Yohanesti mome toro pibogha
Selekne
El nenerop yubu palilamap
Yohanesti alnirobag mome toro pibog yubu enekona, tam phende uro yabilul aro mome toro pibog. Tam seleknena, nimiri mome ene kemero nimi wanaag seneraglamikti, “Allahap Elme Yesus Kristusap ma'aptahabe,” aro wana yeng uro senelamukang aro mome toro pibog. Tam phendepnena, sengkwanektop yubu ambatsirop nimiri Yesusag wana palirop nimi wa'a enero ekel ina poa phiikag aro mome toro pibog. Sengkwanektop yubu ambarelamsiek yubu enekona, “Nia mangkina mog so'oag uropne nimiri haingdi kemeropne aneko ot malinge agha wamla, ane sembe Yesus Allah Elme wamogne sik uro mog so'oag nimi nongag tanep kom,” aro ekel ina ambarelamsiek. Sindi sengkwanektop yubu ambarelamsiekne sunsunum uro, walia uropneap, nimi o'ona senehinneap tam nubunge senerop kom. Sengkwanektop yubu ambatsirop nimi tanekori, “Nia mangkina mog so'oag uropne ot malinge agha wamla,” senenneag agha nimiri nongag malinge to, walinge to uropne sembe seneraglamek kom. Sin sembe tam o'omnena, “Ot tognoropne ekonne el tahabe,” aro sarekareplamek.
Mome eneag Yohanesti, “Sengkwanektop yubu aneko ka'ebaikag,” aro Yesusag wana palirop nimi sembe mome toro pibog. Yohanestina, “Ot sik Yesus mog so'oag nimi nongag taog,” aro tibin nenero ambatsiog. Apna, nimiri mog so'o enekoag ul piropne sembe ekon tan koma, “Yesusag wana palirop nimiri ora nimi o'ona sembahinep neog wamla,” aro mome toro pibog.
Yohanesti yubu selekne neneag mome toro pibogha lomag wamlange
Yubu ene mome toropne sembe (1:1-4)
Allah Elmaboap Phia Sikini Nubunge elmaboap lag tangtopne sembe (3:1-24)
“Sikne to, orolenange to,” aro mipto el tanepne sembe (4:1-6)
Nimi mamun o'ona seneptangtopne sembe (4:7-21)
Yesusag wana paliropne pere agha Allahri seneropne salero paliag nembanepne sembe (5:1-21)