Pampelisi to Israel
(9:1-29)
9
1 Nuapa to kana ku'uli ei mpuu-mpuu nakono apaa yaku nosaongu raramo ante i Kristus. Tado naboa-ku. Pekiri ri rara-ku to ni nini nu Inosa Gasa nu Allatala mbii nanguli bakote tado naboa-ku. 2 Natudu mbuku pade nadua mpuu rara-ku, 3 sabana sarara-sarara-ku to Yahudi. Yaku madota rapokaranalaka nu Allatala bo rapopogaa lako si Kristus, ande rapana nuanu ee mamala mantulungi-ra. 4 I sira ei to Israel to nipelisimo nu Allatala. Ia nopajadi-ra ana-ana dodo-Na, pade nampopakalio kuasa-Na si sira. Ia nowia potipa ante i sira pade nambei-ra parenta Taurat. Allatala nangulikaka-ra beiwa dala-ra menomba, pade i sira mbii nantarimamo potipa-potipa-Na. 5 I sira ei muli nu totua-ta. Tempo ni Kristus najadi manusia, Ia nipoanaka lako ri muli nu to Israel. Ia-mo to nokuasai sumaweena. Raunemo Allatala duuna masae-sae. Amin!6 Tado naria niuli-ku bakote potipa nu Allatala tado rapadupa. Apaa tado sumawee to Israel najadi todea to nipelisi nu Allatala. 7 Pade tado mbii sumawee muli ni Abraham nireke muli mpuu-mpuu-na. Apaa Allatala nanguli si Abraham: “Kawule muli ni Ishak ngkolada to kana rauli muli-mu.” 8 Batuana, to najadi ana-ana nu Allatala kawule to niote nantutu potipa nu Allatala ngkola. Tado sumawee muli-na. 9 Apaa Allatala notipa si Abraham ewa ei: “Ri tempo to nasimbei ewa eimo ngoni Yaku kana manculi, pade i Sara kana mampoanaka sadua ana baleilo.” 10 Pade tado kawule ee. I Ribka mbii nampoanaka rodua ana baleilo lako ri sadua tuama, i Ishak, totua-ta. 11 Sintou tadopa nipoanaka ngana rodua ee, nipakatatapumo nu Allatala pelisia-Na ngoni. Pelisia-Na ee tado nipakatatapu nantutu nuanu to mamala napowia nu manusia, agiana nipakatatapu nantutu pepokio nu Allatala dodo. Apaa tempo nu rodua ana baleilo ni Ribka ee tadopa namala nowia nuanu nabelo ba nadaa, 12 niulimo nu Allatala si Ribka:
“Ana ulumbua kana napobatua nu tuei-na.”
13 Rirara Buku Nagasa ni tulisi bakote Allatala nanguli ewa ei:
“I Yakub nipotowe-Ku, agiana i Esau nipodaa-Ku.”
14 Jadi, nuapa to kana ta-uli? Manguli bakote Allatala tado nanoa? Kakono-konona Allatala ee nanoa! 15 Apaa niulimo nu Allatala si Musa:
“Yaku kana mambei asi rara ri tou to Ku podota mambei asi rara
pade Yaku mambei towe rara ri tou to Ku podota mambei towe rara.”
16 Jadi, botusia nu Allatala ee tado nantutu dota nu manusia ba pampesimbukui nu manusia, agiana kawule lako ri belo rara nu Allatala ri tou to nipelisi-Na ee. 17 Ri rara Buku Nagasa nitulisi bakote Allatala nanguli ri tana Mesir: “Yaku nopajadi-ko mbagou, ante patuju bona lako ri kajadi-mu mbagou ee, Yaku mampopakalio kakuasaa-Ku pade mampowia sanga-Ku matolele ri sumawee dunia.” 18 Jadi, ande Allatala madota mampotowe sadua tou, Ia kana mampotowe tou ee. Pade ande Allatala madota mampakakoo rara nu sadua tou, Ia kana mampakakoo rara nu tou ee.
19 Jadi, tempo ei ikomi kana mampekutana-ku: “Ande nuanu to niuli-mu ee nakono, nuapa pade nipomasaladapa nu Allatala manusia? Yema to mamala mangewa nuanu to nipodota nu Allatala?” 20 Agiana sarara-sarara, tado masipato komi manconoi Allatala. Tado masipato nuanu to nipowia mampekutana to nampowia-ya: “Nuapa pade nipowia-mu ewa ei-ku?” 21 Topowia kura lako ri tana mpulu mamala mampake tana mpulu ee ante dota-dota rara-na. Lako ri sangkombo tana mpulu mamala na-powia rongaya kura. Sangaya kura to nabelo pade sangaya kura to tado nabelo. 22 Iwee mbii ante nuanu to nipowia nu Allatala. Allatala madota mampopakalio bakote nasodo-Ya ri jeko to nipowia nu manusia pade madota mopanotosi bakote Ia nakuasa. Allatala nancabara mpuu ri tou-tou to kana rasuku apaa nampakasodo-Ya. Allatala masadia mampakaropu-ra. 23 Allatala mbi madota mampopakalio si kita kasanaa to neliu mpuu to ni wei-Na si kita to nipotowe-Na. Nipasadia ami-Na ta-mo mantarima kasanaa ee. 24 Ikitamo to nipokio-Na, tado kawule to Yahudi ngkola, agiana to lako ri ngata-ngata ntanina mbii. 25 Apaa ri rara tulisia ni nabi Hosea, Allatala nanguli:
“Tou-tou to tado najadi todea-Ku,
kana Ku-pajadi todea-Ku.
Tou to tado nipotowe-Ku,
kana Ku potowe.
26 Pade ri ngata to nipangulii nu Allatala: ‘I komi tado todea-Ku,’
ri ngata ee tou-tou kana rakasangai ana-ana nu Allatala to natuwu.”
27 I Nabi Yesaya nololita mpuu-mpuu nancambelai to Israel: “Noudamo ewa bone ri tasi kadea nu to Israel, saodi ngkola to rapakasalama. 28 Apaa kana magasi karata nu Allatala mantangara sumawee isi nu dunia ei.” 29 Pade i Yesaya nanguli ewa ei mbii:
“Ande rapana Allatala to neliu kuasa-Na
tado nampalambaka saganta mulia-ta natuwu, natantumo
ikita sumawee kana maropu ewa ngata Sodom
pade ngata Gomora.”
Kasalamaa nu ngata-ngata ntani pade kapusa nu to Israel
9:30-10:3
30 Jadi kabokoana iwei: Tou tado to Yahudi tado nampesimbukui bona mosingkabelo mpanculi-ra ante Allatala. Agiana apaa i sira neparisaya, Allatala nampoposingkabelo mpaculi-ra ante Ia. 31 Pegoliana, tou-tou to Yahudi nampesimbukui oa natundu ri parenta Taurat bona mosingkabelo mpanculi-ra ante Allatala. Agiana tado naria wuana nirata-ra. 32 Nuapa pade tado naria wuana nirata-ra? Apaa i sira nowia ee tado ante peparisaya-ra ri Allatala, agiana lako ri pampesimbukui dodo-ra. Nagkajadika-ra natetancunu ri watu katetancunua to nampakadungka tou. 33 Nancambelai watu ee, naria nitulisi ri rara Buku Nagasa ewa ei:
“Peiraramo ei! Ri Sion niuntu-Kumo saongu watu to mampakatesunu tou,
saongu watu to kana mampakadungka tou.
Agiana tou to namparisaya Allatala kana ratulungi oa.”