I Abraham niparikonoi sabana kaparisayaa-na
(4:1-25)
4
1 Jadi pekirimo i Abraham totua nu tou to Yahudi. Nuapa to najadi si-ya? 2 Ande rapana i Abraham niparikonoi sabana nowia nuanu nabelo, mamala-yamo mangune koro dodo-na. Agiana tado mamala-ya mangune koro-na ewa ee ri ngayo nu Allatala. 3 Apaa ri rara Buku Nagasa naria nitulisi ewa ei: “I Abraham namparisaya Allatala, pade sabana peparisaya-na ee, ia nitarima nu Allatala najadi tou to nampakadonu rara nu Allatala.” 4 Tou to nobago kana mantarima tombo. Tombo-na ee tado nireke najadi pewei, agiana nuanu masipato na-tarima sambei nu lenge-na. 5 Agiana tado ewa ee Allatala si kita. Allatala noparikonoi-ta, tado sabana nampesimbukui nowia nuanu nabelo. Ikita niparikonoi sabana namparisaya Allatala to nantarima to najeko. Jadi ikita niparikonoi sabana kaparisayaa-ta.6 Ewa ee mbii pamparata ni mbagou Daud to nanguli kasanaa nu tou to niparikonoi nu Allatala tado sabana nowia nuanu nabelo. Ewa ei lolita ni mbagou Daud:
7 “Masanamo tou to kasalaa-kasalaa-na nigempu
bo jeko-jeko-na niampungimo nu Allatala.
8 Masanamo tou-tou to sumawee jeko-na tadomo nireke nu Allatala.”
9 Kasanaa to niuli ni mbagou Daud ee tado kawule natarima nu to Yahudi ngkola to nantutu atura petindi, agiana natarima mbii nu tou tado tou to Yahudi, to tado nantutu atura petindi. Ewa to niuli-kumo, bakote i Abraham niparikonoi nu Allatala sabana ia namparisaya Allatala. 10 Jadi, ipia Allatala nopanotosi bakote i Abraham niparikonoi? Naopu-ya nitindimo, ba sintou-na tadopa nitindi? Kakono-konona sintou-na tadopa nitindi. 11 Nitindi nopuri-damo i Abraham, pade potindi-ya ee kawule najadi pampetonondi bakote ia niparikonoi sabana namparisaya Allatala. Nuanu ee najadi sintou-na tadopa nitindi. Jadi, eemo sabana mamala-ta manguli bakote i Abraham najadi tuama nu sumawee tou to namparisaya Allatala, noudamo tado ratindi. 12 Pade i Abraham mbii najadi tuama nu tou-tou to nantutu atura petindi, to tado kawule nitindi, agiana to natuwu ante kaparisayaa ri Allatala, ewa i Abraham ri tempo-na tadopa nantutu atura petindi.
13 Allatala notipa si Abraham bo ri mulia-na bakote dunia ei kana majadi bagia ni Abraham. Allatala notipa ewa ee tado sabana i Abraham natundu ri parenta Taurat, agiana sabana peparisaya-na ri Allatala, nangkajadika-ya niparikonoi nu Allatala. 14 Ande kawule tou natundu ri parenta Taurat ngkola mantarima nuanu to nitipa nu Allatala, batuana tado naria lotuna namparisaya Allatala, pade potipa nu Allatala ee mbii tado naria ulina. 15 Parenta Taurat kana mampopeumba sodo nu Allatala ande ikita mangewa parenta ee. Agiana tado maria to mangewa ande tado maria parenta ee.
16 Jadi, ikita mantarima nuanu to nitipa nu Allatala sabana peparisaya ngkola-ta, bona manoto rakalio nuanu niwei nu Allatala ee, niwei babayangi nu Allatala si kita nantutu kabelo nu rara-Na. Nuanu nitipa nu Allatala ee niwei ri sumawee muli ni Abraham, tado kawule ri to Yahudi to nampesimbukui nantutu parenta Taurat, agiana ri butu dua tou to namparisaya Allatala nasimbei ewa i Abraham. Apaa i Abraham najadi tuama-ta sumawee ri rara nu kaparisayaa. 17 Ri rara Buku Nagasa naria nitulisi lolita nu Allatala si Abraham ewa ei: “Yaku nopajadi-ko tuama nu sumawee manusia ri dunia.” Eemo potipa to niwei nu Allatala si Abraham. Pade i Abraham namparisaya Allatala. Ia-mo Allatala to nopatuwu mpanculi tomate, Ia mbiimo Allatala to ante lolita ngkola-Na nopajadi nuanu to tadopa naria nipajadi najadi naria. 18 Noudamo tadomo naria pancarumaka ni Abraham bakote momuli-yadapa, ia namparisaya dodo Allatala pade nancarumaka Allatala. Niparasaya-na bakote ia kana majadi tuama nu sumawee manusia ri dunia nantutu loliota nu Allatala to nitulisi ri Buku Nagasa ewa ei: “Muli-mu madea mpuu ngoni.” 19 Tempo ee nincanimo ni Abraham bakote tadomo mamala-ya momuli, apaa natua-yamo pade umuru-na makape saatu mpaeomo, pade bangkele-na mbii i Sara, nalalo. Agiana kaparisayaa ni Abraham bate-batena. 20 Ia neparisaya dodo pade tado norandua rara-na ri potipa nu Allatala. Kaparisayaa-na nantambei nampakaroso rara-na, nangkajadika-ya nangune Allatala. 21 Niparisaya mpuu-na bakote Allatala mamala mowia nuanu to nitipa-Namo. 22 Eemo sabana i Abraham niparikonoi nu Allatala. 23 Lolita to nitulisi ri Buku Nagasa ewa ei: “Niparikonoi nu Allatala” tado kawule niweika i Abraham, 24 agiana niwei si kita mbii. Ikita mbii naparikonoi nu Allatala, apaa ikita namparisaya Allatala to nopatuwu mpanculimo Pue-ta, i Yesus lako ri kamatea-Na. 25 I Yesus ee niweimo nu Allatala ri manusia bona rapatesi mantolosi jeko-jeko-ta, pade naopu ee Ia nipatuwu mpanculi nu Allatala bona mamala-ta mosingkabelo mpanculi ante Allatala.