Tabe
(16:1-16)
16
1 Yaku madota mampopombencani komi ante i Febe. Ia ei sarara-ta bangkele to nantulungi todea nu Allatala ri ngata Kengkrea. 2 Ku-perapi si komi bona mantarima-ya majadi sarara-mi saongu kaparisayaa, apaa iwee amida inggu to masipato rapowia nu tou-tou to neparisaya. Ande maria banuapa-pa na-paralou, weikaka-ya, apaa nadeamo tou to nitulungi-na. Yaku dodo ei-mo sadua to nitulungi-na.3 Parata tabe-ku si Priskila pade si Akwila, roa-ku sampobagoa to nampobago-ka i Kristus Yesus. 4 Isira etumo to kemamate apaa madota mantulungi-ku. Yaku nosukuru mpuu si sira etu. Pade tado kawule yaku, agiana sumawee todea nu Allatala ri ngata ntanina to tado to Yahudi mbii nosukuru si sira. 5 Parata mbii tabe-ku ri todea nu Allatala to notobu ri sou ni Priskila bo i Akwila.
Tabe-ku si Epenetus sarara to nipotowe-ku. Ia-mo to paramula ntotona namparisaya i Yesus Kristus ri ngamba Asia. 6 Tabe mbii-ku si Maria. Iamo to nampobagoka mpuu-mpuu komi. 7 Parata mbii tabe-ku si Andronikus pade si Yunias. Isira etu sarara-ku to Yahudi to nitarungku noroa ante i yaku. Isira etu to nibila riolo nu suro-suro. Tadopa neparisaya-ku si Yesus Kristus, nokoulu-ramo neparisaya.
8 Parata tabe-ku si Ampliatus to nipotowe-ku apaa ia ee noroa ante i yaku nopasangkanimo ante i Pue. 9 Parata mbii tabe-ku si Urbanus, roa-ta sampobagoa to nampobagoka i Kristus. Pade tabe mbii-ku si Stakhis to ni potowe-ku. 10 Tabe-ku si Apeles. Katundu-na si Kristus nadupamo. Pade tabe mbii-ku si Aristobulus sancou. 11 Tabe-ku si Herodion. Ia etu sarara-ku to Yahudi. Tabe mbii-ku ri sarara-sarara saongu kaparisayaa to ri rara ncou ni Narkisus.
12 Parata tabe-ku si Trifena pade si Trifosa to mpuu-mpuu nampobagoka i Pue, pade si Persis to nipotowe-ku. Ia ee mbii to mpuu-mpuu nampobagoka i Pue. 13 Tabe mbii-ku si Rufus to nipelisi ni Pue, pade ri tina-na to nipajadi-ku ewa tina ngkoro-ku. 14 Parataka mbii tabe-ku si Asinkritus, si Flegon, si Hermes, si Patrobas, si Hermas, pade ri sumawee sarara saongu kaparisayaa to noroa-roa ante isira. 15 Tabe-ku si Filogus pade si Yulia, si Nereus pade sarara bangkele-na, si Olimpias pade ri sumawee to peparisaya to noroa-roa ante isira.
16 Pombetabe-tabemo ante rara mpuu-mpuu, ewa sarara saongu kaparisayaa. Sumawee topeparisaya si Kristus mbii nopakatu tabe-ra si komi sumawee.
Pepopatora
(16:17-24)
17 Sarara-sarara, ku-perapi mpuu-mpuu si komi, mainga-da komi ri tou to mampopogampotaa pade mampoposesaa peparisaya nu tou si Pue ante pepatuduki-ra to tado nasimbei ante to nipatudukika komi. Kawaosimo tou ewa ee. 18 Apaa tou ewa ee tado nampobagoka i Kristus, Pue-ta, agiana nobago bona mampakaosa dota rara dodo-ra. Ante lolita-lolita namomi, isira nampabagiu tou-tou to tado nanguncani nuapa-pa. 19 Sumawee tou nanguncanimo bakote ikomi natundu ri pepatuduki nancambelai Kareba Belo lako ri Allatala. Eemo sabana nadonu mpuu-ku si komi. Yaku madota bona ikomi mabija mancambelai nuanu nabelo, pade madoyo mancambelai nuanu nadaa. 20 Allatala to nambei kasanaa ri manusia, kana mampakaropu kuasa nu Mbagou seta, pade mampowia-ya matundu si komi. Towe rara ni Yesus Kristus, Pue-ta, kana mamporoasi oa komi.
21 I Timotius, roa-ku sampobagoa, nopakatu tabe-na si komi. Iwee mbida i Lukius, i Yason pade i Sosipater sarara-ku to Yahudi.
22 Tabe lako si yaku i Tertius, sarara-mi saongu kaparisayaa, to nitudu ni Paulus notulisi sura ei.
23 I Gayus mbii nopakatu tabe si-komi. Yaku nipopeari-na ri sou-na pade todea nu Allatala isee mbii nenomba ri sou-na. I Erastus topoatoro doi ri ngata ei, nopakatu tabe-na si-komi. Iwee mbiida sarara-ta i Kwartus.
Sumawee peune aga rawei ri Allatala
25 Raunemo Allatala! Ia nakuasa nampakaroso kaparisaya-mi nantutu Kareba Belo lako ri Allatala to nipopowole-ku nancambelai i Yesus Kristus. Yaku nampopowole kareba ee nantutu nuanu to nipopakalio nu Allatala, nancambelai liwo nu Allatala to nipontoliro lako impia. 26 Agiana tempo ei, nantutu parenta nu Allatala to tado naria namate ee, liwo ee nipopakaliomo pade nipopanguncanikamo ri sumawee manusia ri rara tulisia-tulisia nu nabi-nabi, bona i sira sumawee meparisaya pade matundu ri Allatala. 27 Sadudua ngkola-Na Allatala to naponu ante kapandea. Ia masipato raune duuna ri masae-sae, ante petulungi ni Yesus Kristus! Amin.