3
Ya pagpaguli' ni Jisus sa utaw na kimay adti Allaw na Paglagdeng
1 Na, syumeled uman si Jisus adti sinagoga, aw dun ya sambuk na eseg na kimay ya bekten nan. 2 Aw nyawun uman ya manga Parisiyo na un magtanaw sa imo-unun ni Jisus, kun paguli-en nan ya bekten na utaw sa Allaw na Paglagdeng aw dun da nan kalakadi ya Uldin. * Kay yan ya tud nilan ya maglimanda kanan. 3 Aw pigtawag ni Jisus ya eseg na kimay, law nan, �Adi kaw aw indeg kaw asini asdangan na kad�g na utaw.� 4 Tigkas yan, pig-usip nan ya manga Parisiyo, law nan, �Na, adti Uldin na pig-atag na Tyumanem kan Moysis, wan ya pigtumbay sa manga utaw imo-un adti Allaw na Paglagdeng, ya imo-unun na madyaw aw ya imo-unun na malat? Aw wan uman ya madyaw imo-un, paluwa-en ya utaw lekat adti pagti-is nan, aw pabaya-an?� Manang ya manga Parisiyo wala' pakatubag kanan. 5 Nyinunu si Jisus sa tag sambuksambuk kanilan aw nyadaman sakanan. Aw migkalat uman ya ginawa nan asuntu sa kategel nilan. Tigkas yan, miglong si Jisus adti eseg na kimay, �Ulada ya bekten mu.� Aw pag-ulad nan sa bekten, kyaguli-an sakanan. 6 Tigkas yan, lyumuwa' ya manga Parisiyo adti sinagoga aw migsambuk sa manga utaw na lekat adti partido ni H�rod�s, * aw migpalekat silan nyamantak kun unun nilan ya pagpapatay kan Jisus.
7-8 Manang si Jisus aw ya manga umagakan nan, nyanaw silan adti baklayan na danaw. Aw dyumalug kanilan ya to-o mad�g na utaw kay dyengeg nilan ya kad�g na pigpan-imo' ni Jisus. Ya manga utaw na dyumalug kanilan, lekat silan adti Galiliya, adti Judiya aw adti syudad na J�rusalim, aw lekat adti banwa na Idum�ya. Aw awun uman dyumalug kan Jisus na lekat adti manga banwa apit adti silatan na tubig na Jordan, aw manga utaw na lekat adti sakup na lunsud na Tiro aw lunsud na Sidon. 9-10 Aw pigpangguli' ni Jisus ya mad�g na utaw na kyedelan, manang gayed sakanan pig-insek kay kaliman nilan mawid kanan. Yanagaw, pigsugu' ni Jisus ya manga umagakan nan na mangay sa balangay pada un nan ingkudan adti kababawan na tubig pagaw mapeyet ya baklayan. 11 Aw ila' awun utaw na pigseledan na malipa' na ispiritu, pagkita' da nan kan Jisus, nyangillupung kanan aw lyumebleb dun ni asdangan nan, aw mig-ulangag miglong, �Ikaw ya Ise' na Tyumanem!� 12 Manang pigpigilan ni Jisus ya manga malipa' na ispiritu, law nan, �Ya-i mayu pag-ubatan kun singan aku!�
Ya pagpamalli' ni Jisus sa sampulu' tag duwa ya apostol�s
13 Pagkatigkas yan, tyumukud si Jisus sa buntud aw nyagad kanan ya mad�g na manga utaw. Aw dun ni buntud, pigtawag ni Jisus ya manga eped kanilan, aw dyumulud silan kanan. 14 Aw pigpamalli' ni Jisus lekat kanilan ya sampulu' tag duwa ya eseg aw pig-imo' nan apostol�s, kay silan ya un mag-iyeped kanan aw silan ya sugu-un nan na magpa-ede' adti mad�g na utaw sa Madyaw na Ubat-ubat kanan, 15 aw pig-atagan nan silan na katulus na maka-alilin sa manga busaw.
