Nemo mantangara sarara-mi
(14:1-12)
14
1 Tarimamo ante belo rara tou to tadopa naroso peparisaya-na. Nemo mombebili ante ia nancambelai banuapa-pa to kana na-powia. 2 Naria tou namparisaya bakote ngila ngaya nu kondia mamala rakondi. Agiana tou to tadopa naroso peparisaya-na nanguli kawule ngkojo ngkola to mamala rakondi. 3 Tou to nangkondi ngila ngayana, nemo mangkanene tou to kawule nangkondi ngkojo-ngkojo. Pade tou to kawule nangkondi ngkojo-ngkojo nemo mangkanene tou to nangkondi ngila ngayana, apaa tou to nangkondi ngila ngayana ee nitarima mbii-yada nu Allatala. 4 Nemo mi-tangara batua nu tou ntani. Ba nadungka-ya, ba nokongkore-ya, nuanu ee urusia dodo nu maradika-na. Agiana batua ee kana maroso pokongkore-na, apaa i Pue mamala mampakaroso pokongkore-na.5 Naria tou nanguli bakote naria eo to neliu kabelona lako ri eo-eo ntanina, pade naria mbii tou nanguli bakote sumawee eo nasimbei-da. Butu dua tou kana mamparisaya bakote nuapa to nipekiri-na ee nakono. 6 Tou to nampopeliu eo to nipakatatapu, ia nowia ewa ee bona mampabila i Pue. Tou to nangkondi ngila ngayana, nowia ewa ee bona mampabila i Pue, apaa ia nosukuru ri Allatala sabana kondia ee. Iwee mbii-da ante tou to kawule nangkondi ngkojo, tou ee mbii nampabila i Pue pade nosukuru ri Allatala. 7 Tado namo saduaa tou natuwu nantutu dota dodo-na, pade tado naria tou namate nantutu dota dodo-na. 8 Ande ikita matuwu, ikita kana matuwu mampakadonu i Pue. Pade ande ikita mamate, ikita namate nantutu dota ni Pue. Jadi, ba matuwu, ba mamate, ikita ei todea ni Pue. 9 Eemo sabana i Kristus namate pade natuwu mpanculi, bona mamala-Ya majadi Pue nu tou natuwu bo tou namate. 10 Jadi, nemo mi-tangara sarara-sarara-mi saongu kaparisayaa. Pade nemo mi-kanene-ra, apaa i kita sumawee ei kana mantingayosi Allatala bona ratangara. 11 Ri rara nu Buku Nagasa naria nitulisi:
“I Pue nanguli, kakono-konona,
butu dua tou kana motumbukotu menomba ri ngayo-Ku,
pade butu dua tou kana mangune Allatala.”
12 Jadi, butu dua-ta ei kana mantingayosi Allatala, pade manconoi pepekutana-Na nancambelai nuanu to nipowia-ta.
Nemo mambei watu katesunua
(14:13-23)
13 Eemo sabana nemo mombetangara komi. Pegoliana pesimbukuimo bona ikomi tado mowia nuanu mampakadungka ba mampakatesunu ri rara nu jeko sarara-mi saongu kaparisayaa.
14 Apaa iyaku nosaongu raramo ante i Pue, jadi niparisaya mpuu-ku bakote tado naria kondia to nipopali. Agiana ande maria tou mamparisaya bakote naria kondia to nipopali, kondia ee majadi tado masipato si-ya ande na-kondi. 15 Agiana ande ikomi mampakadua rara nu sarara-mi saongu kaparisayaa sabana nuanu nikondi-mi, nuanu nipowia-mi ee nampopakalio bakote tadomo naria towe rara-mi siya. Jadi nemo mi-pakagero peparisaya nu sarara-mi sabana kondia to nikondi-mi, apaa ia mbii sarara-mi saongu kaparisayaa to nitolosi ni Kristus ante kamate-Na. 16 Eemo sabana nemo rapalambaka nuapa to nabelo si komi, nauli nu tou ntani tado nabelo. 17 Apaa, Poparentaa nu Allatala tado nancambelai nuapa to mamala rakondi bo nuapa to mamala rainu. Agiana nancambelai kakonoa, posingkabelo pade kadonua to niwei nu Inosa Gasa nu Allatala. 18 Tou to nampalayani i Kristus ewa ee, tou ee nampakadonu rara nu Allatala, pade nibila nu tou-tou ntani.
19 Eemo sabana ikita kana mampesimbukui matuwu mosingkabelo ante singkapada manusia-ta, pade mombepakaroso mporara. 20 Nemo rapakagero nuanu to nipowiamo nu Allatala, sabana ikomi nangkondi kondia to nipopali nu tou ntani. Sumawee kondia mamala rakondi. Agiana, ande nuanu nikondi-mi ee mampowia tou ntani manawu ri rara nu jeko, nasalamo komi. 21 Agina nemo mangkondi bou ba manginu anggur, ba mowia banuapa-pa mpuumo ande nuanu ee mampowia sarara-mi saongu kaparisayaa manawu ri rara nu jeko. 22 Palambakamo nuapa to niparisaya-mi ee mi-powia ri ngayo nu Allatala ngkola. Tou kana masana mpuu-mpuu ande tado mampomasala koro dodo-na, tempo-na mowia nuanu nipekiri-na nakono. 23 Agiana tou to norandua rara-na mangkondi sangaya kondia, ntanono kaopuana nikondi mbii-nada kondia ee, nipomasala-yamo nu Allatala. Apaa ia nowia nuanu to tado nasimbei ante nuanu to niparisaaya-na. Pade banuapa-pa to rapowia tado ante kaparisayaa, eemo jeko.