Belo rara nu Allatala ri to Israel
(11:1-10)
11
1 Jadi ku-pekutana: Baa nipoaramo nu Allatala todea-Na? Kakono-konona tado! Yaku dodo ei to Israel muli ni Abraham, to nipomulika ni Benyamin. 2 Allatala tado nampoara todea-Na to nipelisi-Namo lako ri paramulana. Nincani-mida nuapa to nitulisi ri rara Buku Nagasa nancambelai i Elia, tempo-na nampangaduka to Israel ri Allatala. Nanguli-Ya: 3 “Pue, nabi-nabi-Mu nipatesi-ramo, meja-meja penombaa si-Ko nirobo-ramo. Sadua ngkola-ku ei damo natuwu, agiana madota rapatesi mbii-ra.” 4 Nisonoi-ya nu Allatala: “Naria pitu njobu-pa tou niboli-Ku bona majadi bagia-Ku. Tadopa naria-ra nenomba ri Karampua Baal.” 5 Iwee mbii ngkapuri ei. Naria saodi-damo tou to nipelisi nu Allatala sabana towe rara-Na si sira. 6 Allatala nampelisi-ra nantutu towe rara-Na, tado nantutu nuanu nipowia-ra. Apaa ande pampepilisi nu Allatala ee mantutu nuanu nipowia nu manusia, towe rara nu Allatala ee tadomo towe mpuu-mpuu. 7 Natantumo, to Israel tado mamparata nuanu to nionco-ra. Agiana tou-tou to nipelisimo nu Allatala to kana mamparata. Tou-tou ntani nipakakoomo nu Alltala rara-ra. 8 Apaa ri rara nu Buku Nagasa nitulisi ewa ei:“Allatala nowia rara pade pekiri-ra nakoo,
pade duuna ngkapuri ei mata-ra tado namala nekalio
pade talinga-ra tado namala neronge.”
9 Pade i Daud mbii nanguli:
“Palambakamo kasanaa-kasanaa-ra mampanawu-ra,
mampakapusa bo majadi pebalasi si sira.
10 Palambakamo pekalio-ra majadi madedi bona tado mamala-ra mekalio,
pade palambaka-ramo majadi mabungku duuna masae-sae.”
To Israel nanawu, ngata-ngata ntanina nipakasalama
(11:11-24)
11 Ku-pekutanaki mbiipa: Tempo nu to Yahudi nanawu, nuanu ee najadi bona maropu-ra? Kakono-konona tado! Agiana apaa i sira nowia jeko, nangkajadika ngata-ngata ntanina nipakasalama, nangkajadika to Yahudi namposirii ngata ntanina. 12 Apaa to Yahudi nowia jeko pade tado nadota nantutu dota nu Allatala, nangkajadika Allatala nantiroi ngata-ngata ntanina. Ande rapana mosingkabelo mpanculimo to Yahudi ante Allatala, mabete ntotopa rasi to kana rawei-ra nu Allatala.
13 Agiana tempo ei ku'ulikakamo komi sarara-sarara to tado to Yahudi! Sinungka ei-ku najadi suro ri tou-tou to tado to Yahudi, nibila mpuu-ku bago ee. 14 Nisarumaka-ku maria sarara-ku to Yahudi mosiri mangkalio komi, bona mamala-ra ku-keni mamparisaya i Yesus pade rapakasalama. 15 Apaa tempo nu to Yahudi nipoara nu Allatala, ngata-ngata ntanina ri sumawee dunia nipoposingkabelo mpanculi ante Allatala. Neliu ntotopa belona ande to Yahudi natarima mpanculi nu Allatala, apaa nuanu ee nasimbei ewa tomate nipatuwu mpanculi.
