Pelabia nu to Yahudi pade peporoasi nu Allatala
3:1-8
3
1 Jadi, nuapa pelabiana najadi to Yahudi? Pade nuapa lotuna mantutu atura petindi? 2 Nadea mpuu pelabiana. Pamula ntotona, apaa ri to Yahudi eemo Allatala nambei lolita-Na lako ngkoulu. 3 Agiana beiwa ande maria saganta to Yahudi tado matundu? Sabana tado katundu-ra ee, tadomo napadupa nu Allatala potipa-Na? 4 Kakono-konona tado! Apaa Allatala nanoa, noudamo sumawee manusia maboa. Ri rara Buku Nagasa nitulisi:“Sumawee lolita-Mu nakono,
pade Iko kana medagi tempo-Mu ratangara.”
5 Agiana naria tou nanguli: “Inggu nu Allatala to nanoa ee manoto ntotomo rakalio ande ikita mowia nuanu to tado nakono, nuapa pade nisuku-ta nu Allatala? Batuana ee tado nanoa Allatala?” (Ei aga pamparata nu manusia) 6 Agiana pamparata ee tado nakono. Ande rapana Allatala tado nanoa, Ia tado mamala mantangara sumawee manusia. 7 Agiana ande inggu-ta nadaa ee mampakanoto ntoto kanoa nu Allatala nangkajadika nantambei oa pangune-Ya nu tou, nuapa pade nisuku-Na topowia jeko? 8 Bo nuapa pade tado mamala-ta manguli: “Kamei-tamo mowia nuanu nadaa, bona raune ntotopa Allatala.” Naria amida tou nangkanene-ku ante nanguli bakote yaku nololita ewa ee. Tou to nangkanene-ku ee masipato mantarima suku lako ri Allatala.
Sumawee manusia najeko
3:9-20
9 Jadi, nabelopa ikita to Yahudi pade tou tado to Yahudi? Kakono-konona tado. Ewa to niuli-kumo isee bakote to Yahudi ba tou to tado to Yahudi, sumawee nikuasai nu jekomo. 10 Ewa to nitulisi ri rara nu Buku Nagasa:
Tado namo saduaa tou nakono.
11 Tado namo saduaa tou napande,
pade tado namo saduaa to nenomba ri Allatala.
12 Sumawee tou nakawaomo lako ri Allatala.
Sumaweena napusamo.
Tado namo saduaa to nowia nuanu to nabelo, tado namo saduaa mpuu.
13 Tambolo-ra ewa dayo to nateungke.
Lolita pebagiu nesuwu lako ri wiwi-ra,
pade ngudu-ra nampopesuwu lolita pepanawu, ewa bisa nu ule.
14 Rara nganga-ra naponu ante karanala.
15 Nagasi mpuu-ra noeda paa ande madota moduasi pade mopatesi tou.
16 Riumba-riumba-ra malou, isira ee nowia posimpogara pade kasusaa.
17 Tado nincani-ra natuwu mosingkabelo.
18 Pade tado nampabila Allatala.
19 Jadi, lako ri tulisia ri Buku Nagasa, nincani-ta bakote tado naria manusia nakono. Nincani-ta sumawee nuanu nitulisi ri rara nu parenta Taurat nambela ri to Yahudi to natundu ri parenta ee. Jadi tado naria namo saduaa to mamala manguli koro-na nakono. Sumawee manusia masipato mantarima pesuku nu Allatala. 20 Tado namo saduaa to mamala raparikonoi ri pangkalioa nu Allatala sabana parenta nu Taurat. Apaa parenta nu Taurat ee kawule nampopanguncanika-ta bakote sumawee manusia najeko.
Manusia niparikonoi sabana kaparisayaa
3:21-31
21 Agiana ngkapuri ei nipanotosimo nu Allatala beiwa dalana mampoposingkabelo mpanculi manusia ante Ia. Nuanu ee nitulisimo ri Buku parenta Taurat pade ri rara tulisia nu nabi-nabi. Dalana tado sabana pampakule nu manusia matundu ri nuanu to nipeparentai nu Allatala ri parenta Taurat. 22 Allatala nampoposingkabelo mpanculi sumawee manusia ante Ia ande tou ee meparisaya si Yesus Kristus. Allatala nowia ewa ee ri sumawee tou to neparisaya si Yesus Kristus, apaa Allatala tado nangkalio lence. 23 Ikita sumawee nowia jekomo pade katuwu-ta tadomo nampopakalio pampemabose Allatala ewa to nipodota-Na. 24 Nabelo mpuu Allatala pade nadota nantarima nculi manusia ante babayangi, apaa nitolosi-ramo ni Yesus Kristus. Allatala nantarima nculi manusia noudamo kakono-konona tado masipato manusia ee mamposiawe Allatala. 25 Nipakatatapumo nu Allatala bakote i Yesus Kristusmo to majadi dala bona mampoposingkabelo mpanculi manusia ante Allatala, ri rara kamatea ni Yesus. Nuanu ei najadi ri butu dua tou to neparisaya si Yesus. Allatala nowia ewa ee bona mopanotosi bakote Ia nanoa. Ri tempo ngkoulu Allatala nancabara, pade tado noreke sumawee jeko to nipowiamo nu manusia. 26 Agiana ngkapuri ei Allatala nosuku jeko-jeko nu manusia bona mopanotosi bakote Ia mpuu-mpuu nanoa, pade bakote Ia nantarima mpanculi tou-tou to neparisaya si Yesus bona mosingkabelo mpanculi ante Ia.
27 Eemo sabana tado maria dalana manusia mampomole koro-na, apaa Allatala nantarima mpanculi manusia sabana neparisaya si Yesus, tado sabana nantutu parenta Taurat. 28 Apaa eimo poko nu lolitana: Manusia nosingkabelo mpanculi ante Allatala, tado sabana nowia nuanu to nitulisi ri parenta Taurat, agiana kawule meparisaya si Yesus ngkola. 29 Allatala ee tado kawule Allatala nu tou to Yahudi ngkola, agiana Allatala nu tou tado to Yahudi mbii. 30 Allatala kawule sadua ngkola. Pade Iamo to nampowia to Yahudi bo tou to tado to Yahudi mbii najadi nosingkabelo mpanculi ante Allatala sabana peparisaya-ra si Yesus.
31 Batuana ee, tado bakote sabana peparisaya-ta si Yesus ee, mangkajadika ratadiaka-mo parenta Taurat. Tado ewa ee. Agiana ante peparisaya-ta ee, ikita nampabila parenta Taurat ee.