Suku nu Allatala ri sumawee tou
2:1-16
2
1 Eemo sabana, sarara-sarara yema-yema komi to manguli bakote tou ntani nadaa, pade kana rasuku, ia dodo mbii tado mabebasi lako ri suku. Apaa, tempo-mi nopanawu suku ri tou ntani, ikomi nopanawu suku ri koro dodo-mi. Apaa tou to nampomasala tou ntani, ia mbii nowia kasalaa nasimbei ewa ee. 2 Ikita nanguncani bakote Allatala nanoa tempo-Na nopanawu suku ri butu dua tou to nowia ewa ee. 3 Agiana ikomi, sarara-sarara, namparei tou ntani nowia nuanu nadaa, bo ee ikomi dodo mbii nowia ewa ee. Nipekiri-mi mamala komi mabebasi lako ri suku nu Allatala? 4 Allatala mpuu-mpuu nelabi belo-Na si komi pade nancabara. Agiana nipadaente-mi kabelo nu rara-Na ee. Allatala nabelo si komi apaa Ia madota ikomi mancoro lako ri jeko-jeko-mi. 5 Agiana nakoo mpuu rara-mi pade tado nadota nancoro lako ri jeko. Ee-mo sabana i komi dodomo to nampakantomo suku to kana rapanawu si komi ri Eo Potangara ngoni. Ri Eo Potangara, Allatala mantangara sumawee manusia ante kanoaa-Na pade mosuku sumawee tou to nowia nuanu to nadaa. 6 Apaa Allatala kana mobalasi tou-tou mantutu nuanu to nipowia-na. 7 Allatala kana mambei tuwu liu-liu ri tou to natundu nowia nuanu to nabelo bona mamparata pampemabose lako ri Allatala, pebila lako ri Allatala pade sumawee nuanu to tado mamala maropu. 8 Agiana tou to nampekiri koro dodo-na pade tado nadota natundu ri Allatala pade nantutu dota rara-na to nadaa, tou-tou ee kana raposodo mpuu nu Allatala. 9 Butu dua tou to noinggu nadaa kana raduasi bo mantodosaka kapepaa, pamula ntotona to Yahudi pade ri tou to tado to Yahudi mbii. 10 Agiana sumawee tou to nowia nuanu to nabelo kana rapemabose bo rabila pade mantarima katuwu mabelo lako ri Allatala, pamula ntotona to Yahudi pade tou to tado to Yahudi mbii. 11 Apaa Allatala tado nampelisi tou. 12 Tou-tou tado to Yahudi to tado nanguncani atura nu parenta Taurat, ande mowia jeko-ra, Allatala kana mosuku-ra noudamo tado nincani-ra atura nu parenta Taurat. Agiana tou-tou to Yahudi to nanguncanimo atura nu parenta Taurat pade isira mowia jeko, Allatala kana mosuku-ra mantutu atura nu parenta Taurat. 13 Apaa tado to namparonge parenta Taurat to nakono ri pangkalioaa nu Allatala, agiana to nampowia parenta Taurat-da to nakono ri pangkalioaa nu Allatala. 14 Noudamo isira tado nanguncani parenta Taurat, naria mbiida tou-tou to tado to Yahudi nowia parenta nu Allatala nasimbei ante nuanu to natetulisi ri rara nu parenta Taurat ee. Isira nowia ewa ee apaa neumba lako ri rara-ra. Nuanu ee nampopakalio bakote isira nanguncani nuapa to mamala bo to tado mamala rapowia-ra. 15 Nuanu nipowia-ra nampopakalio bakote nuapa to nipeparentai nu parenta Taurat natetulisi ri rara-ra, apaa isira dodo mbii biasana nipomasala bo niparikonoi nu pekiri-ra. 16 Jadi, ewa eemo ngoni nuanu to kana majadi ri Eo Potangara. Ri Eo ee, mantutu Kareba Belo to niparata-ku, Allatala kana mantudu i Yesus Kristus mantangara sumawee nuanu to natewunika ri rara mpekiri nu manusia.
Parenta Taurat tado mamala mampakasalama to Yahudi
17 Agiana, ikomi ante donu rara-mi nanguli: “Yaku ei to Yahudi.” Ikomi namparisaya bakote Allatala tado mosuku komi sabana i komi nantutu parenta Taurat. Ikomi nadonu apaa niuli-mi i komimo todea nu Allatala to nipelisi-Na. 18 Ikomi nipatuduki ante parenta Taurat, nangkajadika nincani-mi nuapa dota nu Allatala pade nanguncani nuanu to nabelo bo to tado nabelo. 19 Niuli-mi masipato komi monini toburo pade mangkeni kabaasa ri tou to natuwu ri rara nu kadedia. 20 Niuli-mi masipato komi mopatuduki tou nadoyo bo to tadopa nanoto, apaa nincani-mimo parenta Taurat pade ri rara nu parenta Taurat naria ngila ngaya panguncani bo pepatuduki to nakono. 21 Ikomi nopatuduki tou ntani, agiana nuapa pade i komi dodo mbii tado nadota neguru? Ikomi nopatuduki tou bona nemo mangio, agiana ikomi dodo mbii najadi topangio. 22 Ikomi nopatuduki tou nemo mobualo, agiana ikomi dodo mbii nobualo. Ikomi nampodaa karampua, agiana ikomi dodo mbii nangala nuanu niboli ri sou-sou nu karampua. 23 Ikomi nampomole bakote ikomi nanguncani parenta Taurat, bo ee i komi nangkanene Allatala pade tado nantutu atura-Na. 24 Ri rara Buku Nagasa nitulisi ewa ei: “Sabana ikomi, to Yahudi, nangkajadika sanga nu Allatala nipakawou riolo nu tou-tou to tado to Yahudi.”
25 Ande ikomi matundu ri parenta Taurat, batuana potindi komi ee naria lotuna. Agiana ande ikomi tado mamala mowia nuanu nipetudui ri rara nu parenta Taurat ee, batuana tado nuapa lotu nu potindi komi. 26 Tou-tou to tado to Yahudi tado nitindi, agiana ande ratutu-ra parenta Taurat, i sira nireke nu Allatala nasimbei ante tou to nitindi. 27 Pade tou-tou to tado nitindi ee kana mampomasala komi to Yahudi, apaa ikomi nanguncani parenta Taurat pade nitindi, agiana tado natundu komi ri parenta ee. Tou to tado to Yahudi tado nitindi, agiana isira natundu ri parenta ee. 28 Apaa tou to mpuu-mpuu to Yahudi, tado kawule to niote lako ri muli nu to Yahudi. Pade tou to mpuu-mpuu nitindi, tado kawule petindi to nipowia bona majadi pampetonondi ri koro. 29 Pegoliana tou to mpuu-mpuu niuli to Yahudi, ia ee-mo tou to ante rara mpuu-na nantutu Allatala. Pade to niuli petindi mpuu-mpuu, ee-mo petindi to nipowia nu Inosa Gasa nu Allatala to nobago ri rara, tado to nitulisi ri rara nu atura. Tou ewa ee kana mantarima peune lako ri Allatala, tado peune lako ri manusia.