4
Ya manga pundinganan sa Paghari' na Tyumanem
Ya pundinganan sa manga bini'
(Matiyo 13:1-9; aw Lukas 8:4-8)
1 Na, lyumiku' si Jisus adti baklayan na danaw aw migpalekat migpalna-u sa manga utaw. Aw kyalimpungan da sakanan na to-o mad�g na utaw na un magpakanyeg kanan. Yanagaw mig-alin si Jisus adti balangay dun ni kababawan na danaw aw nyingkud adti tas na un magpalna-u kanilan. 2 Aw mad�g ya pigpalna-u nan magi sa manga pundinganan, law nan, 3 �Pagpakanyeg kamu! Awun utaw na nyadtu ni pawa' nan na un magtanem sa bini'. 4 Talana migsabug sa bini', * ya eped nyataktak baling adti dalan aw pyanubug na manga mannanap na tyumugpa' dun. 5 Ya eped na bini' nyataktak adti kabatuwan aw nyaksay gyumiti' kay wala' abay ya lupa'. 6 Manang pagkapasu' da na sega, nyaksay uman nyalanes ya manga tanem kay wala' pakadalid. 7 Aw ya eped na bini' nyataktak adti magalet aw gyumiti' da aw tyumulin, manang wala' pakabunga, kay lyandungan da na magalet na suksukun. 8 Manang ya manga bini' na nyakasabug adti madyaw na lupa', tyumulin aw nyamunga sa to-o mad�g. Awun bini' na nyunga na tag katluwan, aw awun bini' na nyunga na tag ka?eneman, aw awun bini' na nyunga na tag sanggatus.� 9 Aw miglong pa si Jisus kanilan, �Kun malim kamu makalabet, pakanyegi mayu.�
Ya kakawasan na pundinganan sa manga bini'
10 Nyuli' da ya eped na manga utaw, manang kenne' pa ni Jisus nyingkud adti tas na balangay. Aw migpatagak dun ni baklayan ya eped na manga utaw, dala ya sampulu' tag duwa ya apostol�s, aw pig-usip nilan si Jisus sa kakawasan na pundinganan y�iy. 11 Aw miglong si Jisus kanilan, �Pigtumbay da kamayu ya pagka-ede' sa pigtagu' idtu muna sa Paghari' na Tyumanem, kay kaliman mayu kalabetan. Manang ya manga eped na utaw, dili' silan malim makalabet sa Paghari' nan, yanagaw ubatan ku silan magi olo' sa manga pundinganan, 12 kay dadan da na Tyumanem pigpasulat ya manga utaw y�iy, law nan,
�Pangkay gayed nilan pyaninaw, manang wala' nilan kita-a.
Aw pangkay gayed nilan pyakanyegan, manang wala' nilan kalabeti,
kay wala' ya kalim nilan magselsel,
aw yanagaw wala' ya un nilan imanen na paluwa-en silan na Tyumanem sa manga sala' nilan.��*
13 Nyusip si Jisus kanilan, �Unu, wala' pa mayu kalabeti ya pundinganan y�iy? Na, unun mayu ya pagpakalabet sa manga eped na pundinganan ku? 14 Ini ya kakawasan na pundinganan sa manga bini': Ya utaw na magsabug sa bini' siling na utaw na magpa-ede' adti eped na manga utaw sa Madyaw na Ubat-ubat sa paghari' na Tyumanem.
15 �Ya bini' na nyataktak adti dalan, yan ya siling na manga utaw na migpakanyeg da sa Madyaw na Ubat-ubat aw pangkay pyakanyegan da nilan manang maksay dyumateng si Satanas aw pig-agaw nan ya kad�g na pigdengeg nilan.
16 �Ya bini' na nyataktak adti kabatuwan, yan ya siling na manga utaw na migpakanyeg da sa Madyaw na Ubat-ubat aw maksay nilan dyawat aw to-o silan magleya 17 manang wala' pakadalid ya pagpangintu-u nilan. Ila' aw dumateng ya manga kakalugan aw pakalaten silan na eped na utaw asuntu sa pagpangintu-u nilan sa Madyaw na Ubat-ubat, wala' silan pagpadeleg manang maksay nilan kya-ayawan ya pagpangintu-u nilan kanak.
18 �Ya eped na bini' na nyataktak adti magalet, yan ya siling na manga utaw na migpakanyeg da sa Madyaw na Ubat-ubat aw nyangintu-u la silan 19 manang gayed silan nyaypeng sa pag-eya' nilan, aw ya kaliman nilan pakadyawun ya pagpakabetang nilan asini tas na lupa', aw pigbuyu silan na kalim nilan magluduk sa ka-unan. Ya syampetan nan, wala' ya bunga nilan kay dili' da nilan tibullukun ya ginawa nilan adti kanak.
