Uli nu poparikonoi
5:1-11
5
1 Ikita niparikonoi nu Allatala sabana peparisaya-ta si Yesus. Jadi tempo ei-ta natuwu nosingkabelo ante Allatala sabana nuanu to nipowia nu Pue-ta, i Yesus Kristus, si kita. 2 Sabana ikita namparisaya i Yesus Kristus, jadi niwei-Namo loga si kita mamparasai towe nu Allatala, to nirasai-tamo ngkapuri ei ri rara ngkatuwu-ta. Eemo sabana kana madonu rara-ta apaa ikita nancuramaka bakote ikita kana mamparasai kasanaa to niwei nu Allatala. 3 Pade tado kawule ee, ikita mbii madonu ri rara nu kapepaa, apaa nincani-ta bakote kapepaa kana mampowia rara-ta majadi maroso. 4 Ande maroso rara-ta, ikita kana medagi ande mampongayo pesori. Nuanu eemo to kana mampopeumba pancarumaka-ta ri Allatala. 5 Pancarumaka ewa ei tado mampakasue rara-ta, apaa rara-ta nipeponuimo nu Allatala ante towe-Na. Pade Inosa Gasamo to nampopakalio towe nu Allatala si kita. 6 Tempo-ta tado nampakule nampakasalama koro dodo-ta, ri tempo to nipakatatapu nu Allatala, i Kristus namate nancambei-ta to tado natundu ri Allatala. 7 Nakaja mpuu tou mampomate sadua to nanoa. Ande mampomate sadua to nabelo, bamariada to madota. 8 Agiana Allatala nampopakalio kabete nu towe-Na si kita ante kamate ni Kristus nancambei-ta, tempo-ta najekodapa. 9 Ngkapuri ei nosingkabelo mpanculi-tamo ante Allatala sabana kamate ni Kristus. Jadi lako ri kamate ni Kristus ee, ikita mbii kana rapakasalama lako ri suku nu Allatala. 10 Tempo-ta nombepobalidapa ante Allatala, ikita nipoposingkabelo mpanculi ante Ia sabana kamate nu Ana-Na. Pelabi-labinapa ngkapuri ei, tempo-ta nosingkabelo mpanculimo ante Allatala, Ana-Na ee kana mampakasalama-ta ri rara ngkatuwu-Na. 11 Pade tado kawule ee. Ikita mbii kana madonu sabana kabelo nu Allatala to nipowia nu Pue-ta i Yesus Kristus, apaa nipoposingkabelo mpanculi-tamo ni Yesus Kristus ante Allatala.I Adam pade I Kristus
12 Jeko neumba ri dunia sabana sadua manusia to nangewa parenta nu Allatala, pade lako ri jeko ee nariamo kamatea. Bunturuna sumawee manusia kana mamate apaa sumawee manusia nowia jekomo. 13 Sintou tadopa naria parenta Taurat, jeko naria amimo ri dunia. Agiana jeko ee tado nireke nu Allatala, apaa tadopa naria parenta to niewa. 14 Noudamo iwee, nopamula lako ri tempo katuwu ni Adam duuna ri tempo katuwu ni Musa sumawee manusia kana mamate, noudamo tado nasimbei jeko to nipowia-ra ante jeko to nipowia ni Adam to nangewa parenta nu Allatala to niweikaka-ya. I Adam ei mamala rapasimbei ante i Yesus kristus to kana marata ngoni. 15 Agiana towe rara nu Allatala tado nasimbei ante nuanu to nipowia ni Adam. Bunturu nu jeko nu manusia sadua sumawee manusia kana mamate. Agiana nabetepa towe rara nu Allatala to niwei-Na ri manusia. Sabana towe rara-Na eemo, Ia nampakasalama manusia sabana nuanu to nipowia ni Yesus Kristus lako ri kabelo nu rara-Na. 16 Towe rara nu Allatala neliupa kabetena lako ri jeko to nipowia nu manusia sadua ee. Nowia jekopa i Adam, nisuku-yamo nu Allatala. Agiana kadea-deaapa tou nowia jeko, Allatala nampopakalio towe rara-Na si sira ante noparikonoi-ra. 17 Sabana kasalaa nu manusia sadua ee, bunturuna sumawee manusia kana mamate. Agiana neliupa kabete nu bunturu to nipowia nu sadua manusia ntanina, i Yesus Kristus. Apaa lako ri nuanu to nipowia ni Yesus Kristus, Allatala nambei babayangi towe rara-Na ri sumawee manusia, to mampakamala-ra mosingkabelo mpanculi ante Allatala. Isira kana matuwu bo makuasa ri dunia sabana nuanu nipowia ni Yesus Kristus.
18 Jadi, lako ri kasalaa nu sadua manusia to nangkajadika sumawee manusia nisuku, iwee mbii to nipowia nu sadua manusia to nantutu dota nu Allatala, to nangkajadika sumawee manusia nipakabebasi lako ri kasalaa pade niwei katuwua. 19 Apaa i Adam tado natundu ri Allatala, sumawee manusia najadi najeko. Iwee mbiida, apaa i Yesus Kristus natundu ri Allatala, sumawee manusia mamala mosingkabelo mpanculi ante Allatala.
20 Allatala nambei parenta Taurat bona manoto rara nu manusia bakote nantambei kadea nu kasalaa-ra. Agiana kadea-deaapa jeko nu manusia, towe rara nu Allatala mbii mantambei kadeana. 21 Jadi, kakono-konona i kita kana mamate apaa i kita nowia jeko. Agiana Allatala nampotowe-ta pade nambeika-ta dala bona mosingkabelo mpanculi ante Ia. Apaa nosingkabelo mpanculi-tamo ante Allatala, Ia mbii nambeika-ta tuwu liu-liu sabana nuanu to nipowia ni Yesus Kristus, Pue-ta.