10
Ya pagpanaw ni Jisus pasinan ni Judiya aw J�rusalim
Ya palna-u ni Jisus sa mangugnanay na mag-ayaw
1 Pagkatigkas yan, nyindeg si Jisus aw manga eped nan lekat adti Kapirna-um aw nyanaw syuminan ni banwa na Judiya. Tyumalipag silan sa dakula' na tubig na Jordan aw pig-agiyan nilan ya banwa na apit adti silatan. * Aw dun ni pagpanaw nilan, gayed migkatipun adti kan Jisus ya mad�g na utaw, aw migpalna-u uman si Jisus kanilan kasiling na katanem nan.
2 Sambuk na allaw, awun manga Parisiyo na dyumateng adti kan Jisus aw nyusip kanan, kay kaliman nilan awun limanda adti kan Jisus. Yanagaw pigtanda' nilan sakanan, law nilan, �Unu, pigtumbay ya eseg na mag-ayaw sa ka?ubayan nan?� 3 Tyumubag si Jisus kanilan, �Wan ya syugu' kamayu adti Uldin na pig-atag kan Moysis?� 4 Aw miglong silan, �Pigtumbay ni Moysis na mag-ayaw ya eseg sa ka?ubayan nan kun una nan atagan na sulat sa pag-ayaw, aw tigkas yan, papanawun da nan.�* 5 Aw tyumubag si Jisus kanilan, �Y�iy saba ya du-an na pigtumbay ni Moysis ya pag-ayaw asini muna, asuntu sa kategel na tyugbulan mayu, kasiling mayu. Yanagaw pigsulat nan ya sugu' y�iy dun ni Uldin. 6 Manang lekat adti kadengan na pag-imo' na Tyumanem sa kadakula' na banwa, kya-ede-an ya palpa nan na �duwa ya punganan na utaw na pig-imo' nan: awun eseg, awun bubay.� * 7 �Y�iy ya du-an nan na indegan na eseg ya ama nan aw ina nan, aw pa-egketen silan ya ka?ubayan nan, 8 aw ya duwa silan ma-imo' sambuk da.� * Yanagaw beke' da silan na duwa manang sambuk da. 9 Aw ya pigsambuk da na Tyumanem, dili' galu silan pagpasuwayen na utaw!�
10 Pagliku' ni Jisus aw manga umagakan nan adti balay na pig-eya-an nilan, nyusip silan uman kanan sa kakawasan na piglong nan idtu. 11 Aw miglong si Jisus kanilan, �Ya eseg na mig-ayaw sa kanan ka?ubayan aw nyangugnan sa eped na ka?ubayan, lyakadan da nan ya muna ka?ubayan nan, 12 aw ya ka?ubayan na mig-ayaw sa kanan eseg aw nyangugnan sa eped na eseg lyakadan nan uman ya muna eseg nan.�
Si Jisus aw ya manga mangayse'
(Matiyo 19:13-15, aw Lukas 18:15-17)
13 Sambuk na allaw, awun manga utaw na nyandala adti kan Jisus sa mangkayantek na mangayse' nilan na un betangan na palad nan pada atagan silan na kadyawan. Manang pigsagda baling na umagakan nan ya manga utaw na nyandala sa mangayse' nilan. 14 Pagdengeg ni Jisus sa pagsagda nilan, nyadaman sa umagakan nan aw miglong kanilan, �Pakadiya kanak ya manga mangayse'. Ya-i mayu silan pagpigili! Kay ya manga utaw na dyumawat kanak siling na manga mangayse' ini, silan saba ya maka-akup adti kasakupan na Tyumanem. 15 Matinaw saba ya piglong ku kamayu: Pangkay singalan ya dili' malim dumawat kanak siling na pagdawat kanak na manga mangayse' ini, dili' saba silan maka-akup adti kasakupan na Tyumanem.� 16 Katigkas yan, pigkepkep nan ya manga mangayse' aw pigbetangan nan na kanan palad ya ulu nilan aw pig-atagan nan silan na kadyawan.
