipowia-ku ante kuasa Inosa Gasa nu Allatala. Kareba Belo nancambelai Kristus nipopowole-kumo ri sumawee tou, nopamula lako ri Yerusalem narata ri Ilirikum. 20 Patuju nu rara-ku mampopowole Kareba Belo lako ri Allatala ri pearia-pearia nu tou to tadopa namparonge kareba nancambelai i Kristus. Apaa tado madota-ku mopatinda bago-ku ri wumbu nu parawatu to nipowia nu tou ntani. 21 Ri rara Buku Nagasa nitulisi ewa ei:
“Tou-tou to tadopa naria nantarima kareba nancambelai-Ya, kana mangkalio,
pade isira to tadopa naria namparonge kana manguncani.”
I Paulus nancarumaka malou ri Roma
(15:22-33)
22 Eemo sabana naoso-ku nitolawani bona mampotomuka komi. 23 Agiana tempo ei bago-ku ri ngamba-ngamba ee naopumo. Nompae-mpaekamo dota rara-ku mampotomuka komi. 24 Ande moliu ngoni ri ngata-mi tempo-ku molumako malou ri tana Spanyol, mesei-kudamo ri ngata-mi mampotomuka komi bona mamala-ta masana-sana kambana singonimo. Maopu ee-da ku-perapi bona mingawa-ku mopapola polumako-ku malou ri tana Spanyol ee. 25 Agiana tempo ei malou ri Yerusalem ku-dapa mangkeni pengawa ri todea nu Allatala radou. 26 Apaa todea nu Allatala ri Makedonia pade ri Akhaya nipasitujui-ramo mambei pengawa-ra ri sarara-sarara to netowei riolo nu todea nu Allatala ri Yerusalem. 27 Ante donu rara nibotusi-ramo mowia ewa ee. Masipato ami-rada mantulungi tou-tou to netowei ee. Apaa lako ri tou-tou to Yahudi pade nitarimada nu tou to tado to Yahudi ee rasi-rasi lako ri Allatala. Eemo sabana tou to tado to Yahudi ee masipato mantulungi tou-tou to Yahudi ante gagu to naria si sira. 28 Ande maopu-damo bago ee ku-powia, pade mambei ri to Yerusalem pengawa to nipasintobu ee, pade malou-kuda ri tana Spanyol moliu ri ngata-mi. 29 Niparisaya-ku bakote tempo-ku mamei mampotomuka komi ngoni, yaku kana marata ante rasi bete lako si Kristus to rawei si komi.
30 Sabana ikita neparisaya si Kristus, Pue-ta, pade sabana towe to niwei nu Inosa Gasa nu Allatala nampowia-ta nampakule nampotowe tou ntani, ku-perapi mpuu-mpuu si komi bona mosambayani-ku mpuu-mpuu ri Allatala moroa-roa ante i yaku. 31 Posambayamo bona Allatala mampakabebasi-ku lako ri pale nu tou-tou to tado neparisaya ri Yudea, pade bona bago-ku mangkeni pengawa ri Yerusalem ratarima ante donu rara nu todea nu Allatala radou. 32 Pade maopu-pa ku-powia sumaweena ee, ande napodota nu Allatala, mamala-ku mamei si komi ri Roma ante sana rara, bona mawoemo rara-ku. 33 Ku-perapi bona Allatala to nambei kasanaa, mamporoasi komi sumawee! Amin.