18
Si Pablo adti syudad na Corinto
1 Wala' kadugay, nyindeg da si Pablo lekat adti Aténas aw nyanaw pasinan adti Corinto. 2 Aw dun ni Corinto, bagu nan pigkilala ya sambuk na utaw na Judiyu na pigngalanan na si Akila. Na, si Akila taga probinsiya na Ponto idtu muna manang madugay ya pag-eya' nan adti Italiya dala ya ka͡ubayan nan na si Priscilla. Manang awun bala-ud na pig-imo' ni Impirador Cla͡udiyo na pa-alilin ya kadég na manga Judiyu lekat adti syudad na Roma, probinsiya na Italiya. * Aw yanagaw bagu dyumateng si Akila aw si Priscilla adti syudad na Corinto. Aw lyumaba' si Pablo adti kanilan. 3 Aw nyeya' pa dun aw syumambuk kanilan sa talabahu, kay alag silan magtaté-ay sa madakmel na manggad na pag-imo-un layaglayag. 4 Aw kada simana na Allaw na Paglagdeng, nyadtu si Pablo ni sinagoga aw syumambuk sa pagbilingbiling na manga utaw, kay kaliman nan magad kanan ya manga utaw mangintu-u kan Jisus dala ya manga utaw na Judiyu aw utaw na Grigo.
5 Pagdateng ni Silas aw si Timotiyo dun ni Corinto lekat adti Macédonya, nyatibulluk ya ginawa ni Pablo adti pag-ubat-ubat sa manga Judiyu aw gayed nan pigmatinaw adti kanilan na si Jisus, yan ya Kristu. 6 Manang mig-ampang silan kanan aw baling nilan pigsupla. Yanagaw nyadaman si Pablo kanilan aw pigtaptap nan ya alikabuk adti kadégkadég nan aw long nan kanilan, “Wala' da ya labet ku kamayu! Beke' da yan na kanak sala' kun pa-emel-emelen kamu na Tyumanem! Lekat adun adtu la aku pagpalna-u adti manga utaw na Héntil.”
7 Yanagaw pig-ayawan nan silan dun aw nyadtu la baling ni balay ni Tito Justo aw dun ni sayid nan pag-eya'. Na, si Tito Justo, nyanimba sakanan sa Tyumanem pangkay utaw sakanan na Grigo, aw tangkil na balay nan ya sinagoga. 8 Aw ya sambuk na magdadumala͡ay adti sinagoga na si Crispo, nyangintu-u la kan Jisus dala ya kadég na ka-epedanan nan dun ni balay nan. Aw madég pa uman ya manga utaw dun ni Corinto na migpakanyeg sa palna-u ni Pablo aw nyangintu-u aw migpaba͡utismu silan.
9-10 Na, sambuk na gabi, migpakita' kan Pablo si Jisus na liwan na tagaynep, law nan, “Dili' kaw magkallek! Awun aku gayed ni sayid mu. Yanagaw, wala' ya utaw na un magpakalat kanmu. Dili' mu pagpatenengen ya paglong sa kanak tingeg adti kanilan. Kay awun pa madég ya utaw asini syudad na pigpamalli' ku dadan na un mangintu-u.” 11 Yanagaw nyatingen si Pablo adti syudad na Corinto seled na sangka͡umay aw tenga', aw gayed nan dun pigpalna-u adti manga utaw ya tingeg na Tyumanem.
12 Pag-ingkud da ni Galliyon na gubirnador sa probinsiya na Akaya, migsambuk ya manga Judiyu na wala' pangintu-u dun ni Corinto na un mag-imo' sa limanda adti kan Pablo. Pigpasumunan nilan adti asdangan na ingkudanan na pag-ukum na gubirnador, 13 aw long nilan, “Ya utaw ini, gayed miggagad sa manga utaw adti sangkamulu' na pa-agi sa pagsimba sa Tyumanem, aw ya imo-unun nan lyumakad baling sa bala-ud na banwa tadun.”
14 Manang sa un da galu maglong si Pablo, tyumubag da baling si Galliyon adti manga Judiyu, “Ya diklamu mayu yeiy, kun tengteng kyalakadan nan ya bala-ud tadun, aw kun malat ya pig-imo' nan, awun indeganan ku pakanyegan ya diklamu mayu. 15 Manang kun yan baling ya pig-ayilan mayu ya kakawasan na manga tingeg mayu aw ya manga ngalan na utaw aw ya kamayu uldin na dyalug na manga Judiyu, wala' ya labet ku kamayu mag-usay. Kamu la ya pagbaya'.” 16 Aw pigpa-alilinan nan silan lekat adti asdangan na ingkudanan na pag-ukum adti usayanan nan. 17 Aw asuntu na kyele͡an silan na gubirnador, pig-agaw nilan baling si Sosténés na yan ya sambuk na magdadumala͡ay sa sinagoga, aw byadasan nilan pyanumbag adti pamanag na usayanan na gubirnador. Manang pigpalipaslipasan ni Galliyon ya pig-imo' nilan.
