Matuwu ri rara nu Inosa Gasa nu Allatala
(8:1-17)
8
1 Ngkapuri ei tadomo naria suku rawei ri tou to natuwu nosaongu rara ante i Yesus kristus. 2 Apaa Inosa Gasa nu Allatala to nangkeni-ta natuwu nosaongu rara ante i Yesus Kristus, nampakabebasi-tamo lako ri parenta to nampopeumba jeko bo kamatea. 3 Parenta Taurat tado namala nampakabebasi-ta lako ri kuasa nu jeko sabana ikita manusia tado nampakule nantutu parenta ee. Agiana nuanu to tado namala nipowia nu parenta Taurat, nipowiamo nu Allatala. Nitudu-Na ana dodo-Na namei ri dunia, ante woto nasimbei ewa woto nu manusia najeko, bona mogempu jeko nu manusia. 4 Allatala nowia nuanu ee bona dota-Na to nipanotosi ri rara parenta Taurat mamala ta-powia ri koro-ta to natuwu nantutu dota nu Inosa Gasa nu Allatala. 5 Tou-tou to natuwu nantutu dota rara-na to nadaa, aga nampekiri nuanu to nipodota nu rara-na to nadaa ee. Agiana tou-tou to natuwu nantutu dota Inosa Gasa nu Allatala, nampekiri oa nuanu to nipodota nu Inosa Gasa nu Allatala. 6 Ande pekiri-mi nakuasai nu dota rara to nadaa, i komi kana mamate. Agiana ande pekiri-mi nakuasai nu Inosa Gasa nu Allatala, i komi kana matuwu bo mosingkabelo ante Allatala. 7 Ande pekiri nu tou nikuasai nu dota rara to nadaa, tou ee nangewa Allatala. Tado nitutu-na parenta nu Allatala apaa tado nipakule-na. 8 Jadi, tou to nantutu dota rara-na nadaa, tado nipakule-na nampakadonu rara nu Allatala.9 Agiana i komi tadomo nantutu dota rara-mi to nadaa. I komi matuwu mantutu Inosa Gasa nu Allatala, ande Inosa Gasa nu Allatala mpuu-mpuu naria ri rara-mi. Tou to tado naria Inosa ni Kristus ri rara-na, tou ee tado todea ni Kristus. 10 Pegoliana ande i Kristus mpuu-mpuu naria ri rara-mi, noudamo woto-mi mamate sabana najeko, agiana Inosa Gasa nu Allatala mambei tuwu si komi, apaa nosingkabelo mpanculimo komi ante Allatala. 11 Ande Inosa Gasa nu Allatala to nopatuwu mpanculi i Kristus lako ri kamatea naria ri rara-mi, Ia to nopatuwu mpanculi i Kristus lako ri kamatea ee, kana mopatuwu mbii woto-mi to mamala mamate ee. Ia nowia ee ante Inosa-Na to naria ri rara-mi.
12 Eemo sabana, sarara-sarara, i kita kana matuwu mantutu dota nu Allatala. Tado masipato-ta mantutu dota rara dodo-ta to nadaa. 13 Apaa ande i komi matuwu mantutu dota rara dodo-mi to nadaa, i komi kana mamate. Agiana ande mi-pawiamo dota rara-mi to nadaa ee ante kuasa nu Inosa Gasa nu Allatala, i komi kana matuwu. 14 Tou-tou to ni nini nu Inosa Gasa nu Allatala, i siramo ana-ana nu Allatala. 15 Apaa Inosa Gasa nu Allatala to niweika-Na si komi, tado mampowia komi majadi batua mangkajadika komi matuwu ri rara nu eka. Pegoliana Inosa Gasa nu Allatala ee mampowia komi majadi ana-ana nu Allatala. Pade ante kuasa nu Inosa Gasa nu Allatala ee i kita mamala mampokio Allatala ee: “Tuama, o Tuama-ku”. 16 Inosa Gasa nu Allatala noroa-roa ante inosa-ta nopanotosi bakote ikitamo ana-ana nu Allatala. 17 Jadi, ande ikita ana-ana nu Allatala, ikitamo topancosora to kana mantarima rasi-rasi to nipasadia nu Allatala ri ana-ana-Na. I kita mbii moroa-roa ante i Kristus kana mantarima sumawee nuanu to nipasadiaka nu Allatala si Kristus. Apaa ande ikita mantodosaka kapepaa moroa-roa ante i Kristus, ikita kana rapemabose moroa ante Ia.
