Yakobus
Ponekori Mome Toro Pibogha
El nenerop yubu palilamap
Yakobus ponekona, Yesus elipsae taptopne nhon wamog. Maria kelenekori Yesus me nhon mangkaogti, amik sum Yesus ilipsae Yakobus babe nhon mangkaog. Yesusap Yakobusap maum nhon terekpa, Yesus nubu taogti, kalag tebaogti, kamag taog. Kamag taogpa, as soro kalurop as Yerusalem nimiri Kristusag wana paliro winiptangtop nimi sembe Yakobus poneko paia uhiropne nubunge taog. Kristusag wana palirop nimiri, “Tam nubunge karebaukap,” aro ulamekpa, Yakobus ponekori sop-sop wana heklamsiogti wenelamsiog. Eldi wenelamsiog yubu eneko nimiri ka'elamekti, el maiplamek (Pogsiognangdi Ulameka sembe momeag 15:13-21 kembanep). Yakobusti nimi wenero ambarelamsiog yubu eneko, “Yahudi nimiri Kristusag wana palirop nimi wembahinep yubu mome toro pimnun,” sembaog.
Wene sembaogti as Yerusalem wamog aghana, Roma nimiri tala-tala mog so'o saelbamsiekti, Yahudi nimi maikno talup lambahiek. Talup lambahiekpa, Yahudi nimiri Kristusag wana palilamek nimi maikno babe tala-tala taek. Sin Yahudi nimiri Kristusag wana palilamekti, tala-tala taek nimi sembe Yakobusti, “El taukang,” aro mome toro pibog. Sin Yahudi nimi tala-tala taek nimi sembe mome toro pibog aghana, yubu ene babe Kristusag wana palirop nimi ni sembe wana hekahinep yubu wamla. Yakobusti mome toro pibog yubu ene wene a'undi yubuag tipto mome toro palilamap.
Yakobusti nimi wana heksirop yubu enekoag tam nhon-nhon wenero pibog nena, sae agha orog nimi yepsinepne sembe, tup nimiri walia ulamnepne sembe, wali uro seneragnari yubu lemnepne sembe, Allahri seneropne sunsunum uro walia ulamnepne sembe, Kristusag wana palirop nimi mamun ma'aptangtopne sembe wenero mome toro pibog. Tam nubunge nhonna wenero pibogne, seklenne seklelamebeag wana pailingkina walinge tipto ulamukapne sembe wenero mome toro pibog.
Yakobusti mome toro pibogha lomag wamlange
Yakobusti kipsiog yubu (1:1)
Wana palirop nimiag Allahri wana hekahinepne sembe (1:2-8)
Sae agha orog nimiap, tup nimiap sembe (1:9-11)
Nimiri, “Malia uahane,” aro wana aluktopne sembe (1:12-18)
Allah yubu sunsunum uro ul piropneap, a'ori ka'eloropneap sembe (1:19-27)
“Nimi nhon paliag nenero, nhon umag nenero neneldalamseng kom,” aro wenero ambatsiogha (2:1-13)
Sik seneropne sunsunum uro ul piropne sembe (2:14-26)
Kristusag wana palirop nimiri yubu pamag agha lambanepne sembe (3:1-18)
Eka'ukag papna koma wana pailingkina Allahag moloro walinge tipto ulamnepne sembe (5:7-20)