5
Ya pag-alilin ni Jisus sa manga malipa' na ispiritu na syumeled adti utaw
1 Na, dyumateng si Jisus aw ya manga umagakan nan adti dipag na danaw, dun ni banwa na pig-eya-an na manga taga Girasa. 2 Sagwa si Jisus nyanog lekat adti balangay, awun eseg na maksay syuminan adti kanan na un sumungun kanan. Na, ya eseg yan pigseledan na malipa' na ispiritu 3 aw madugay da nyeya' adti manga ilib na kalebengan sa manga utaw. Aw pangkay piggapus ya bekten nan aw pig-eketan ya siki nan, aw pangkay pigsangkali-an pa na manga utaw, manang dili' katagenan. 4 Pyamugtu' nan ya sangkali' aw pigleped nan ya putaw. Aw wala' ya utaw na un makatagen kanan kay to-o mabagseg aw mabulut. 5 Aw kada gabi aw kada allaw, gayed miglegeblegeb adti manga kalebengan aw manga buntud. Gayed sakanan mig-ulangag aw pigdakdakan nan na batu ya lawas nan.
6 Adtu pa si Jisus ni mawat, dadan da na utaw yan pigkita' aw yanagaw dyumalagan pasinan adti kanan. Aw pagsungun nan kan Jisus, lyumuhud aw nyangillupung adti asdangan nan. 7-8 Aw pigsugu' ni Jisus ya malipa' na ispiritu, law nan, �Luwa' kaw adi eseg ini!� Aw tigkan mig-ulangag ya malipa' na ispiritu, law nan, �Kay Jisus na Ise' na Tyumanem na To-o Matas, pabaya-i la aku! Nyanginayu' aku kanmu sa ngalan na Tyumanem na dili' aku mu beg pagpati-isen!� 9 Aw pig-usip ni Jisus ya malipa' na ispiritu, law nan, �Singan ya ngalan mu?� Tyumubag sakanan, law nan, �Si L�gion, kay mad�g kami, matag kami pilam malalan.� 10 Aw gayed nyanginayu' kan Jisus na dili' nan silan alilinan lekat adti banwa yan.
11 Na, awun mad�g to-o na taku' na nyangaliwad adti kakayaban na malapit dun. 12 Yanagaw nyanginayu' kan Jisus ya manga malipa' na ispiritu, law nilan, �Tumbayan beg kami na sumeled adti manga taku' iyan.� 13 Pigtumbay da silan ni Jisus. Aw ya kad�g nilan lyumuwa' lekat adti eseg yan aw adtu la silan seled ni manga taku'. Tigkas yan, nyampamalaguy ya kad�g na manga taku' lekat adti kakayaban aw kyumawas silan dun ni pangpang adti ligad na danaw. Aw duwammalalan ya kad�g na taku' na nyabus nyangkalemes.
14 Na, ya manga magdadiyaga?ay sa manga taku', kyinita' nilan ya nya-imo', aw nyalaguy silan adti lunsud na malapit dun, aw pig-ubat nilan adti manga utaw dun ni lunsud aw palibed nan ya kyinita' nilan. Kaliman na manga utaw ka-ede-an ya kadakula' na nya-imo', yanagaw nyanaw silan pasinan adti kan Jisus. 15 Pagdateng da nilan adti kan Jisus, kyinita' da nilan ya eseg na pigseledan idtu muna na mad�g na busaw, aw kyinita' nilan na migkadyaw da ya anenganeng nan, kay nyingkud da sakanan aw migkad�gkad�g da. Aw nyangkallek silan. 16 Aw ya manga utaw na kyumita' sa kad�g na nya-imo' sa eseg yan aw sa manga taku', pig-ubat nilan uman adti manga utaw na bagu dyumateng. 17 Katigkas yan, nyanginayu' silan kan Jisus na indegan nan ya banwa nilan.
18 Sa pagpanik da ni Jisus adti balangay, nyanginayu' kanan ya eseg na pig-alilinan da nan sa manga busaw, law nan, �Magad aku kanmu!� 19 Manang wala' sakanan pa-agadan ni Jisus. Pigsugu' baling ni Jisus, law nan, �Uli' da kaw adti kanmu manga utaw aw ubati silan sa kadakula' na pig-imo' na Tyumanem kanmu aw pig-unu nan ya pagkallat nan kanmu.� 20 Pagkatigkas yan, nyindeg ya eseg aw nyanaw da adti manga utaw nan. Aw pigpalekat nan ya pag-ubat-ubat adti manga utaw na taga D�kapolis sa kadakula' na pig-imo' ni Jisus kanan. Aw nya-enneng-enneng ya kad�g na utaw na migpakanyeg sa piglong nan.
