Matundu ri Topoparenta
(13:1-7)
13
1 Butudua tou kana matundu ri topoparenta, apaa tado naria topoparenta to tado namparata kuasa lako ri Allatala. Pade topoparenta ngkapuri ei, noparenta nantutu parenta nu Allatala. 2 Eemo sabana yema-yema nangewa topoparenta batuana ia nangewa nuanu to nipakatatapu nu Allatala. Pade tou to nowia ewa ee kana mantarima suku. 3 Tou to nowia nuanu nabelo nemo maeka ri topoparenta. Kawule tou to nowia nuanu nadaa ngkolada masipato maeka. Jadi ande tado madota komi maeka ri topoparenta, ikomi kana mowia nuanu nabelo, mangkajadika ikomi kana raune.4 Topoparenta ee batua nu Allatala to nobago bona mantulungi komi. Agiana ande ikomi mowia nuanu to nadaa, ikomi kana maeka si sira, apaa topoparenta mamala mampake kuasa-na mosuku tou. Topoparenta ee batua nu Allatala to nobago bona mambei suku ri tou to nowia nuanu to nadaa. 5 Eemo sabana ikomi kana matundu ri topoparenta. Tado kawule maeka sabana rasuku nu Allatala, agiana ri rara-mi nincani-mida bakote eemo to kana mi-powia.
6 Ee mbiimo sabana nuapa pade kana mobayari balasitee komi. Apaa topoparenta ee nampobagoka Allatala. 7 Jadi, bayarimo ri topoparenta nuanu to masipato mi-bayari si sira. Bayarimo balasitee ri tou to masipato mantarima. Pade bilamo tou to masipato rabila.
Towe ee pampeganai nu Parenta Taurat
8 Ikomi Nemo mampoinda banupa-pa mpuumo ri tou ntani. Agiana ikomi kana mombepotowe. Apaa yema mampotowe singkapada manusia-na, nipeponui-namo sumawee parenta Taurat. 9 Apaa isi nu parenta Taurat: Nemo mobualo, nemo mepatesi, nemo mangio, nemo mampokailu nuanu nu roa, pade parenta-parenta ntanina nipasangkani najadi saongu parenta: “Potowemo singkapada manusia-mu ewa pampotowe-mu koro dodo-mu.”
10 Tou to nampotowe tou ntani, kana tado mowia nuanu nadaa ri tou ee. Jadi, tou to nampotowe singkapada manusia-na, ia-mo tou to nantutu sumawee isi nu parenta Taurat. 11 Sumaweena ee kana rapowia, apaa nincani dodo-mimo nuapa to masipato rapowia tempo ei. Pembangumo komi lako ri paletaa-mi, apaa tempona-ta rapakasalama najungkumo. Lako ri pamula nu peparisaya-ta duuna ngkapuri ei, kajungku-jungkuamo tempona kasalamaa ee.
12 Nasaemo bengina, mapara mabaamo. Jadi, pawiamo sumawee inggu-inggu-ta to nadaa. I kita kana mapeganai koro-ta ante parewa mpoiwali.
13 I kita kana mowia nuanu nabelo ewa to nipowia nu tou to natuwu ri kabaasana. Nemo gaga meliu pampesana katuwu, ba malangu. Nemo mogou sala, ba mowia inggu nadaa. Nemo mombewiko, ba masingki rara. 14 Agiana palambakamo i Pue Yesus Kristus majadi pentidaa-mi matuwu. Pade nemo mi-palambaka koro-mi mantutu dota rara-mi to nadaa.