Namate pade natuwu mpanculi ante i Kristus
6:1-14
6
1 Jadi ande ewa ee, nuapa to kana ta-uli? Kana mowia jeko oa-ta bona mantambei pampotowe-ta nu Allatala? 2 Kakono-konona tado! Apaa i kita tadomo nikuasai nu jeko, jadi i kita tadomo mamala matuwu ri rara nu jeko. 3 Nincani-mimo bakote tempo-ta nibaptis, ikita nipasangkanimo ante i Kristus. Batuana i kita mbii namate sangkani-ngkani ante Ia. 4 Ante pebaptis ee, ikita namate bo nitana noroa-roa ante i Kristus. Nuanu ee najadi bona ikita matuwu ante inggu nabou, nasimbei ewa i Kristus to nipatuwu mpanculi lako ri kamatea-Na ante kuasa bete nu Tuama-ta Allatala. 5 Ande ikita najadi nopasangkani ante i Kristus apaa ikita namate noroa ante Ia, ikita mbii majadi mopasangkani ante Ia apaa ikita nipatuwu mpanculi ewa Ia. 6 Nincani-tamo bakote katuwu-ta to nasaemo namatemo noroa-roa ante i Kristus ri kou salib, bona kuasa nu jeko ri rara ngkatuwu-ta rapakaropu. Nuanu ee najadi bona tadomo nakuasai oa-ta nu jeko. 7 Apaa ande tou namatemo, nipakabebasi-yamo lako ri kuasa nu jeko. 8 Ande ikita namatemo noroa ante Kristus, niparisaya-ta bakote i kita mbii kana matuwu moroa ante Ia. 9 Apaa nincani-ta bakote i Kristus nipatuwu mpanculimo lako ri kamatea pade tadomo kana mamate-Ya. Kamatea tadomo mamala mokuasai-Ya. 10 Ia namate sangkani ngkola, bona mampadagi kuasa nu jeko duuna masae-sae. Pade ngkapuri ei, Ia natuwu nampakadonu rara nu Allatala. 11 Ikomi mbii kana manguli bakote ikomi namatemo lako ri jeko, agiana natuwu nosingkabelo ante Allatala sabana i Yesus Kristus.
12 Jadi, nemo oa mi-palambaka jeko mokuasai katuwu-mi ri dunia ei, bona ikomi tado mantutu dota rara-mi to nadaa. 13 Pade nemo mbii mi-palambaka koro-mi mowia nuanu nadaa. Agiana weimo katuwu-mi ri Allatala apaa nipakabebasi-tamo lako ri kamatea pade nitarima-tamo katuwu nabou. Weimo katuwu-mi ri Allatala bona rapake mowia nuanu to nabelo mantutu dota-Na. 14 Jeko tadomo oa mokuasai katuwu-mi, apaa ikomi tadomo natuwu ri rara nu parenta Taurat, agiana natuwu ri rara towe nu Allatala.
Rongaya pepobatua
(6:15-23)
15 Jadi beiwa, ande ikita tadomo natuwu ri rara nu parenta Taurat, agiana natuwu ri rara towe nu Allatala, mamala-ta mowia jeko? Kakono-konona tado mpuu mamala. 16 Nincani dodo-mimo bakote ande i komi matundu ri sadua tou pade mantutu parenta-na, i komi najadi batua nu tou ee. Iwee mbi ante jeko. Ande i komi mantutu dota rara dodo-mi to nadaa, i komi najadi batua nu jeko pade kaopuana mamate bo rapopogaa ante Allatala. Agiana ande i komi matundu ri Allatala, i komi kana majadi batua-Na bo mosingkabelo mpanculi ante Ia. 17 Agiana nosukuru ri Allatala. Sabana impia komi najadi batua nu jeko, agiana ngkapuri ei komi ante rara mpuu-mpuu natundu ri pepatuduki to nakono to niweimo si komi. 18 Ikomi nipakabebasimo lako ri jeko, pade ngkapuri ei najadi batua bona mampowia dota nu Allatala. 19 Apaa nakaja gaga komi nanguncani pepatuduki, yaku nangala jonjo lako ri sadua batua bona magampangi mi-ncani nuapa patuju-ku. Impia komi nantutu sumawee nuanu narumu bo nadaa bona mowia nuanu nadaa. Iweetu mbii ngkapuri ei i komi kana mantutu sumawee dota nu Allatala bona mowia nuanu to nipakatatapu nu Allatala dodo.
20 Tempo-mi nipobatua nu jeko, tado nadota komi nowia dota nu Allatala. 21 Nuapamo ulina to nirata-mi lako ri sumawee nuanu to nipowia-mi impia? Sumaweena ee kawule nampakaeya komi ngkapuri ei, apaa sumawee nuanu nipowia-mi ee nangkeni kamatea. 22 Agiana ngkapuri ei, nipakabebasipa komi lako ri jeko, pade najadi batua nu Allatala, ikomi nantarima wua to nabelo. Wua to nabelo ee nampowia komi natuwu nipatanika Allatala, pade nuanu ee nangkeni tuwu liu-liu. 23 Apaa tombo nowia jeko eemo kamatea. Agiana tuwu liu-liu to tado naria kaopuana eemo pewei nu Allatala, apaa ikita natuwu nopasangkani ante Yesus Kristus, Pue-ta.