Ya eseg na mayaman
17 Un da galu si Jisus manaw, awun eseg na dyumalagan adti kanan aw lyumuhud dun ni asdangan nan, aw nyusip kan Jisus, law nan, �Kay Madyaw na Magpalna-uway, wan ya imo-un ku pada matagtun ku ya ginawa na wala' ya tyamanan?� 18 Aw nyusip si Jisus kanan, �Ananga' aku mu ngalanan na madyaw? Wala' saba ya utaw na madyaw. Sambuk da olo' ya tengteng na madyaw, ya Tyumanem. 19 Na, kya-ede-an mu ya manga sugu' dun ni Uldin: Dili' kaw magpatay sa eped na utaw, dili' kaw maglakadenen, dili' kaw magtakaw, dili' mu pagmatinawun ya galu' adti asdangan na mag-usayay, dili' kaw maglimbung sa eped na utaw, aw basayi ya kanmu ama aw ina.� 20 Aw tyumubag ya eseg, �Kay Magpalna-uway, pigdalug da ku alag ya kad�g y�iy lekat na tagbi' pa aku.� 21 Aw pig-inunu ni Jisus ya utaw yan aw pigginawa?an nan, aw law nan kanan, �Kay L�w, dakman sambuk ya un mu paglingeb: Uli' kaw aw galina ya kad�g na pigtagtun mu. Tigkas yan, atagan ya kadakula' na kuwalta yan adti manga utaw na makalalat. Kay kun imo-un mu yan, madyaw saba ya pagpakabetang mu adti tas na langit. Aw katigkas yan, liku' kaw aw dalug kaw kanak.� 22 Pagdengeg na utaw yan sa piglong ni Jisus, to-o migkabegat ya giya nan. Aw nyanaw na migkalat da ya ginawa nan kay to-o mad�g ya ka-unan nan.
23 Pag-indeg da na utaw yan, pyan-inunu ni Jisus ya tag sambuksambuk na umagakan nan aw law nan, �Malug saba sa utaw na mayaman ya maka-akup adti kasakupan na Tyumanem.� 24 Nyabelengbeleng silan sa piglong nan kay wala' nilan kalabeti. Yanagaw miglong pa si Jisus kanilan, �Kay mangayse' ku, ya manga utaw na syumalig sa ka-unan nilan, malug saba kanilan ya maka-akup adti kasakupan na Tyumanem. 25 Molas pa sa ayep na kamiliyo ya pag-agi adti buwaw na dagem kay sa utaw na mayaman na un maka-akup adti kasakupan na Tyumanem.� 26 Aw to-o pa silan nyabelengbeleng aw mig-usip-usipay silan, �Na, kun siling na maynan, singan ka' ya makatagtun sa ginawa na wala' ya katigkasan?� 27 Aw pig-inunu silan ni Jisus aw law nan, �Dili' na utaw mabatug y�iy manang mabatug saba na Tyumanem, kay wala' ya dili' mabatug na Tyumanem.�
28 Aw miglong si P�dro kanan, �Inunuwa ya kanami ini! Nyabus da nami pig-ayawan ya kadakula' pada magad kanmu.� 29 Aw tyumubag si Jisus, �Yan agaw, kay L�w. Aw matinaw uman ya piglong ku: Pangkay singalan ya malim dumalug kanak aw indegan nan ya kad�g asuntu kanak aw asuntu sa Madyaw na Ubat-ubat sa paghari' na Tyumanem, pangkay indegan nan ya balay nan, aw ya kanan manga kaylug, aw ya ama aw ina nan aw ya manga mangayse' nan, aw ya lupa' nan, 30 na, ya utaw yan, un liku' adti kanan asini tas na lupa' ya mad�g pa to-o sa idtu na pig-ayawan nan. Dumawat sakanan sa manga balay, aw manga kaylug, aw manga ina, aw manga mangayse', aw lupa', aw maka-agad dun uman ya manga pamulayam. Aw kagaya na kamoliyan na allaw, dawaten nan uman ya ginawa na wala' ya katigkasan. 31 Manang mad�g ya manga dakula' na utaw adun na un ma-imo' makalalat kagaya na kamoliyan na allaw, aw mad�g ya manga utaw na makalalat adun na un ma-imo' dakula' na utaw kagaya na kamoliyan na allaw.�
Ya katlu ni Jisus magkasampet sa pagkamatay nan
32 Na, sa pagpanaw pa nilan syuminan adti J�rusalim, * nyuna si Jisus na dili' to-o mawat sa manga umagakan nan. Aw nyab�l�t ya anenganeng nilan, aw nyangkallek ya eped na manga utaw na dyumalug kanilan. Aw pigtapid da uman ni Jisus ya sampulu' tag duwa ya umagakan nan aw pig-ubat-ubat nan kanilan ya un dumateng kanan, 33 law nan, �Pada ka-ede-an mayu, migpasinan da kitadun adti J�rusalim, aw aku na Ise' na Utaw un da atag adti manga mangkatas na kagun na magdadugsu-ay aw manga talaglawung sa Uldin na manga Judiyu, aw un aku nilan ukuman na patayen. Aw tigkas yan, atag aku nilan adti manga utaw na beke' na Judiyu, 34 aw odoy-odoyun aku nilan, aw eleb-eleban aw badasan nilan panlabeten, aw tigkas yan, patayen aku nilan. Manang pagdateng na katlu na allaw, mataw da aku lekat adti nyangkamatay.�
Ya pigsekat ni Santiago aw si Juan
(Matiyo 20:20-28)
35 Tigkas yan, migpalapit adti kan Jisus si Santiago aw si Juan na alag ise' ni Sibidyo, aw migsekat silan kanan, �Kay Magpalna-uway, awun tud nami kanmu galu na imo-un mu kanami.� 36 Aw nyusip si Jisus kanilan, �Wan ya kaliman mayu imo-un ku kamayu?� 37 Aw tyumubag silan, �Pag-ingkud da mu kagaya dun ni paghari' mu, tumbay mu kami na mingkud adti sayid mu, ya sambuk adti kalintu aw ya sambuk adti kawala.� 38 Manang miglong si Jisus kanilan, �Wala' mayu ka-ede-i kun unu ya pigsekat mayu. Unu, mabatug mayu ineman ya tabu' na un ku ineman? * Aw unu, mabatug mayu uman ya magpaba?utismu sa ba?utismu na un ku agiyan?� 39 Tyumubag silan, �E-e, mabatug nami.� Aw miglong si Jisus kanilan, �Un mayu agaw ineman ya tabu' na un ku ineman, aw un kamu ba?utismuwan sa ba?utismu na un ku agiyan. 40 Manang ya pag-ingkud adti kalintu ku aw adti kawala ku, beke' ku ya mamalli' kun singalan ya maka-ingkud dun. Kay dadan da pigbaya-an na Tyumanem.�
41 Sa pagdengeg na sampulu' ya umagakan ni Jisus sa pigsekat ni Santiago aw si Juan, nyangkadaman silan. 42 Yanagaw pigtawag ni Jisus adti sayid nan ya manga umagakan nan aw miglong kanilan, �Kya-ede-an da mayu ya bet na manga pangulu na manga utaw na beke' na Judiyu. Silan da ya tyumakmag aw gayed nilan pagleges ya kanilan pagkaliman adti manga utaw na nyasakup nilan. Aw maynan uman ya mangkatas na utaw, gayed silan magpansugu' sa kanilan manga utaw kay dakula' ya katundanan nilan. 43 Manang dili' mayu silan pagsilingan. Kun awun sambuk kamayu na kaliman nan magkadakula' na utaw, ma-imo' galu sakanan sugu-unun dun ni kamayu. 44 Aw kun awun sambuk kamayu na kaliman nan magkatas adti manga eped na utaw, masiling galu sakanan na allang adti kad�g na utaw. 45 Pangkay aku ya Ise' na Utaw, manang wala' aku kadi ni tas na lupa' pada sanggila-en, manang yan baling ya pigkadi ku ya pagsanggila' sa mad�g na utaw aw aku ya un magkalyu kanilan adti pagkamatay asuntu sa manga sala' nilan.�
Ya pagpaguli' ni Jisus sa mata ni Baltimiyo
46 Na, dyumateng si Jisus aw umagakan nan adti lunsud na J�riko dala uman ya mad�g na utaw. Sa pag-indeg nilan lekat adti lunsud, awun kyinita' nilan na eseg na buta na nyingkud dun ni kilid na dalan aw nyangilalat sa kad�g na utaw na lyumabay. Ya ngalan nan si Baltimiyo na ise' ni Timiyo. 47 Pagdengeg nan na si Jisus na taga Nasarit ya un lumabay dun, migtatawag to-o si Baltimiyo, law nan, �Kay Jisus na buwadbuwad ni Dabid! Kallati aku beg!� 48 Aw pigsagda sakanan na mad�g na utaw, law nilan, �Katinep kaw!� Manang wala' nan botoni ya pagtatawag. To-o la baling migtatawag, �Kay buwadbuwad ni Dabid, kallati aku beg!� 49 Pagdengeg ni Jisus sa tingeg nan, tyumeneng dagawdagaw sa panaw nan aw pigsugu' nan ya manga utaw na nyagad kanan, law nan, �Angaya mayu sakanan aw pakadiya kanak.� Aw pigtawag nilan ya eseg na buta aw law nilan, �Pakabagsegen mu ya ginawa mu! Indeg kaw kay pigtawag kaw nan!� 50 Aw maksay nan pigsalabel ya tatulung nan aw nyindeg aw nyadti kan Jisus. 51 Aw nyusip si Jisus kanan, �Wan ya kaliman mu na imo-un ku kanmu?� Aw tyumubag ya eseg yan, �Kay Magpalna-uway, kaliman ku beg na kumita' uman salut.� 52 Aw law ni Jisus, �Panaw da kaw, kay L�w. Asuntu sa pagsalig mu kanak, kyaguli-an da kaw.� Aw dayaw sakanan kyumita' aw dyumalug da kan Jisus sa panaw nan.