Ya pagpaguli' sa ka?ubayan aw ya pagmataw sa ise' ni Jairus
21 Na, si Jisus aw ya manga umagakan nan syumakay sa balangay aw tyumalipag da uman sa danaw. Pagdateng nilan, * dyumuguk da adti kanan ya mad�g to-o na manga utaw na tyumagad kanan dun ni baklayan. 22 Aw dyumulud kanan si Jairus na yan ya sambuk na pigsaligan adti sinagoga. Aw lyumuhud adti asdangan ni Jisus 23 aw nyanginayu', law nan, �Ya ise' ku na un da magkadalaga, to-o kyatigda-an aw un da beg matay! Agad kaw kanak, aw betangi na palad mu na un kaguli-an aw kamatawan da!� 24 Yanagaw nyagad si Jisus kanan. Aw nyagad uman kanilan ya mad�g to-o na manga utaw, aw gayed nilan pig-insek si Jisus dun ni dalan.
25 Na, dun ni tenga' na mad�g na manga utaw na mig-insek kan Jisus, awun sambuk na ka?ubayan na gayed byagwasan na dugu' seled na sampulu' tag duwa ya umay. 26 Aw nyalegeb da nan ya mad�g na doktol migpabulung taman na nyabus da ya kuwalta nan, manang wala' sakanan kaguli-i, aw to-o la baling migkadakula' ya bati-enen nan. 27 Dyengeg da nan ya pag-ubat na manga utaw na awun da si Jisus. Yanagaw dyumulud ya ka?ubayan yan nyagi di tenga' na manga utaw na apit adti bagakwang ni Jisus. Pagkalapit da nan, pig-awidan nan ya pangaway na tatulung ni Jisus, 28 kay gayed sakanan miglong adti anenganeng, �Pangkay kun awidan ku olo' ya pangaway na tatulung nan, kaguli-an da aku.� 29 Aw pagpaka-awid da nan sa pangaway, tigkan tyumeneng ya pagbagwas kanan sa dugu', aw kya-ede-an nan na kyaguli-an da sakanan. 30 Aw kya-ede-an da uman ni Jisus na awun tulus na lyumuwa' kanan. Yanagaw bigla' nyatubang adti mad�g na utaw dun aw mig-inunu kanilan, aw law nan, �Singan ya nyawid sa tatulung ku?� 31 Nyabelengbeleng ya manga umagakan nan sa usip ni Jisus, aw law nilan, �Kyinita' da mu ya kad�g na utaw na mig-insek kanmu, yanagaw ananga' kaw musip, �Singan ya nyawid kanak?� � 32 Aw gayed pyaninaw ni Jisus adti kad�g na utaw kun singan ya nyawid kanan. 33 Na, kya-ede-an da na ka?ubayan yan na kyaguli-an sa magkedel nan, aw kyatinawan da sakanan na yan ya nyawid sa pangaway na tatulung ni Jisus, yanagaw lyumiku' sakanan adti kan Jisus. Manang migteneb to-o aw lyumuhud adti asdangan nan aw nyangillupung. Aw pig-ubat nan ya kadakula' na nya-imo' kanan. 34 Aw miglong si Jisus kanan, �Kay ise' ku, kyaguli-an da kaw asuntu sa pagpangintu-u mu kanak. Yanagaw uli' da kaw aw dili' da kaw magkallek kay dayaw da kaw kyaguli-an.�
35 Sa wala' pa katigkas ya paglong ni Jisus sa ka?ubayan, dyumateng ya manga sugu-anen ni Jairus lekat adti balay nan, aw law nilan kan Jairus, �Kay Amu, nyatay da beg ya ise' mu! Yanagaw ananga' pa mu pagudun ya Magpalna-uway?� 36 Kyadenggan ni Jisus ya pig-ubat nilan kan Jairus manang pigpalipaslipasan nan, aw piglongan nan baling si Jairus, �Dili' kaw magkallek. Salig kaw kanak.�
37 Na, wala' kalim si Jisus agadi na manga utaw adti balay ni Jairus. Yan olo' ya pigpa-agad nan si P�dro aw si Santiago aw ya mangud ni Santiago na si Juan. 38 Pagdateng nilan adti balay, kyinita' ni Jisus ya manga utaw na migpanmatay. 39 Sa pagseled da ni Jisus dun ni balay, nyusip kanilan, �Ananga' kamu s�iy magsasugaway aw magpanmatay? Wala' kalaw kamatay ya ise', olo' nyakatulug!� 40 Aw to-o si Jisus pig-ikel-ikelan na manga utaw. Manang pigpantulud nan adti luwa' ya manga migpansasugaway aw pigpa-agad nan ya ama aw ina na ise' dala uman ya tulu ya umagakan nan adti seled na tambi' na kyakulangan na lawas na ise'. 41 Tigkas yan, pig-awidan nan ya bekten na ise' aw law nan dun ni kanilan tingeg, �Talita kum!� Ya kakawasan nan: �Kay D�', pagbangun kaw!� 42 Aw tigkan migbangun ya ise' ni Jairus aw migpanawpanaw da. Na, sampulu' tag duwa ya umay nan. Aw to-o migleya ya dun ni seled na balay aw to-o nya-enneng-enneng sa pigkita' nilan. 43 Aw pigsugu' silan ni Jisus, law nan, �Ya-i mayu pag-ubatan adti eped na utaw ya nya-imo'!� Aw piglongan nan uman silan na atagan ya ise' na kakan.