10
1 Sarara-sarara-ku, nabete mpuu rara-ku bona sarara-ku to Yahudi rapakasalama. Pade yaku mbii mpuu-mpuu namposambayaka-ra ri Allatala. 2 Yaku mamala mopanotosi bakote i sira mpuu-mpuu madota matuwu mampakasana rara nu Allatala, agiana tado nincani-ra beiwa dalana mampakasana rara nu Allatala. 3 Apaa tado nincani-ra beiwa dala nu Allatala mampoposingkabelo mpanculi-ra ante Ia. Pade sabana i sira madota mantutu dala dodo-ra, nangkajadika tado natundu-ra ri dala to nitudo nu Allatala.Niparikonoi sabana kaparisayaa
(10:4-15)
4 Parenta nu Taurat nipeganai mpuumo ni Kristus. Jadi, butu dua tou to namparisaya i Kristus, niparikonoi ri pangkalioaa nu Allatala. 5 I Musa notulisi: “Tou to niparikonoi nu Allatala sabana nantutu parenta Taurat, tou ee kana matuwu sabana natundu ri parenta Taurat ee.” 6 Agiana ri rara Buku Nagasa nitulisi nancambelai tou to niparikonoi nu Allatala mantutu kaparisayaa ri Allatala nanguli ewaa ei: “Nemo mu-pekutana ri rara-mu: Yemamo to kana malou ri suruga? Bona mangkeni mpesompo i Yesus. 7 Ba yemamo to kana mesompo ri pearia nu tomate? Bona mo'ongko i Kristus lako ri pearia nu tomate.” 8 Patujuna ewaa ei,
“Kareba lako ri Allatala najungku si komimo,
ri wiwi-mi pade ri rara-mi.”
Eemo kareba to niparata-ka. Kareba bakote tou kana meparisaya. 9 Apaa ande ikomi mangaku ante wiwi-mi bakote i Yesus ee Pue, pade mi-parisaya ri rara-mi bakote Allatala to nopatuwu mpanculimo i Yesus lako rikamatea, ikomi kana rapakasalama. 10 Apaa ante rara-na tou neparisaya, nangkajadika-ya niparikonoi nu Allatala. Pade ante wiwi-na tou nangaku, nangkajadika-ya nipakasalama. 11 Ri rara nu Buku Nagasa nitulisi: “Tou to neparisaya si-Ya tado rapakasue rara-na.” 12 Nuanu ee najadi ri sumawee tou, apaa tado naria pontaniana to Yahudi bo tou to tado to Yahudi. Allatala to sadua ngkola eemo Pue nu sumawe tou. Ia nambei rasi to neliu-liu ri sumawee tou to nerapi tulungi si-Ya. 13 Apaa, yema-yema merapi tulungi si Pue, kana rapakasalama.
14 Agiana beiwa dalana tou merapi tulungi si Pue ande tadopa meparisaya-ra? Pade beiwa-ra mamala meparisaya si Pue ande tadopa raronge-ra kareba nancambelai i Pue? Beiwa-ra mamala mamparonge kareba nancambelai i Pue, ande tado maria to mangkeni kareba ee? 15 Pade beiwa-ra mangkeni kareba ee, ande tado ratudu-ra? Ri rara nu Buku Gasa nitulisi ewa ei: “Nabelo mpuu karata nu tou-tou to nangkeni Kareba Belo lako ri Allatala!”
Nancambelai tado peparisaya nu to Israel
(10:16-21)
16 Agiana tado sumawe tou nantarima Kareba Belo ee. Apaa i Yesaya nanguli: “Pue, yemamo to namparisaya kareba nikeni-ka?” 17 Eemo sabana tou-tou najadi neparisaya apaa isira namparonge kareba, pade kareba nironge sabana naria tou nampopowole kareba nancambelai i Kristus. 18 Agiana kupekutana komi: Tadopa nironge-ra kareba ee? Kana nironge-ramo! Apaa ri rara Buku Nagasa nitulisi ewa ei:
“Wotu-ra nirongemo ri sumawee Dunia,
pade lolita-lolita-ra ee naratamo ri wuntu nu Dunia.”
19 Ku pekutana mbiipa komi: Tadopa nincani nu to Israel? Paramulana i Musa nanguli:
“Yaku kana mowia komi mamposirii tou-tou to tado najadi todea-Ku,
pade Yaku kana mowia komi masodo ri tou-tou to tado nanguncani nuapa-pa.”
20 I Yesaya ante bia-na nanguli:
“Tou-tou to tado nangonco-Ku, nirata-ra Kumo,
pade nipopakalio Kumo koro-Ku ri tou to tado nampekutana bayema-Ku.”
21 Agiana nancambelai to Israel i Yesaya nanguli: “Saeyo ntua-Ku noulu pale-Ku ri tou to tado natundu bo nangewa-Ku.”