Sura ni Paulus ri todea nu Allatala ri ngata
Roma
Petabe
1:1-7
1
1 Sarara-sarara sumawee ri ngata Roma. Sura ei lako si yaku i Paulus, batua ni Yesus Kristus. Allatala nampelisi bo nantudu-ku mampopowole Kareba Belo lako si-Ya. 2 Kareba Belo ee nitipa-Na lako ngkoulu ri nabi-nabi pade nariamo nitulisi ri rara Buku Nagasa. 3 Kareba belo ee nancambelai Ana nu Allatala, Pue-ta i Yesus Kristus. I Yesus najadi manusia, apaa Ia nipoanaka lako ri muli ni mbagou Daud. 4 Kagasa-Na nasimbei ante Allatala apaa Ana nu Allatala ami-Yada. Nuanu ee nadupa ante kuasa to nabete mpuu, to nopatuwu mpanculi-Ya lako ri kamatea. 5 Allatala nabelo rara-Na si yaku pade yaku nipajadi-Na suro bona mampopowole Kareba Belo ri sumawee tou ri dunia bo mangkeni-ra meparisaya pade matundu si Yesus, bona Ia rabila bo rapemabose. 6 I komi ri ngata Roma mbii nireke todea to nipokio nu Allatala bona majadi todea ni Yesus Kristus. 7 Eemo sabana pade nitulisi-kumo sura ei si komi sumawee to ri ngata Roma. Allatala nampotowe mpuu komi pade nampelisimo komi majadi todea-Na to nipatani. Kuperapi Tuama-ta Allatala bo i Pue Yesus Kristus, bona mabelo rara-Na si komi pade mampowia komi masana mpuu-mpuu.I Paulus madota malou ri ngata Roma
1:8-15
8 Pamulana yaku nosukuru ri Allatala ri rara sanga ni Yesus Kristus, apaa kareba nancambelai peparisaya-mi si Yesus nirongemo nu sumawee tou ri dunia. 9 Yaku nantora oa komi butu ngkani-ku nosambaya. Allatala to najadi sabi bakote nuapa to niuli-ku ee nakono. Ia-mo Allatala to mpuu-mpuu nipobagoka-ku ante nampopowole Kareba Belo nancambelai Ana-Na. 10 Niperapi ante rara mpuu-ku ri Allatala, bona Allatala mambei-ku loga mampotomuka komi. 11 Sabana nabete mpuu rara-ku motomu ante ikomi bona mamala-ku mobagi-bagi rasi lako ri Inosa Gasa nu Allatala to niwei nu Allatala si komi bona mampakaroso peparisaya-mi. 12 Patuju-ku bona yaku mbii rapakaroso sabana peparisaya-mi, jadi ikita sangkani-ngkani mombepakaroso mporara.
13 Sarara-sarara! Bona mincani, nadea ngkani ku-mo madota malou mampotomuka komi agiana natetolawani oa. Patuju-ku mampotomuka komi bona madea komi majadi topantutu i Yesus nasimbei ewa to najadimo ri tou to tado to Yahudi ri ngata-ngata ntanina.
14 Yaku madota mampotomuka komi sabana i yaku kana nampopowole kareba belo ri sumawee tou ri dunia, tado nipelisi-ku ba to ri ngata, ba to ri bulu, ba toposikola ba to tado nosikola. 15 Eemo sabana pade nabete mpuu rara-ku mampopowole Kareba Belo si komi to natida ri ngata Roma mbii.
Kareba Belo ee karosoa nu Allatala
(1:16-17)
16 Niparisaya mpuu-ku Kareba Belo ee, apaa kareba ee karosoa nu Allatala bona mampakasalama sumawee tou to neparisaya, pamula ntotona to Yahudi, pade tou tado to Yahudi mbii. 17 Sabana ante Kareba Belo ee-mo Allatala nampopakalio beiwa dalana manusia mosingkabelo mpanculi ante Allatala. Dalana ee, mamparisaya Allatala lako ri pamulana tudu ri kaopuana. Apaa naria nitulisi ri rara Buku Nagasa: “Tou to nanoa ri pangkalioaa nu Allatala kana matuwu mabelo sabana peparisaya-na.”