Ya pagliku' ni Pablo adti Antiyokiya sakup na Sirya
18 Na, nyatingen pa si Pablo seled na madég na allaw dun ni Corinto, aw tigkas yan nyanabi la sa mangintu-uway dun aw nyanaw sakanan pasinan adti pantalan na Cénkriya. Aw nyagad kanan si Akila aw ya ka͡ubayan nan na si Priscilla. Pagdateng nilan dun ni Cénkriya, migpabulu si Pablo pada ka-ede-an na manga utaw na nyatuman da ya dadan nan pigsapa' adti Tyumanem.* Aw dun da silan panik sa barko aw syumakay pasinan adti Sirya.
19 Aw sa pag-apit nilan dagawdagaw adti pantalan na Épéso, dun da pagpatagak si Akila aw si Priscilla. Aw nyadtu si Pablo ni sinagoga aw migbilingbiling sa manga Judiyu na nyanimba dun. 20 Aw pagkatigkas nan magpalna-u kanilan, kaliman nilan na madugay pa dun meya' si Pablo adti sayid nilan. Manang dili' sakanan malin magpatagen kanilan adti panaw nan, 21 aw long nan, “Liku-an ta kamu kun tumbay na Tyumanem.” Aw nyanabi la kanilan, aw nyanik si Pablo sa barko aw syumakay pasinan adti Sirya.
22 Pagdateng ni Pablo adti pantalan na Césariya, tyumukud sakanan pasinan adti Jérusalim aw nyapit sa manga mangintu-uway na migkatipun nyanimba. Pagkatigkas da na tud nan adti Jérusalim, nyanaw da pasinan adti Antiyokiya aw 23 dun sakanan katingen seled na pilangallaw. Pagkatigkas yan, nyindeg da sakanan pasinan ni probinsiya na Galaciya aw banwa na Pridya. Pagdateng nan, piglegeb nan ya manga lunsud aw manga kabalayan pada pakabagsegen ya pagpangintu-u na kadég na manga mangintu-uway dun ni manga banwa yan.
Si Apolos migpalna-u adti manga syudad na Épéso aw Corinto
24 Na, talana ni Pablo adti Galaciya aw Pridya, dyumateng adti Épéso ya sambuk na eseg na Judiyu na pigngalanan na si Apolos na taga syudad na Aléksandriya. Na, si Apolos to-o sakanan matadeng maglong aw dakula' ya kya-ede-an nan sa pigpasulat na Tyumanem asini muna. 25 Kyapalna-uwan da uman sakanan dadan kan Jisus, aw yanagaw nyatibulluk ya ginawa nan mag-ubat-ubat, aw matulid saba ya palna-u nan kun singan si Jisus, manang yan pa olo' ya tyamanan na kyataga͡an nan ya pigpalna-u ni Juan na Magbaba͡utismuway idtu muna. 26 Aw migpalekat si Apolos mig-ubat-ubat adti seled na sinagoga na wala' ya kakallekan nan. Sambuk na allaw, nyakadengeg si Akila aw si Priscilla sa ubat-ubat nan. Aw pigpa-agad nilan sakanan adti kanilan balay. Aw dayaw nilan si Apolos pigpalna-uwan, aw kyadugangan ya kya-ede-an nan sa manga pa-agi na Tyumanem.
27 Pagkatigkas yan, migpalpa si Apolos tumalipag sa dagat taman adti probinsiya na Akaya. Aw pigdasig na manga mangintu-uway dun ni Épéso ya palpa nan, aw pigsulatan nilan ya manga mangintu-uway adti Akaya pada dawaten nilan sakanan. Pagdateng da nan dun, dakula' saba ya tabang nan kanilan na nyangintu-u la magi sa grasya na Tyumanem, 28 kay gayed nan pigdeg ya manga Judiyu na migbilingbiling kanan adti asdangan na manga utaw. Kay pigmatinaw nan lekat adti pigpasulat na Tyumanem na si Jisus, yan ya Kristu.