Penomba to nakono
(12:1-8)
12
1 Sarara-sarara! Nabelo mpuu Allatala si kita. Eemo sabana ku-perapi mpuu-mpuu bona i komi mambei koro-mi majadi penomba to natuwu to nipatanika Allatala, pade to nampakadonu rara-Na. Eemo penomba-mi to nakono. 2 Nemo mi-tutu inggu nu dunia ei. Palambakamo Allatala mobali katuwu-mi. Palambakamo Allatala mambei pekiri bou si komi. Ante eemo komi mamala manguncani nuapa to nipodota nu Allatala, nuanu nabelo, to nampakadonu Allatala bo nuanu to tado nasala ri pangkalioaa-Na.3 Allatala nambeimo asi rara-Na si yaku. Eemo sabana ku'ulikaka komi: Nemo mi-pekiri nuanu to neliu lako ri nuanu to masipato mi-pekiri, agiana ikomi kana mampekiri mpuu-mpuu, bona mamala komi motahangi rara-mi mantutu suka nu peparisaya to niweimo nu Allatala si komi sadua bo sadua 4 Ri woto-ta ei nadea bagia-bagiana, pade tado nasimbei pobagona. 5 Iwee mbiida ante i kita. Noudamo nadea-ta, agiana nosaongu woto, apaa i kita nosaongu raramo ante i Kristus. Pade i kita nombedei-dei ewa bagia-bagia nu woto. 6 Si kita sumawee ei niweikaka-tamo nu Allatala pakulea nantutu kabelo nu rara-Na si kita. Eemo sabana i kita kana mampake pakulea ee. Tou to niwei pakulea bona mampopowole kareba lako ri Allatala, kana mampopowole kareba lako ri Allatala ee mantutu pakulea to naria si-ya. 7 Tou to niwei pakulea bona mantulungi tou ntani, kana mpuu-mpuu mantulungi tou ntani. Tou to niwei pakulea bona mepatuduki, kana mpuu-mpuu mepatuduki. 8 Tou to niwei pakulea bona mampakaroso rara nu tou ntani, kana mpuu-mpuu mampakaroso rara nu tou ee. Tou to niwei pakulea bona mambei banuapa-pa ri tou ntani, ia kana mowia nuanu ee ante doli rara-na. Tou to niwei pakulea bona majadi topangkeni, ia kana mpuu-mpuu mepakeni. Tou to niwei pakulea bona mampopakalio kabelo nu rara-na, ia kana mowia nuanu ee ante donu rara.
Pepatuduki bona matuwu ewa katuwu nu topeparisaya
(12:9-21)
9 Pepotowemo ante tado mabelo wongko. Kawaosimo nuanu nadaa pade powiamo nuanu nabelo. 10 Ikomi kana mombepotowe ante rara mpuu-mpuu ewaa toposarara ngkoro, pade ikomi kana mombepokoului mambei petabe. 11 Pobagomo ante deka rara. Nemo malose. Pobagokamo i Pue ante roso lako ri Inosa Gasa nu Allatala. 12 I komi kana mancarumaka i Pue ante donu rara, mancabara ri rara nu kapepaa, pade nemo masue rara mosambaya. 13 Ngawamo bona mampeganai kaparalouaa nu tou-tou to Karasitee ntanina pade tarimamo sarara-sarara saongu kaparisayaa to tado nincanika-mi ante donu rara ri rara ncou-mi. Tulungimo roa saongu kaparisayaa to niruncu nu pepa, pade tarimamo torata to mamei ri sou-mi. 14 Perapimo ri Allata bona mantiroi to noduasi komi. Perapimo Allatala mantiroi-ra, nemo mokaranala. 15 Kadonumo komi moroa-roa ante tou-tou to nadonu, pade pokeomo komi moroa-roa ante tou-tou to nokeo. 16 Katuwumo mosingkabelo ante singkapada manusia-mi. Nemo malangko rara, katuwumo komi moroa ante topetowei. Nemo mampoperingi kapande. 17 Ande maria tou mowia nuanu nadaa si komi, nemo mi-balasi ante nuanu nadaa. Powiamo nuanu niuli nu tou nabelo. 18 Pesimbukuimo matuwu mosingkabelo ante sumawee tou. 19 Sarara-sarara-ku! Nemo mi-balasi to nowia nuanu nadaa si komi, agiana palambakamo Allatala mampabalasi-ra. Apaa ri rara Buku Nagasa naria nitulisi: “Yakumo to pebalasi, Yakumo to kana mesuku.” 20 Pegoliana, ande bali-mi maoro, weikaka-ya kondia, pade ande mabei wuu-na, weikaka-ya ue na-inu. Apaa ande ewa ee mi-powia, ia kana majadi maeya. 21 Nemo mi-palambaka koro-mi nadagi nu nuanu nadaa, agiana i komi kana mampadagi nuanu nadaa ante nuanu nabelo.