Yohanesti mome toro pibogha
Selekne
Nimi Kamag Nenehirop Yubu Sembe
1
1 Nangkabo! Wene mome toro palilamnangena, nia mangkina wamna komag El yum-yum samenag agha wamog yubu nimi nongag taogne sembe mome toro palilamna. Eldi ua ulamogha haingdi ililamuburi, nu saeri po'oro saelbamuburi, aori ka'elamubu. Kamag nenehirop yubu eneko sembe mome toro palilamna. 2 Kamag nenehiropne poneko lag neneptaogpa, nuri haingdi ibubu. Nuri haingdi ibubunge neneko sembe nuri ambarelamsiap. Nuri a'un ambarelamsiapnena, ya'ag kamag nenehinne poneko Nuniap nhon wamogha nunag lag neneptaogne sembe ambarelamsiap. 3-4 Nunag lag neneptaogpa, haingdi ibuburi, aori ka'ebabunge neneko agha nuri babe a'un ambarelamsiap. Nunna Nuni Imagne ponekoap, Elme Yesus Kristusap nhon sae tiptangto wamapti, “A'un babe nunap nhon sae tiptangto wamukap,” aro yubu ene ambarelamsiap. “Sae tiptangto wamsebeba, nuri wanaag yeng maikno loloro teknep tahiso,” aro yubu ene mome toro palilamap.Allah Eldamne tibin wareroba wamlange (1:5-10)
5 Yubu lenne ponekori yubu ka'ebaburi, a'un tipto ambarelamsiapne neneko ane: Allah tibin warerop sirikne wamlaba, Elagna inibinne babe orog wamla. 6 Elag inibinne orog wamla ane sembe, nuri inibinne ul pinep kom saog wamap. “Elap sae tiptangto wamap,” sebe aghana inibinne ul palamebe tanena, yuburi babe saeri babe orolena lerop nimi wamapne lag neneptaukap. 7 Aghana nun agha Allah tibinne wamla saog uro tibinag mo ul palamebe tanena, nunkaboap sae tiptangto wamapne lag neneptaukap. Tibinag mo ul palamebe tanena, nuri malia uropne ni Allah Elme Yesusti enengag agha a'elelamsilne babe lag neneldalamap. 8 Nuri lelameberi, “Nunna malia urop kom nimi,” sebe tanena, nunag sik senenne orogti, nundam nimi haing kunuldalamapne lag neneptaukap. 9-10 Allahri nimi ni sembe malia ulamang aro yubu lebog aghana, nimi nhondi, “Na malia urop kom nimi,” aro yubu lerop tanena, Allahri lebogne sunsunum uro urop komne lerop. Undo lemnep tanena eldi wanaag, “Allahna orolena yubu leropne,” senelamloa saogne agha yubu lerop. Ane sembe Nuri lelamebeberi, “Nu malia urop kom nimi,” sebe tanena, nunag agha Eldi Yubu nunag urop komne lag neneptaukap. Aghana Allah El wana porogne wamlari, “Uanun,” aro salag lero pairopne sunsunum uro ulamnepneog wamla. Ane sembe nuri Elag lag phoro ambarelameberi, “Nari undo-undo malia uan,” aro ambarelamebe tanena, Eldi nuri malia uropne wailag nembatsileri, nuri wana porog komne alero lupsilul.