16 Y�iy ya sampulu' tag duwa ya eseg na pigpamalli' ni Jisus: Si Simon na pigngalanan nan na si P�dro, 17 aw si Santiago aw ya mangud nan na si Juan. Si Santiago aw si Juan ise' silan ni Sibidyo, aw piggelal silan duwa ni Jisus na Bo�-an�rg�s, na kakawasan nan: dadaneg. Kay siling silan kunu na dadaneg. 18 Pigpamalli' nan uman si Andr�s, aw si Pilipi, aw si Baltolom�, aw si Matiyo, aw si Tomas, aw si Santiago na ise' ni Alpiyo, aw si Tadiyo, aw si Simon na Kananiyo, * 19 aw si Judas Iskariyoti na yan ya un maggalin kan Jisus adti manga po-on nan.
20 Pagkatigkas yan, lyumiku' si Jisus aw ya manga eped nan adti balay. Wala' kadugay, migkatipun da uman kanilan ya mad�g na utaw aw yanagaw wala' da pakaselat si Jisus aw manga umagakan nan pakakan. 21 Na, pagdengeg na pamiliya ni Jisus sa manga pigpan-imo' nan adti mawat, nyindeg silan lekat adti kanilan banwa na un mag-angay kanan, kay iman nilan aw migkamenengmeneng da. 22 Adti katipun na manga utaw dun ni balay, awun uman manga talaglawung sa Uldin na manga Judiyu na dyumateng da lekat adti J�rusalim na un manilib sa pig-imo' ni Jisus. Miglong silan sa manga utaw, �Syeledan sakanan ni Bilsibul,� * aw miglong silan uman, �Pig-alilinan nan saba ya manga busaw magi sa katulus na pangulu na manga busaw.� 23 Yanagaw pigtawag silan ni Jisus, aw piglongan nan silan sa pundinganan, �Unun ka' ni Satanas ya pag-alilin kan Satanas? 24 Simpan kun awun pangulu sa kasakupan, aw magpantanam ya manga sakup nan aw magsi-atu kanan, na, dili' madugay magsabug ya kasakupan yan, aw magkalat uman ya pagdumala nan. 25 Aw maynan uman, kun awun tagtun sa balay, aw magpantanam ya manga ka-epedanan nan, aw magsi-atu silan kanan, na, dili' madugay magsabug ya manga utaw aw magkalat saba ya pag-eya' nilan. 26 Na, kun si Satanas tanamen nan ya kanan manga kasakupan, magkalat saba ya pagdumala nan aw degen da dun sakanan. 27 Sambuk uman na alimbawa': Singan ka' ya makaseled sa balay aw mag-agaw sa kad�g na ka-unan kun mabagseg ya utaw na tagtun sa balay? Manang kun una nan gapusun ya tagtun, mabatug da nan ya pagkamang sa kad�g na ka-unan dun ni balay. *
28 �Yanagaw matinaw ya un ku paglongun kamayu: Pangkay unu ya sala' mayu adti Tyumanem aw pangkay unu ya paglongun mayu na malatay adti kanan, mabatug lanasen ya manga sala' mayu. 29 Manang pangkay singalan ya magtampeyes sa Ispiritu na Tyumanem, dili' saba mabatug lanasen ya sala' nan aw wala' ya un nan imanen na paluwa-en sakanan lekat adti pagpa-emel-emel na Tyumanem.� 30 Ya du-an na piglong ni Jisus y�iy adti manga talaglawung sa Uldin kay miglong silan, �Syeledan sakanan saba na malipa' na ispiritu.�
31 Na, dyumateng da ya ina ni Jisus aw manga mangud nan na eseg adti balay na pigpalna-uwan nan, aw mig-indeg-indeg silan adti luwa' asuntu sa kad�g na utaw dun. Yanagaw pigpatawag nilan si Jisus. 32 Adti seled na balay, nyingkud ya mad�g na utaw dun ni palibed ni Jisus, aw awun miglong kanan, �Asini la ya ina mu aw manga inulug mu. Awun da silan ni luwa' nyaninaw kanmu.� 33 Manang pig-usip ni Jisus ya kad�g na utaw, �Unu, kya-ede-an da mayu kun singan pa uman ya kanak ina aw kanak manga inulug?� 34 Aw pig-inunu nan ya manga utaw na nyakapalibed kanan, aw law nan, �Ya manga utaw ini, y�iy ya ina ku aw manga inulug ku, 35 kay pangkay singalan ya mag-imo' sa pagkaliman na Tyumanem, yan ya inulug ku aw ina ku.