Sarumakaa nu ana-ana nu Allatala
(8:18-30)
18 Niparisaya-ku bakote sumawee kapepaa to nirasai-ta ngkapuri ei tado mamala rapasimbei ante pampemabose to kana rapopakalio si kita ngoni. 19 Sumawee isi nu dunia nalentora mpuu nampopea tempo nu Allatala mopanotosi ana-ana-Na. 20 Nibotusimo nu Allatala bakote sumawee isi nu dunia tadomo naria lotuna. Nuanu ee tado dota nu dunia dodo ee, agiana nantutu dota nu Allatala. Noudamo iwee nariadapa sarumakaa ei: 21 bakote sauatu tempo ngoni dunia kana rapakabebasi lako ri kuasa to nangkeni kamatea pade kana rapakabebasi bo rapemabose moroa-roa ante ana-ana nu Allatala. 22 Apaa nincani-ta bakote duuna ngkapuri ei sumawee isi nu dunia nekakae mpuu-mpuu sabana nantodosaka kapepaa ewa to nitodosaka nu sadua bangkele tempo-na noana. 23 Tado kawule sumawee isi nu dunia nekakae, agiana ante ikita topeparisaya mbii nekakae. Noudamo nitarima-tamo Inosa Gasa nu Allatala to paramula ntotona niwei nu Allatala si kita, agiana ikita nampopea bona rapakabebasi-ta lako ri kapepaa pade raongko majadi ana-ana-Na. 24 Ngkapuri ei ikita nipakasalamamo sabana ikita nancarumaka Allatala. Agiana ande nuanu nisarumaka-ta ee ta-kaliomo, batuana nuanu ee tadomo najadi sarumakaa. Apaa tado naria tou nancarumaka nuanu to nikalio-namo. 25 Jadi, ande ikita mancarumaka nuanu to tadopa naria nikalio-ta, ikita kana mancabara mopea.
26 Inosa Gasa nu Allatala mbii nantulungi-ta tempo-ta tado naroso. Apaa tado nincani-ta nuapa to kana ta-sambayani. Agiana Inosa Gasa nu Allatala dodo ee namperapika-ta ri Allatala ante pekakae to tado mamala rauli ante lolita nu manusia. 27 Nangkajadika Allatala to nanguncani rara nu manusia, nanguncani nuapa dota nu Inosa Gasa nu Allatala ee, apaa Inosa Gasa nu Allatala ee nerapika todea nu Allatala nantutu dota nu Allatala dodo. 28 Nincani-ta bakote ri rara nu ngila ngayana Allatala nobago bona mambei kabeloa ri tou to nampotowe-Ya, pade to nipokio-Na nantutu liwo-Na. 29 Apaa tou to nipelisimo nu Allatala, nipakatatapu mbiimo lako ri paramulana bona majadi masimbei ante ana-Na, i Yesus Kristus. Patuju-Na bona i Yesus Kristus majadi Ana ulumbua riolo nu sarara-sarara. 30 Tou to nipakatatapu-Na lako ri paramulana ee, i sira ee mbii nipokio-Na. Pade tou to nipokio-Na, i sira ee mbii niparikonoi-Na. Pade tou to niparikonoi-Na, i sira ee mbii nipemabose-Na.
Kaparisayaa
(8:31-39)
31 Jadi, ngkapuri ei, nuapa to kana ta-uli nancambelai sumaweena ee? Ande Allatala mamposambira-ta, yema to mamala mampadagi-ta? 32 Allatala tado nantolawani kapepaa nu Ana dodo-Na, agiana Ia nambei ana-Na ee rapatesi majadi tinuwu-ta sumawee. Niweimo nu Allatala Ana-Na, jadi Ia kana mambei ngila ngayana si kita. 33 Yema mamala manguli bakote todea to nipelisi nu Allatala ee nasala? Allatala dodomo nopanotosi bakote i kita tado nasala. Jadi tado maria tou mopanotosi bakote i kita nasala. 34 Yema madota mampomasala-ta? I Yesus Kristusmo ngoni to mantuduka-ta. Ia-mo to namate bo nipatuwu mpanculi lako ri kamatea pade noncunda mbira ri ngkana nu Allatala ri pearia to nibila mpuu ri suruga. 35 Maria nuanu to mampalawa towe ni Kristus si kita? Noudamo kasusaa, ba kapepaa, ba peduasi, ba oro mpei, ba petowei ngkatuwu, ba suwa, ba kamatea mpuumo, tado mamala mampalawa towe ni Kristus. 36 Ri rara Buku Nagasa nitulisi iwei:
“Eo bengina-ka natuwu ri rara nu suwa kamatea sabana Iko Allatala.
I kami mbii nipowia ewaa bimba to moliwo rasambale.”
37 Agiana ri rara nu sumaweena ee, ikita kana majadi topedagi sabana petulungi ni Kristus to nampotowe-ta. 38 Apaa niparisaya-ku tado naria sangayaa mpuu to mampakule mampopogaa-ta lako ri towe nu Allatala. Noudamo mamate-ta, ba matuwu, ba malaeka, ba to nakuasa, ba nuapa-pa to majadi ngkapuri ei ba to kana majadi ngoni, 39 ba karampua to nakuasa ri langi, ba to nakuasa ri dunia, ba nuapa-pa ntanina to nipajadi nu Allatala, tado namo sangayaa to mampakule mampopogaa-ta lako ri towe nu Allatala. Towe-Na ee nipopakalio-Na ri nuanu to nipowia ni Yesus Kristus, Pue-ta.