16 Ande santibe roti to nipatani niweikaka Allatala-mo, kakono-konona sumawee roti ee niwei ri Allatala-mo. Pade ande lari ngkou Allatala-da tumpuna, raa-raa ngkou ee mbii Allatala-da tumpuna. 17 Tou-tou to Yahudi nirapaika ewa raa-raa nu kou zaitun to nirawasini to nipusumo. Pade ri popusua ee niparika raa nu kou zaitun to tado nirawasini to nirapaika tou-tou to tado to Yahudi. Ikomi nipataka isee bona mi-tarima sumawee nuanu nabelo lako ri rasi nu to Yahudi 18 Eemo sabana nemo mi-pandaente tou to nipusu ewa raa ngkou ee. Kana mi-tora bakote i komi mbii kawule raa ngkou ngkola-da. Tado raa ngkou nambei kondia ri lari ngkou, agiana lari-da nambei kondia ri raa ngkou. 19 Agiana ikomi kana manguli: “Nakono, raa-raa ngkou ee nipusu bona mamala-ku raparika ri puu-na.” 20 Nuanu ee nakono ami-da. I sira nipoara apaa tado neparisaya, agiana i komi nitarima sabana peparisaya-mi. Jadi nemo mi-polangko nu rara nuanu ee, pegoliana ikomi kana maeka. 21 Apaa ande Allatala nampoaramo to Yahudi to ewa raa nu kou zaitun to nirawasini ee, Ia mbii kana mampoara komi ande tado meparisaya komi. 22 Jadi iseimo ta-kalio beiwa kabelo nu Allatala pade kanoa-Na nesuku. Ia nosuku to nowia jeko, agiana nabelo mbii rara-Na ri tou to neparisaya, ande maroo dodo peparisaya-mi si-Ya. Ande tado, ikomi mbii kana Na-poara. 23 Pade nancambelai tou-tou to Yahudi ee, ande ra-parisaya mpanculi-ramo Allatala, isira kana ratarima mpanculi, apaa Allatala nakuasa mantarima mpanculi-ra. 24 Ikomi tado to Yahudi nasimbei ewa raa nu kou zaitun to tado nirawasini. Noudamo iwee, ikomi niparika ri kou to nirawasini. Jadi ande raa nu kou to tado nirawasini namala niparika ri kou to nirawasini, nedamorauli raa nu kou to nirawasini. Ia mamala raparika mpanculi ri puu-na.
Pampakasalama to Israel
(11:25-36)
25 Sarara-sarara! Tado nabelo ande malangko gaga rara-mi. Apaa naria sangaya nuanu to nipodota nu Allatala to tadopa nincani nu manusia lako impia. Ku'ulikaka komi bona mi-ncani bakote: Saganta to Yahudi nakoo rara-ra, agiana kakoo nu rara-ra ee tado masae, kawule duuna magana kadea nu tou-tou to tado to Yahudi mamparisaya i Yesus. 26 Maopu ee-da pade rapakasalama-da sumawee to Yahudi, ewa to nitulisi ri Buku Nagasa:
“Mbagou Topepakasalama kana marata lako ri Sion,
Ia kana mogempu sumawee nuanu nadaa lako ri muli ni Yakub.
27 Yaku kana mampakaroso potipa ei ante i sira
ri tempo-Ku notolosi jeko-jeko-ra. ”
28 Apaa to Yahudi tado nadota nantarima Kareba Belo lako ri Allatala, isira kana majadi bali nu Allatala. Nuanu eemo nangkeni kabeloa si komi tou to tado to Yahudi. Agiana apaa to Yahudi nipelisi nu Allatala, isira nipotowe dodo nu Allatala apaa nitora oa-Na potipa-Na ri totua-ra. 29 Apaa ande Allatala nampelisi bo nambei belo ri tou, tado naria nibali-Na nuanu nipowia-Na ee. 30 Impia komi tado natundu ri Allatala. Agiana ngkapuri ei nipopakaliomo nu Allatata towe-Na si komi apaa to Yahudi tado natundu ri Allatala. 31 Iwee mbii tou-tou to Yahudi ngkapuri ei tado natundu ri Allatala bona isira mbii mantarima towe rara nu Allatala nasimbei ewa pampopakalio-Na towe rara-Na si komi. 32 Apaa nipalambakamo nu Allatala sumawee manusia nikuasai nu tado katundu-ra, bona mamala-Ya mampopakalio towe rara-Na si sira sumawee.
33 Nabete mpuu-da towe rara nu Allatala ri manusia. Nabete mpuu-da kabija bo kapandea-Na. Tado namo saduaa to mamala mopanotosi botusia-botusia-Na, pade tado namo saduaa to nanguncani beiwa pobago-Na. 34 Ri rara Buku Nagasa naria nitulisi ewa ei:
“Yema to nanguncani pekiri ni Pue?
Yema mamala mopatuduki-Ya?
35 Yema naria nambei banuapa-pa si Pue
nangkajadika i Pue kana mampopanculiki si sira?”
36 Allatala nopajadi ngila ngayana. Sumaweena ee lako ri Allatala pade rawei mpanculi ri Allatala. Raunemo Allatala duuna masae-sae. Amin.