Suku nu Allatala ri kasalaa bo ri inggu nu manusia to nadaa
1:18-32
18 Lako ri suruga Allatala nosuku manusia to tado natundu bo noinggu nadaa. Apaa inggu nadaa nampalawa manusia bona manguncani pepatuduki to nakono nancambelai Allatala. 19 Nincani-da nu manusia inggu nu Allatala, apaa Allatala dodomo to nampopanguncanika-ra. 20 Lako ri tempo nu dunia nipajadi nu Allatala, nincanimo nu manusia kuasa-Na to naria duuna masae-sae ee pade Ia mpuu-mpuu Allatala. Noudamo tado nikalio-ra lence-Na, agiana nincani-ra lako ri sumawee nuanu to nipajadi-Na ri dunia. Jadi, tado maria tou mamala motance bona mampakakono koro-na. 21 Manusia nanguncani Allatala, agiana tado nampabila-Ya pade tado mbii nosukuru si-Ya. Isira kawule nampekiri nuanu to tado nolotu. Pekiri-ra nadoyo pade tado nincani-ra nuanu nakono. 22 Niuli-ra isiramo to napande, ntanono nadoyo-rada. 23 Tado nadota-ra nenomba ri Allatala, agiana isira nenomba ri karampua-karampua to nipowia nu manusia, to ewa manusia, ewa tonci, ewa binata nopaa aopo, pade ewaa ule.
24 Manusia tadomo nadota nenomba ri Allatala. Eemo sabana Allatala nampalambaka-ra nikuasai nu dota rara-ra dodo pade nombepogou sala. 25 Allatala to nakono, nisambei-ra ante nuanu tado nakono. Tadomo nadota nenomba ri Allatala Topepajadi. Isira aga nenomba bo nantutu nuanu to nipajadi nu Allatala. Kakono-konona, kawule Allatala Topepajadi to masipato raune duuna masae-sae. Amin. 26 Apaa manusia nowia ewa eemo, jadi Allatala nampalambaka-ra nantutu dota rara-ra to nadaa. Bangkele-bangkele tado-mo nadota nampokono baleilo-baleilo ewa kabiasaa nu manusia, agiana nampokono singka bangkele-radamo. 27 Iweetu mbii baleilo, tado-mo nadota nampokono bangkele, agiana nampokono singka baleilo-radamo. Inggu-ra ee nepakaeya mpuu, apaa nombepogou singka baleilo. Eemo sabana isira kana mantarima balasia to masipato ante parabuata-ra to nadaa ee. 28 Apaa manusia tadomo nadota manguncani Allatala, nipalambaka-ramo nu Allatala nipakeni nu pekiri-ra to nadaa ee, nangkajadika-ra nowia nuanu to tado masipato rapowia. 29 Rara-ra naponu ante sumawee nuanu to nadaa, nuanu tado nakono, bo nawou. Tado naosa rara-ra ante nuanu to naria si sira, nawou rara, nasingki rara, nepatesi, nebagiu, bo nombewiko. Isira namboli sodo ri rara, nantuturaka tou, 30 mampakawou sanga nu tou ntani, nalangko rara bo nojampa, nampodaa Allatala pade naboa. Napande-ra nangonco-ngonco dala bona mowia nuanu nadaa, nangewa totua-ra. 31 Isira nadoyo, tado mamala raparisaya, tado naria towe-ra pade tado naria asi rara-ra ri singkapada manusia. 32 Nincani-rada parenta nu Allatala to nanguli bakote to noinggu ewa ee masipato rasuku mate. Noudamo nincani-ra suku nu Allatala, agiana nipowia oa-ra inggu nadaa. Pade ande maria tou mantutu inggu-ra nadaa ee, nadonu mpuu rara-ra.