Batua nu Parenta Taurat
(7:1-12)
7
1 Sarara-sarara-ku, ikomi sumawee nanguncani parenta. Jadi nincani-mimo bakote parenta nokuasai sadua tou, sinungka nu tou ee matuwudapa. 2 Rapana ewa sadua bangkele to nobaleilomo, ia kana matundu ri atura mponcamboko sinungka nu baleilo-na matuwudapa. Ande mamatemo baleilo-na, bangkele ee nabebasimo lako ri atura mponcamboko. 3 Ande bangkele ee mobaleiloki ntani sinungka nu baleilo-na ee matuwudapa, batuana bangkele ee nobualo. Agiana ande mamatemo baleilo-na, bangkele ee nabebasimo lako ri parenta poncamboko. Pade ande mobaleloki-ya, tado nireke nobualao-ya. 4 Iwee mbiida ante i komi, sarara-sarara-ku. Namatemo komi lako ri parenta Taurat, apaa ikomi nopasangkanimo ante woto ni Kristus pade najadi todea-Na to nipatuwu mpanculi lako ri kamatea. Ia nipatuwu mpanculi lako ri kamatea bona i kita molotu ri Allatala ri rara ngkatuwu-ta. 5 Tempo-ta natuwu nantutu dota rara nu manusia-dapa, parenta Taurat ee nampopeumba dota ri rara-ta bona mowia jeko. Sumawee dota ee mampakamate-ta. 6 Agiana ngkapuri ei nipakabebasi-tamo lako ri parenta Taurat, apaa ikita namatemo lako ri parenta to impia nokuasai-ta. Ikita tadomo nantutu dala-ta to nasae impia, nantutu parenta to nitulisi. Ngkapuri ei-ta nantutu dala naboumo to nipanotosika-ta nu Inosa Gasa.7 Ande ewa ee, nuapa to kana ta-uli nancambelai parenta Taurat ee? Nadaa parenta Taurat ee? Kakono-konona tado. Lako ri parenta Taurat eemo pade nincani-ku jeko. Tado ku-ncani nuapa dota rara to nasala, ande tado niuli nu parenta Taurat ee “Nemo mampokailu.” 8 Lako ri parenta Taurat, jeko namparata loga nampopeumba ngila ngaya dota rara mampokailu nuanu nu roa. Ande tado naria parenta Taurat, jeko mbii kana mamate. 9 Impia tadopa nincani-ku parenta Taurat. Agiana nincani-kupa parenta Taurat, jeko to naria amimo ri rara-ku nopamula naroso, 10 pade yaku nireke namatemo. Parenta Taurat to paramulana patujuna bona mambei katuwua, pegoliana nangkeni kamatea si yaku. 11 Apaa lako ri parenta Taurat ee, jeko nangala loga nobagiu bo nopatesi-ku. 12 Parenta Taurat ee narata lako ri Allatala, pade butu ngaya nu atura ri rara parenta ee narata lako ri Allatala. Jadi parenta ee nanoa bo nabelo.
Pentidaa nu parenta Taurat pade jeko
(7:13-26)
13 Jadi ande ewa ee wea, parenta nabelo ee nangkeni kamatea si yaku? Kakono-konona tado! Jeko-da to nangkeni kamatea ee. Parenta Taurat to nabelo ee nipake nu jeko nangkeni kamatea si yaku, bona sumawee inggu nu jeko manoto rakalio. Jadi apaa nariada parenta-parenta nu Allatala, nanotomo nikalio bakote jeko ee nadaa mpuu. 14 Nincani-tada bakote parenta Taurat ee narata lako ri Inosa Gasa nu Allatala. Agiana yaku ei manusia to tado naroso, yaku ei nipobatua nu jeko. 15 Apaa yaku dodo tado nanguncani nuapa to nipowia-ku. Sumawee nuanu nabelo to madota ku-powia, tado nipowia-ku. Agiana sumawee nuanu to nipodaa-ku, ee-da to nipowia-ku. 16 Agiana ande ku-powia nuanu to tado nipobelo-ku, batuana yaku nampangaku bakote parenta Taurat ee nabelo. 17 Jadi, tado yaku to nowia inggu nadaa, agiana jeko to naria amimo ri rara-kuda to nampowia ee. 18 Nincani-kuda bakote tado naria namo sangayaa nuanu nabelo ri rara-ku, apaa yaku ei manusia najeko. Yaku madota moinggu mabelo, agiana tado nipakule-ku. 19 Yaku tado nadota nowia nuanu nabelo, bo ee-da to madota ku-powia. Pegoliana, nuanu nadaa, to tado nipobelo-ku, ee-da to nipowia-ku. 20 Ande i yaku mowia nuanu to tado nipobelo-ku, batuana tado yaku nowia nuanu ee, agiana jeko to naria ri rara-kuda to nampowia.
21 Jadi, sumaweena ee nowia-ku nanguncani bakote eimo to najadi ri rara ngkatuwu-ku: Yaku madota mowia nuanu nabelo, agiana to namala nipowia-ku aga nuanu nadaa. 22 Ri rara-ku, nipobelo-ku parenta nu Allatala. 23 Agiana tado nitutu-ku parenta nu Allatala sabana naria kuasa ntani to nampadagi-ku. Ri rara-ku madota mantutu parenta nu Allatala, agiana kuasa nu jeko ri rara ngkatuwu-ku nombepobali ante dota ri rara-ku, nangkajadika-ku nipobatua nu jeko ee. 24 Maweso mpuu-kumo ei. Yemamo to mampakabebasi-ku lako ri woto to mampakamate-ku ei? 25 Nosukuru ri Allatala! Ia dodomo to nampakasalama-ku sabana nuanu to nipowia ni Yesus Kristus, Pue-ta. 26 Jadi, eimo nuanu to najadi si yaku: Yaku kawule natundu ri parenta nu Allatala ante noto rara-ku, agiana yaku nikuasai nu jeko sabana dota rara-ku to nadaa.