20 �Manang ya manga bini' na nyakasabug adti madyaw na lupa', yan ya siling na manga utaw na migpakanyeg sa Madyaw na Ubat-ubat aw nyangintu-u silan aw dyumalid adti anenganeng nilan, aw awun nyamunga na tag katluwan, aw awun nyamunga na tag ka?eneman, aw awun nyamunga na tag sanggatus.�
Ya pundinganan sa salengan
21 Miglong pa si Jisus kanilan, �Enda', pagdala mayu sa salengan adti tambi', dili' langkuban na be-en aw maynan uman dili' betang adti dalem na katri? Manang betang baling adti bantawanan. 22 Ya kakawasan na pundinganan y�iy: Ya kad�g na pigtagu' adun, dili' madugay kabukasan da, aw ya kad�g na wala' pa kalabeti idtu muna, dili' madugay kalabetan saba. 23 Kun malim kamu makalabet, pakanyegi mayu.�
24 Miglong uman si Jisus, �To-o mayu pakanyegi ya piglong ku kamayu! Kay kun matibulluk kamu magpakanyeg, to-o pa dakula' ya kalabetan mayu, aw dugangan pa na Tyumanem ya kya-ede-an mayu. 25 Kay ya utaw na magtuman sa pigpakanyegan nan, dugangan pa ya kyalabetan nan, manang ya utaw na wala' pagtuman sa pigpakanyegan nan, pangkay kyalabetan nan ya tin tagbi', manang kamangen pa yan lekat adti kanan.�
Ya pundinganan sa pagtulin na bini'
26 Migpundinganan pa si Jisus, law nan, �Ya Paghari' na Tyumanem siling na utaw na migsabug sa bini' adti pawa'. 27 Pagkatigkas nan sabug ya bini', lyumiku' sakanan adti eped na talabahu nan. Kada gabi nyakatulug, aw pagka-allaw migbangun sakanan, aw ya bini' gyumiti' da aw tyumulin. Manang wala' na utaw yan ka-ede-i kun unu ya pagtulin na bini'. 28 Ya lupa', yan ya migpatulin sa tanemenen. Una gyumiti', aw tigkas yan migkatas, aw tigkas yan nyampameles, aw tigkas yan nyaniswak da. 29 Pagka-inug da na bunga nan, aniyen da na utaw.�
Ya pundinganan sa bini' na mustardo *
30 Miglong pa si Jisus, �Ayin pa tadun pa-unawa?a ya Paghari' na Tyumanem? Ubat pa ku kamayu ya sambuk na pundinganan pada ka-ede-an mayu: 31 Ya Paghari' na Tyumanem siling na sambuk na bini' na mustardo. Tagbi' to-o ya bini' yan asini tas na lupa' 32 manang pagtanem sa bini' na mustardo, tumulin da, aw magkatas pa kay sa eped na tanemenen. Dakula' ya lawas nan aw mabakla' ya manga sanga nan umba' kapugadan na manga mannanap na maglupad adti dalem na langit.�
33 Yanagaw magi sa manga pundinganan siling na maynini, pigpalna-u ni Jisus kanilan ya Madyaw na Ubat-ubat sa Paghari' na Tyumanem, umba' sa kalabetan nilan. 34 Pigpalna-uwan nan ya mad�g na utaw magi olo' sa manga pundinganan, manang pigbangal nan adti manga umagakan nan ya kadakula' na kakawasan na manga pundinganan.
Ya pagpateneng ni Jisus sa samet
(Matiyo 8:23-27 aw Lukas 8:22-25)
35 Na, pagsallep da na sega, miglong si Jisus adti manga umagakan nan, �Naten talipagen ya danaw!� 36 Pig-ayawan nilan ya mad�g na utaw adti baklayan, aw syumambuk kan Jisus ya manga umagakan nan adti seled na balangay, aw nyanaw silan. Aw awun manga eped na balangay na nyagad kanilan. 37 Sagwa nyakatenga-tenga' da silan sa danaw, dyumateng ya to-o mabandes na samet, aw syalampawan na manga baled ya kilid na balangay nilan aw un da matmu' na tubig. 38 Manang nyakatulug si Jisus adti ulin na balangay dun ni tas na kama. Aw pigpukaw sakanan na manga umagakan nan aw law nilan, �Kay Magpalna-uway, agpet da malened ya balangay ta! Unu, wala' kakamang ya ginawa mu na agpet da kitadun malemes?� 39 Migbangun da si Jisus, aw pigsagda nan ya samet, �Tangke' kaw!� Aw pigsagda nan ya danaw, �Katingen kaw!� Aw tyumeneng saba ya samet aw migkalinaw da ya danaw. 40 Aw tigkas yan, miglong si Jisus kanilan, �Ananga' kamu mallek? Unu, wala' pa ya pagsalig mayu kanak?� 41 Manang migteneb da silan aw mig-usip-usipay silan, �Singalan ya utaw y�iy? Tay, tay sa utaw ini! Pangkay ya samet aw ya danaw magka?agad kanan!